1 Ashiriya, tuchip masach tapaz ndunar, Sírushuch Israelchichpa wanasir mapiyrsin taaranganaya. 2 Itaru, anumun tuchip masach tushiyramchu, Utaáshuch kurak Josafat, kurak Israelchichip paseektakatu naatarangiya. 3 Kuraksha Israelchich ichingaroo wipunashee tushaneeyaru, tsiyatarangu, Siy ichingarus yasaktamsa. Yakat Romot, Galaad iyatamcha tsapuni. Itaru, Sírushuch urkar anush pshturangiya. Ashiriya, ¿siy anoo amaksa? ¿Maya mangishis chinaksa? ¿Ndusha kurakaa Sírushchee itutsimaam waritak? tárangiya.

4 Kurakaatssha Josafata: ¿Shiy amaksha? ¿Nda nuwapa ipuneeruni yakat Romot Galaadash tsap pshtuyaruni, pachamaam zandkish? tárangu, kuraksha Josafat, Nuwaana, misha sundarurpati ichingaruni kapaachpatatam shiyapa sundarurish washunand ipunchinipa. 5 Itaru, ndatuma tapazip naaruni, ichtaru Apanlleetsima yasayani, tárangiya.

6 Ashiriya, kuraksha Israelchich apanllpanee urkar 400 tushaneeyaru, masharangiya. ¿Siy amaksa? ¿Yakat Romotash tsap Galaadash pshtuyareezini pachachinee? ¿Nduniya ashiru watstazuwa? tárangu, uwshtisin ichingarusin, Waratashinints. Uru Apanll shiyaam istakachu, siyamari kasitssa, táranganaya.

7 Itaru, kuraksha Josafat, ¿Ndusha nish min apanllpan urkar taar? ¿Waapasha yasayaruni, naamaama? tárangiya.

8 Kuraksha Israelchich Josafataa, Nish Mikayas Imlárini wip táriya. Anoo yasamaam waritaritamcha. Itaru, nuw anoo kuk nda kaapa mazinamaam zandkina, watam tsiyatssee nda wanasir kamanimaam yasariya. Yutarit tushiychu anootsimari kamankiya, tárangu, Josafatsha, Nduni amb tárinllpa, tárangiya.

9 Anuritam kurak Israelchich sundaroo kuruzeeru, Mikayas Imlárini wip yamashini. Mikeeru naatampa, táyaru kamachtarangiya.

10 Ashiriya, kurak Israelchich, misha kurak Utaáshuch Josafat ashirusin, tapazip naamaam yareersin, yakat Samariyanung shítungash waanamuntaritssin uxinash kuxinataranll ashiranganaya. Anush apanllpanshitisin urkar aranginasha pamazuta, pamazuta ashirangsin, tsiyatssee kamanimantar ashiranganaya. 11 Sedekiyassha Kenaanarini wip ngusamb wakar wits ashiru zapan tinayaru, anootssha yáyaru kapung tsiyatarangu, Apanll ateeja: Uru nish puu puu tákchus, siyamari tpuxtakachus, ashparita kachingeerus, kasatssa, Apanll átcha, tárangiya.

12 Ashiriya, ichingarusin apanllpan urkar ashimanandari tsiyataranganaya. Naayarus, pachashinints. Yakat Romota Galaadshuchee uru siyamari kasitssa. Ashkachus, Apanllsha anoo tsap siyaam panachiya, táranganaya.

13 Yuwaatssha tsiyatssipanee zanganirangana ansha Mikayasaa, Piyartach ichingarusin apanllpan urkar yuwaa kurak masharangu anoo wanasir kamaniranganaya. Ashirucha, anoom shiyangaz kurak yamashini, táyaru, yamakaturi kusarangina. Shiysha anush kuseerush, tsiyatsis wanasir kamaningcha kurakaatsi, tárangu, 14 Mikayassha, Zurampatari Apanll paritam, yuwaatsimari waana Apanll kamachtaku, anootsimari kamanimaam waritakina, tárangiya.

15 Ashiriya, kurakashsha kusarangu, Ajabsha; Mikayasaa, ¿yakat Romotash Galaadshuchpa waratkachuni, iyamaritaja kasichinee? ¿Nduneezuwa kasichiniwa? tárangu, Mikayassha, Naayarus waratangints. Uru siyamari kasitssa. Ashkachus, Apanll waana anoo yakat shiyaam panachiya, tárangu, 16 Kuraksha, ¿Wanipaja shiy tsiyatkush ambiri átish? Itaru, na zurampatarisha Apanll waana paritam itsinsampatari kamaningcha, tárangiya.

17 Ashiriya, Mikayassha, Nuw Israelshuchee ichingaroo tputs, opeejaa ksutamapan ndunar tamatarpari ashirusin,* Matiwa 9.36; Márkosa 6.34 tsiyatsis nipta tatsamooru taaritamta. machish masarsin parangina. Ashiri anoo Apanll ateeja. Watam neem tputs ksutamapan ndunariwa. Waani yapitam káyashinana kanapchinllinpa, átcha Apanlli, tárangiya.

18 Anootssha kurak Israelchich mazinarangu, Josafataatssha; Ashirucha, nuw shiyaa in tputs nda wanasir tsiyatssee kamanikpa. Mangutaritanda tamasingayaru tsiyatku, táranllshina, tárangiya. 19 Yusur Mikayastam tsiyatarangu, Yuwamand shiy átish anumand nuw Apanllee chínash kamanchinllpa. Nuwsha Apanllee paranguri, uxinashimun kuxinaru, anoo wasundursha kanindpich mbutsanungich ashpatam, mbazinungichsha ashpatam ashirusin turipingarsin, zapan shaneersin parangina. 20 Anushsha Apanll masharangu; ¿Chakaja kurakap Ajabap naayaru, mangutari tamasingayarusin, pachamaam yakat Romotap Galaadshuchip naakchu, waanaatstatam pachachinllina? Apanll tárangu, wasundurursha anoo piyartachshitisin tsiyatkusin, mangutari piyarisha tsiyata, mishat tputs mangutaritam piyartatam tsiyata, ashiranganaya. 21 Itaru, minumamari Apanll wasundurur anush kusarangu, Apanllee, Nuw amb ashimaam waritaktana, tárangu, Apanllsha, Ashiriya, ¿shiy tamayareezish amb ashtachish? tárangiya. 22 Ansha Apanll wasundurur, Ashiriya, nuw naayaruri, apanllpanee urkar ichingaroo wayangichirireem wayachima. Ashkachuri, uwshtisin mangutari ngichchinllinaya, tárangu, Apanllsha, Shiy amb ashimaam waritaktishcha. Yuwari táyarish anuri shishincha, Apanll tárangiya. 23 Ashirucha, na in Apanll waana nishuchee ichingaru apanllpan urkar mangutari tsiyatamaam wayarangu, mangutaritssin tamasingayarusin tsiyatkanaya, watam Apanll waana shiyaa tsipamaam wayaranguwa, Mikayas kurakaa tárangiya.

24 Anootsshat, Sedekiyas Kenaanarini wip mazinarangu, kapung tsiyantayaru, Mikayasaa wachush puwarangiya. Sheeru, ¿Mayaamsha ngutish ngichiksha? ¿Yapsha Apanll wasundurur shiyash kuseeru, tsiyataranga? tárangiya.

25 Mikayassha, Uru minush zar kundarareetsish punikush, kamungpi átush, suwayaranllush, pangusish tapishta, minushsha pangus tapishta shitarachus, anush uru yuwaa nuw táyanlli anoo chinachsha, tárangiya.

26 Ashiriya, kuraksha Israelchich, Natu Mikayasaa naturi putayarus, kurakap Amónap yakta ksutamapanip machingints. Sheerus, kurak Jowasapsha nuwap ipari machintstamtsa. 27 Anushsha kuseerus, kuraktanda Ajab kamachtayaru, tumanshishish tumanamaama, tángtsa, sheersin, watungasheemsha yuw pang' yutarita an kunguptamari panachinllinpa. Nuw tapazip wanasir matambshi kanapeechuri, anush tashitungachinipa, tárangiya.

28 Mikayassha yusur aranginasha tsiyatarangu; Wánariya shiy matambish kanapkachush, ashiri nuw ngichkuparina tsiyatarangina. Apanllee kuk nda kaapa itsinsaru kamanirangina, tárangiya.

29 Tárangusin, anumun kurak Israelchich, mishat kurak Utaáshuch Josafattam ashirusin wasundurur ichingarusin yakat Romotap Galaadshuchip watsapun waratamaam naataranganaya. 30 Naayarandsin, anush apus kurak Israelchich Josafataa tsiyatarangu; Ashiriya, nuw shiyaam kamareetsi yusheeruri panachinllpa. Shiysha kamartancha. Síriyshuch wasundurur nuwaa natstarundama, aturi, nllitarit nuw kamartayaruri, pshtuchima, tárangu, wamaree yusheeru, nllitaritsha kamartayaru, tapazish pshturangiya. 31 Itaru, kuraksha Síriyshuch pachampanee kapitanaa ipuseeru, kapaachush pshiyrshini tapazpanish naakchusin anoo, tputsee nllitarita mangutaritis pcharintspa. Kurakaatsimari Israelchichee pakchus, pachayarus ksantsa, táyaru kamachtarangiya. 32 Ashiriya, kapitanshitisin kapaachush pshiyrshini kusarangsin, Josafataa kurak ashiru parangusin, Kurak wataparee Israelchichi atusin, pachamaam taturpiranganaya. Anootssha Josafat parangu, puniku, Pacharispa. Nda nuw kurakima. Tapachindangasinda, wamkureetssha, tárangiya. 33 Anootssha, kapitan natstarangusin, ¿Antaati in Israelchicheeja kurak? atusin, anoo kasaranganaya. 34 Itaru, misha sundar mangutari msanguru tsak ashiranllu, kurakaa Israelchichee msangeeru mangu xiru' ashirangiya. Timbanllizsha ngusamb kararu anush pshtuyaru, tsipamaamari kayungarangiya. Ashirangsin, kurak Israelchich kizpur wanguytarangu, kapaachoo pshiyrshini putampanee, Pzaya. Nuwaa piyam macheerush, naruwanda tsipamamaritamta kayungeenda, tárangitaa, 35 itaru tapazsha nda pastaku, kuraksha kizpur wanguyataa, ashiritaa pshiyrshishimun xiyaru, wasundurureem kutaku, anootsiri tasasarangu, kurassha kayungamash kapung zaw zaw ashirangu, pshiyrshishush kapung ksheewarangu, zar pukamachu tsiparangiya. 36 Ashirangu, zar pumarisha sundar ichingarusin anoo tsiyatssee mazinarangusin, waanpatatin, Watstaya. Yaanpeetam tsapunip suwayani. 37 Watam kurak tsipayanlluwa, atusin wapitam kanaputaranganaya.

Ashiriya, kurakaatssha tsiparee wapitam yáyarandsin, yakat Samariyash yushindayarusin, mapuranganaya. 38 Sheersin, kapaachootssha pshiyrshini yáyarusin, anshuri yakat Samariyash yuwash kiz yutaritshishpan chumakana, anushsha kurasee kuparanganaya. Ashirangsin, anootssha kurakaa Ajaba ursir tumuzsha iputaranganaya. Yuwartatam Apanll Elíyasaa kamanirangu anuritam tuminurangiya.

39 Ashiriya, kurakaa Ajaba watarawzuree, misha yuwaatsitam pangoom wanasir pangurangu anootsitam, misha yuwaatsitam yaktaatstam wayayaranllu, anootsitam ichingaru kirak Krónikash yuwaa ichingarusin Israelchicheem kurak kinayaranllina, anoo ichingaru arangeem kamankiya. 40 Ashiriya, kurak Ajab tsiparamchu, anumun yusur wipsha Okosiyas waparish zamurangu, uwsha Israelchicheem kurak kinarangiya.

Ashiriya, na kamaneena yuwaa kurakaa Ajabaa pacharangana anootsi.

[Wapparee. Watamcha tsiyatsis yuw Utaáchchee urkar ichtaru taarangana ano.]