Yang Baklung Ipinagpakigpaig̱u 1 Timoteo 5

Kung Ya Pa Ag̱ari Yang Pagpakignunut Na Tung Mga Mamaepet May Tung Aranek Ta Idad Tung Anya (5:1-2)

1 Kung alimbawa may sasang maepet ang lalii asan ang kaministiran ang paintindien mu natetenged tung ubra-ubra na, indi mu enged buyayawen, kung indi, pakigkesenan mu ta luay-luay ang ya rag kaw̱ig̱ay mung ama mu. Kung natetenged man tung mga masigkalalii mung aranek ta idad tung nuyu, ipabtang mung mga putul mung sadili ang yag kunsiuay mu ta matinlu. 2 Kung natetenged man tung mga mamaepet ang mga baw̱ay, kaw̱ig̱en mung nanay mu. Kung natetenged man tung mga baw̱ay ang aranek ta idad tung nuyu, ipabtang mu kang mga putul mung mga baw̱ay ang pulus ka tung magkabag̱ay yang pag̱aratrataren mu tung nirang anday danyu.

Nag̱apasanag̱an Na Natetenged Tung Pag̱erekelen Na Tung Mga Baw̱ay Ang Mga Balu (5:3-16)

3 Yang mga baw̱ay ang nagkarabalung anday may kaampiran tung nirang mag̱asikasu tung nira, yay dapat ang diparaen yang sam pundaan ang asikasuen. 4 Piru kung may sasang balu ang may mga ana na ubin mga apu na, tanirang may sadili, yang dapat ang ipalandaw nirang intindien tung panirbian nira tung Dios ya ra yang pag̱arasikasuen nira tung sasang maepet nira ang para asan da nga balesay nira ta matinlung kaneeman ti nanay nira ubin ti bai nira. Ay kipurki yay nag̱auyunan ang pisan yang Dios. 5 Ug̱aring yang sasang balung kapas ang pisan ta mag̱asikasu tung anya, atia anday dumang pag̱ineteg̱an yang isip na, kung indi, ultimu ra ilem yang Dios. Law̱iig kaldaw yang pagpataw̱ang na tung anya. Ya ray balung dapat ang asikasuen yang sam pundaan. 6 Piru kung may balung pagpapsaw ra ilem tung sadiling kalelyag̱an nang pagbuat ta malalaway, maskin bui pa tanya, katimbang nang patay rang lag̱i ay nagpablag da tung Dios ang nagpanadili. 7 Yang nag̱iurdinung atia natetenged tung pag̱arasikasuen tung mga balu, kaministiran ang ipagpadapat mung ipatuman tung sam pundaan yang mga tumatalig asan ug̱ud anda ray sarang ang mabangdan ta duma tung nira. 8 Piru kung tinu pay indi mag̱arasikasuen tung balung may kaampiran tung anya, kapin pa enged yang sadiling nanay na ubin sadiling bai na, asan nga paitaay na ang nag̱apanalyuran na ra yang ustung pag̱urusuyun tung kamatuuran ang naang nag̱apananged ta. Asan da ka napadeeg tung belag̱an mga tumatalig ang pamag̱arasikasuen ngani tung mga balu nira.

9-10 Kung natetenged tung listaan ta mga balu*, yang sulaminting ilista asan, ya ra ilem yang kumpurming pag̱idaran da ta saisinta anyus (60) patakwal. Kaministiran minsa ilem ang nagpakasawa ang indi na ra ka linimbungan yang kasawa na. Kaministiran kang ilaladu ra kang lag̱ing durug tinlu yang mga buat-buat na. Bilang durug tinlu yang pagparadakulun na tung mga ana nang asta namaglua rang neeman, duru kag kainasikasuen tung mga tumatalig ang nag̱apanaw tung anya maskin indi na ka nag̱ailala, panirbian ka tung mga masigkatumatalig na ang maskin ubra ta sasang turuw̱ulun, agpegsan na ka enged ang ubraen†, ig durug katinaw̱angen tung mga taung nag̱aliwag̱an da. Kung pirming pagprusigir tung mga pag̱urubraen ang mga maning tiang nag̱ikaayen ta mga masigkatau na, yay sasang balung dapat ang ilista.

11 Piru kung natetenged tung mga balung mga baw̱ay ang aranek pa ta idad tung saisinta, indi ra ilem ilista. Ay kipurki kung ilista pa, muya kung dereeg̱en da yang kalelyag̱an nirang magpakasawa si, mag̱isul da tung pinangakuan nirang manirbian da tung ni Jesu-Cristong mintras bui pa. 12 Ya ray magakdan nira ta pakusalak natetenged pinanalyuran da nira yang sinumpaan da nira atiing pagpalista nirang primiru. 13 Yadwa pa, pag nalista ra ngani, muya magkaanad-anad da tung pagpatamad. Imbis magprusigir tung panirbian nira tung ni Ginuu ta, gastaen da ka ilem nira yang uras nira ta masyadung pamasyar-pasyar nira tung mga kabalayan. Belag̱an da ilem maning tia, kung indi, maglua ra kang daldalira pa, mapinagpalaw̱et pa tung anday kalalabten nira ig mainisturiaen pa tung belag dang bag̱ay ang sarambiten. 14 Purisu yang gustuu asan tung nira, maayen pang magpakasawa si, magparanganaen da ig mag̱arasikasuen da tung pamalay-w̱alay nira ug̱ud asan da nga kapasay ta mapadatelan yang pamagkuntra tung yaten ang mga tumatalig ang mamagtag̱am pa rin ta saway. 15 Impurtanting sambitenu tia, ay kipurki may dumang mga balung aranek pa ta idad ang nagpalista ra ang pagkatapus napatalang da tanira tung ni Satanas ang nagpakled da tung mga ubra-ubrang mga maning tiang durug kasayud.

16 Ibaliku ra kanay tung mga balung kapas ang pisan‡. Kung may tumatalig ang baw̱ay ang kasawaan pa ang yay may sadili tung sasang balung baw̱ay, dapat ang yay mag̱arasikasuen tung balung atia. Indi na ra palbatan yang mga kaarumanan nang sam pundaan ang papagsuituen ug̱ud yang suituen nira ya ra ilem yang mga balung kapas ang pisan ta magsuitu tung nira.

Yang Mga Urdin Ni Pablo Natetenged Tung Mga Pamagmaepet-epet Ang Kada Sam Pundaan (5:17-25)

17 Ibaliku ra kanay tung mga pamagmaepet-epet ang kada sam pundaan§. Kung matinlu yang pagmaepet-epet nira ang pamanirbian tung mga kaarumanan nira, magkabag̱ay kang galangen nira ta maayen kag riparaen ka nira kung agkulangen da nganing tung mga kaministiran na. Kapin da enged yang pamagpakabedlay ang pamagprusigir tung pag̱araralen nira tung bitala yang Dios may tung pagturuldukun nira. 18 Ag̱aningenung magkabag̱ay ang galangen ang riparaen, ay tia uyun tung sasang napabtang tung kasulatan ang yang sasa unung bakang nag̱apapanggeyek, indi unu pugsungan*. Uyun ka tung sam bilug kang bitalang napabtang ka tung kasulatan ang mag̱aning,

“Magkabag̱ay ka ang yang sasang ubrirus asikasuen tung mga kaministiran nang yay maning pa tung suul na,” ag̱aaning†.

19 Yang sasang pagmaepet-epet, kung alimbawa mabangdanan ta malain ang ya ray ikig̱a tung nuyu, indi mu ra kanay intindien, mintras anda pay magpaingmatuud ang durua ubin tulu nga tauan‡. 20 Kung masiguru mu ra nganing ang matuud ka man, ipaintindi mu ra tung anya yang kasalanan na ug̱ud basi pa ra ilem asan da ngaeyangay ta ipagsug̱at na. Ya ray buaten mu tung katalungaan yang kadaklan§ ug̱ud asan da mamagkatinir ta pag̱eled nirang mamag̱usuy*. 21 Timoteo, naaw̱a enged yang nag̱ituw̱ulu ra tung nuyu tung katalungaan mismu yang Dios durua ni Jesu-Cristo kasiraan da ka tanira yang mga angil ang pinilik nirang para mamagtaripukpuk tung pagkarungan nira. Yang mga nag̱iurdinung atiang baklu ra ilem ang sinambitu†, dapat ang ya ray tumanen mu enged ta ustu ang andang pisan ay pinilikan mung dapig̱an, maskin tinu pang pagmaepet-epetay asan. Ay kung malalisan mu tia, siguradung patuw̱alena ra anya. 22 Kung natetenged tung pagpiar mu tung sasang putul tang magmaepet-epet tung sam pundaan, india ra enged magpakali-kaling magdeen tung anya‡. Ay muya kung kali-kalien mung deenan ang pagkatapus magbuat da ta kasalanan, asana ra ngaumiray ang nag̱ing kusintidur tung buat na. Pati yawa, mag̱amlig̱a ka ang india ka magbuat ta kasalanan. 23 Piru belag̱an ang mag̱aning ang pulus ilem wai yang igmen mu. Kumus midyu muya-muyaa rang sisiitan ta tian mu, maayen pang manginema ta binung gesye ilem, bilang bulung tung tian mu. Kung manginema ta binung gesye ka ilem, belag̱an kasalanan mu tia§.

24 Ibaliku ra kanay tung pagpiar mu tung sasang magmaepet-epet tung sam pundaan*. Yang indi mu ipagpakali-kaling pagpiar ay natetenged kung kaisan, durug liwag ang madeep mu agkali kung unu pang klasing pagkatauay na. Kung tung bag̱ay, yang duma bistung bistu mung lag̱i yang mga kasalanan nira. Pagtukaw ra nganing tung anyang magprisintar tung nuyu. Anda ray kaministiran mung paptikan mu pang pamalaran. Piru yang duma yay mas maliwag ang masiplatan mu ay taluk yang mga kasalanan nira. Kuidaw, muya baklu ra luw̱away ang napiaran mu ra! 25 Pati yang mga ubra-ubrang matitinlu, maning ka. Yang duma bistung bistung lag̱i. Maskin yang duma ang belag̱an bistu, may uras dang luw̱awan da ka enged agyapun. Purisu ya ra ag̱elatay mung lumbaw.

*5:9-10 5:9-10a Atii kanay yang mga balung ilinista yang sam pundaan, ya ag̱asikasuay nirang sam pundaan kag yadwa yag piaray nira ta mga ubligasyun nirang manirbian tung ni Ginuung Jesu-Cristo.

†5:9-10 5:9-10b Sigun tung bitalang “maskin ubra ta sasang turuw̱ulun agpegsan na ka enged ang ubraen”, kung getesen ang ilakted tung Tinagbanwa maning taa: “pag̱apangug̱asan na ra ka yang mga kakay yang mga tauan yang Dios.” Ay atii kanay yay sasang ubrang pinakaaranek. Ya ra kay binuat ni Ginuung Jesus tung sam puluk may durua nga tauan na baklu dineep (Juan 13:1-17).

‡5:16 5:16 Balikan ta yang inaning na tung 5:3, 5, 8.

§5:17 5:17 Balikan ta yang isinulat na tung 3:1-7.

*5:18 5:18a Deuteronomio 25:4; 1 Corinto 9:9

†5:18 5:18b Ikumpalar tung Mateo 10:10 may tung Lucas 10:7.

‡5:19 5:19 Yang gustu ni Pablong ianing, dapat ang usuyun ni Timoteo yang sasang katuw̱ulan yang Dios ang sinambit tung Deuteronomio 19:15. Pariung pisan tung sinambit ni Ginuung Jesus (Mateo 18:16).

§5:20 5:20a ‘kadaklan’ puidi tung katalungaan yang kadaklan ang mga aruman nang pagmaepet-epet ubin tung katalungaan yang kadaklan ang mga tumatalig ang pamagsaragpun.

*5:20 5:20b Simpri, yang gustu ni Pablo ang baklu ra ubligaray ni Timoteo tia, tukawen na ra kanay ang usuyun yang mga rimidyung sinambit ni Ginuung Jesus (Mateo 18:15-17). Kipurki inaning na ra kang lag̱i duun ang yang dapat ang aningen tung publiku, kumpurmi ra ilem yang indi ra ka enged mamati ta kunsiu.

†5:21 5:21 Bilang yang isinulat na tung 17-20 natetenged tung mga pamagmaepet-epet.

‡5:22 5:22 Atii kanay, kung deenan yang sasang tumatalig, yang nag̱adapatan na, tanya ya ra ag̱iintrigaay tung Dios ang para paktelen na tung panirbian na. Dispuis pa, ti Timoteo inurdinan da kang lag̱i ni Pablo tung 3:1-7, may 10 ang baklu ra piaray na yang sasang magmaepet-epet, kaministiran ang paptikan na ra kanay ang pamalaran kung magkabag̱ay u kung indi.

§5:23 5:23 Ikumpalar tung inaning na tung 3:8 ang yang sasang manirbian dapat kang belag̱an tarainem. Ig tung Efeso 5:18 inaning na ka yang mga tumatalig dapat ang indi magpabaleng.

*5:24 5:24 Balikan yang inaning na tung 5:22.