GALATHITHEK
Shii Phaul Re-è Jigigam
Yaophi
Isu ro mua wie chiang jao ne yua ne chiih-è hanyie yi Jewthek asi pha bran duchoi shii wieho, izai Masipho rey pha ne bran yi Moses ro Iphey ji nuii chid habey rone musai sai. Phaul è khnaing pha jine mugak asi rone yao— izai shii ne, chiih-è gethek ro migi Masi shii rek pha ji mugak ro, ji pha chiang è zab ne Hamangkhung-aphuii rog shii rangsua ruii. Jimagungde Galathia pha charchthek duchoi shii, Roman du-ùa pha Asia Minor ithek wuii srane Phaul shii gui ne yao Hamangkhung-aphuii rog shii rangsua rai pha ne Moses ro Iphey shii de nuii chid phro.
Galathianthek shii Phaul ro jigigam ne biidiie yua bsa hà dun pha bran shii izai migi hà iidoh noh ne dab yi. Phaul è awai shii Isu Masi pha guaphasamoy pha rangsua rone ho pha ji jao ne ragia rek. Ai è boh rek, awai mua pha guaphasamoy ne Hamangkhung-aphuii è thok, bran pha riichai è asi ro, chiih-è awai blia ne Jewthek asi pho shii ro. Chiihphado ai è branthek ne Hamangkhung-aphuii rog shii rangsua rey phane migi ji è rone khnaing noh. Jong pha ithothek shii Phaul è doh yi Masipho blia ne ziig pha miie ji è Masi migi rone doh yi.
Iliing shii um pha ji
Yaophi (1:1-10)
Phaul ro guaphasamoy rone riichai phi (1:11—2:21)
Hamangkhung-aphuii ro bushun pha muawie (3:1—4:31)
Masipho ichad nane khaja (5:1—6:10)
Jongsha (6:11-18)
1
1 Phaul re-è, hanyie yi guaphasamoy ne bran è athog ro dinne tharothamang pha miyaosiuthek re-è asi rone yao, jishii hanyie è aishii iy pha ji è hòi din yi pha Isu Masi nane Hamangkhung-aphuii Aphuii re-è rone yao. 2 Ichiih um pha zab migiphothek gu rog dog gieng pho è Galathia pha charchthek shii salamthek renge:
3 Hamangkhung-aphuii gethek ro Aphuii nane Ithong Isu Masi è nathek shii bushun nane liijiing rey bo.
4 Gethek shii duchung pha awie pha idam è ragia rek phi ne chiih-è gethek ro Hamangkhung-aphuii nane Aphuii è yang pha ji nuii pha ji re-è, Masi awai ne gethek layog chiang phi muii. 5 Hamangkhung-aphuii ro biisiie ne idang nane idang rey bo! Amen.
Muawie jia
6 Gune nathek shii wiengphleg muii ro! Ishak muna asi ba shii nathek ne hanyie shii bushun ne Masi è ho pha ji shii ne tho muii ara ro, chiih-è nathek ne gai muawie shii choi dun ara ro. 7 Nyayao chak shii ne, “Gai muawie,” ne oi ro, jishii gu miyao hìne nyieliieshii ichiih ne giak bran ne nashii afak-afi rek ne chiih-è Masi ro muawie shii lai pha bidiang muii ro. 8 Jimagungde gathek è yua pha muawie ji è yo hamangkhung hamangkhliie nane gathek è yua arone, aishii ne thumluii hà the dun ro! 9 Gu è doh ibi de yaojong, chiih-è thuh shii de gu yao din; hanyie magungde nathek è nuii pha mua ji è gai yua arone, aishii ne thumluii hà the dun!
10 Gu è tharothamang è choi pha ji shii mua pha bidiang pha duiine bey? Khuchungde asi! Gu è nyie yang pha ji ne Hamangkhung-aphuii è choi pha ji ro! Gune bran rog shii boh rey yi pha bidiang ne bey? Gune thuh de ji rek pha bidiang bamuii arone, gune Masi ro khiao asi ro.
Phaul ne nyie khi-èrek ne guaphasamoy rey
11 Gu khuiinothek wo, gu nathek shii yao, gu yua pha mua jine bran è rey pha asi ro. 12 Gune hanyie bran è de amuii ro, chiih-è gu shii hanyie è de ayua ro. Hì ne Isu Masi awai è gu shii doh yi ro.
13 Nathek ne nyayao mua, gune Jewishthek ro giang shii lubu phi ne rai shii, gu è khi-èrek ne Hamangkhung-aphuii ro charch shii bushun de arek pha diigkhui phi ne gu è khama srobro rek mua pha rek ro. 14 Gune idam ò pha Jew ijakthek duchoi shii Jewthek ro giang pha blia shii gune ithek è de ibi ba ro, chiih-è gathek ro blangthek pha zenthek pha ji shii ithek è de bajo lubu phi ba ro.
15 Hamangkhung-aphuii è awairo bushun è gu agiak ba pha ibi è gu shii guajong ro, chiih-è airo blia rek pha ho. 16 Ji-è ai awairo Dufuii gu shii dong phi pha phak mage shii, gune ai chiang pha Mua Wie jine Gaibranthek shii yao mua pha gu ne hanyie shii de yua phi bo ne awuii ro. 17 Chiih-è gune hanyie gu è ibi um pha guaphasamoy shii riig pha Jerusalem hà de awuii ro. Jiphachiang shii, gune khthiie Arabia hà wuii ne chiihphado gu ne Damaskhos hà khid din. 18 Idam uom pha iidoh shii gu ne Phithar è mua mua pha Jerusalem hà wuii dun, chiih-è ai rog shii habda nyi rai. 19 Gu è Ithong ro ikhuii Jems shii doh bie ne gai guaphasamoy hanyie shii adoh ro.
20 Gu è nyie zey pha ji ne izai ro. Gu ne biidiie asi rone Hamangkhung-aphuii ne thieg ro!
21 Chiihphado shii gu Syria nane Silikhia pha ithuathek hà wuii dun. 22 Jipha ishak shii Judea charch pha branthek ne gu shii athieg ro. 23 “Ithek ne hanyie è gethek shii diig phi ne mua maphi pha bran jine migi pha miyao yua muii rone gaithek è yao pha ji thieg bie ro!” 24 Ji-è ithek ne nyieliieshii gu chiang Hamangkhung-aphuii shii chiong ro.