THIMOTHI
Shii Phaul Re-è Nyichiieng Pha Jigigam
Yaophi
Phaul re-è Thimothi shii Nyichiieng pha Jigigam filiao nong gieng pha nane din pha ilkhi duiine boh shii um pha nujo pha muyua Thimothi shii yao. Miyaosiu ne zud pha ji ro. Thimothi shii ne migi re-è Isu Masi ro khagi rek yi pha chiih-è izai yua pha Mua Wie ji nane Surua Ihèg shii kho pha, chiih-è airo masdo nane yuapho duiine blia rek pha zab shii diig duchoi shii awai blia ji rek pha lububo rek phi.
Thimothi shii ne phriie “bi-ìe nane awie pha khnaingthek shii adoggieng bone, ji ne wie arek ro.” Jishii hanyie è ithek shii yoi pha branthek shii mua bie yi ro.
Hì thek zab shii ne, Thimothi shii zeypho awai chai pha miirag nane awai migi, jum, miie, zud diig khui pha ji shii nowkhlei yie ro.
Iliing shii um pha ji
Yaophi (1:1-2)
Chiong nane yao (1:3—2:13)
Yua nane phriie (2:14—4:5)
Phaul awai ro tharo (4:6-18)
Jongsha (4:19-22)
1
1 Hamangkhung-aphuii è yang pha Isu Masi ro guaphasamoy Phaul re-è, nyie gethek yi Masi Isu rog ò um pha sbang pha chai shii yua pha thoh ge.
2 1:2: Blk 16:1 Guro bushun dufuii Thimothi shii:
Aphuii Hamangkhung-aphuii nane gethek ro Ithong Masi Isu ne na shii bushun, nane liijiing phi bo.
Lasothek phi pha nane lububo rek
3 Gune, gui blangthek re-è rek pha duiine hanyie shii gu è sang munow rog shii blia rek pha Hamangkhung-aphuii shii lasothek phi. Gu è hanai nane habiu gu misiathek shii na shii now pha duiine gu ne aishii laso phi ro. 4 Gu ne naro miegkhothek shii now muii ro, chiih-è gu ne na shii bajo riig yang muii ro, ji è gu ne lubo rog shii ley mua ruii phro. 5 1:5: Blk 16:1 Naro moi Lois nane naro amuii Eunise shii de um pha ichua, naro isiie migi shii de now khlei muii ro. Gu ne migi rek ji ne na shii de um ro. 6 Gu è wadthek na lakhung ruii magey shii Hamangkhung-aphuii re-è phi pha lasen shii isieng ruii yi pha ji pha chiang gu na shii nowkhlei yi. 7 Chiih-è Hamangkhung-aphuii re-è gethek shii phi pha Ragung ji ne gethek shii murumdum rek pha aphi ro; ji pha chiang, airo Ragung ne gethek rog blu, miie, nane zud pha zan phi ro.
8 Chiihphado, gethek Ithong shii khagi rek pha awo rabo, din ne Isu Masi chiang gu phatheg hà rai pha ji shii awo rabo. Ji phachiang shii, Hamangkhung-aphuii re-è na shii chua phi pha duiine Mua Wie pha diig shii nawai ro ichua rek bo. 9 Ai ne gethek shii ragia rek ne gethek shii awai bran rey yi pha ho phro, nyieliieshii gethek è nyie rek pha ji re-è asi ro, jishii nyieliieshii ai awai ro blia nane bushun re-è ro. Ai è gethek shii phi pha awai bushun ne ishak ajo ba pha ibi Masi Isu chiang re-è phijong, 10 Jishii thuh hì ne gethek ro Ragia Masi Isu wuii ruii pha ji è gethek shii dong phi ro. Ai è iy pha blu shii jong muii chiih-è muawie ji è a-iy pha chai ji shii dong phi.
11 1:11: 1Thi 2:7 Hamangkhung-aphuii è gu shii Mua Wie ji yao pha guaphasamoy nane masdo duiine boh ro, 12 chiih-è hì ne ji pha chiang re-è gu ne hì pha manathek shii diig rey ro. Jishii gu ne thuh de ley migi um ro, nyieliieshii gu ne hanyie shii migi rek aishii ne thieg, chiih-è migi rek nyie yi gu shii phi pha blia ji pha Inai ji thogdang pha ai ne ragia rek mua.* 1:12: Ai è gu shii nyie yung pha ji; dinne Gu è aishii nyie yung pha ji. 13 Na shii iikhiing shii luagieng yi pha duiine, gu è na shii yuajong pha izai miyaogamthek shii chuh re-è khoh bo, chiih-è gethek ro Masi Isu rog ò rek pha miie nane migi shii rey ne rai bo. 14 Hanyie gethek shii rai pha Ragung So pha blu re-è nathek shii phi pha blia shii wie manathek shii ruii bone nathek shii yao ro.
15 Nathek ne thieg, zab Asia pha du-ùa, Phygelus nane Hermogenes dungdang ne gu shii ne thoh marui. 16 Onesiphorus haliingpho shii ne Ithong è bushun doh yi bo, nyieliieshii ai è gu shii ne bleb-bleb sang phi. Gu ne phatheg hà um pha ji shii de ai ne awo ro, 17 jishii ai ne Rom hà thogdang shii, ai ne gu shii adoh sapho shiine jao ne sow. 18 Ji pha Inai shii Ithong airo bushun ne aishii phi bo! Chiih-è ai ne gu shii Iphisus hà khama wie rek phi pha ji nathek ne wie re-è thieg ro.