Apanll chtarangu anu
Kirak yuw Apanll Chtakchuri Ashirangu Anoo pakich kamanchintspa
¿Chakaja anoo yandarang?
Móysisarini anoo kiraka yandarangiya. Apanll wirkar Apanll Chtakchuri Ashirangu anoo kamankiya, Israelchich tputs sirútama táranganaya. Itaru, natsha ashpatam tputs, ¿Nitaati Móysisarineeja yandarang? atanaya. Tputs zapancha washunand yandarangana, átssincha. Atitaateesinaya, in zuramari Apanlliritcha kuku.
¿Chakaama yandarang?
Móysisarini Israelchicheem yandarangiya. Apanll maacheetsi ichinguroo tinarangu anoo tputs yasapana, átu, misha Apanll Israelchichee tputs waama tiptsireem ínarangu anootstam yasapana, átu, misha tputs Apanllee yasapana átu, anoom yandarangiya.
¿Mayaamaja yandarang?
Chiy tputsich, ¿Tamaree tsapurunas ashirang? átichcha. ¿Chakaja nee ichinguru tínarang? Yasangsani atitamaniya. Ashiriya, insha kirak anoo ichinguru kamankiya. Anoo kamankitaa, itaru aranginasha waana Apanll chiyaa kamankiya. Apanll waanaatsi zapan kamankiya.
Yuwaa maachee ichinguru tinarangu anoo kamankiya.
Misha, yuwaatstam tputseetsich tinarangu anootstamta.
Misha, yuwaa tputs Apanllee ngatkana anoo kizpur wanichima átu anootstam,
Misha, yuwaatstam yutaritshishpanee tputs waneerangu anootstam,
Misha, yuwaatstam tputsee kizpur chinaku anootstam,
Misha, yuwaatstam, Tputs wanasir taachinllinpa, átu anootstam,
Misha, yuwaatstam chiyaa zurampatari istamaam zandku anootstam,
Misha, sirútama zandarangu, Nuwsha nuwaanchichee tputsiri ipuschima, tárangu anootstam,
Misha, yuwaatstam, Nuw tputsiri wanasir taachinllinpa, tárangu anootstam.
Nish kirakash wasina Isusoo kamankiya.
¿Mayaatseeja kamanik?
Apanll ichtakchuri ashirangu anoo kamankiya:
Apanll chtarangu 1.1—11.32: Ichtaru kamankiya yuwaa Apanll maacheetsi, tputseetstam tinarangu anootsi. Misha, tputssha Apanllee kuk payumaam kapung ngatarangsin, Apanllsha tputsee tpachingarangu anootsi.
Apanll chtarangu 12.1—50.26: Apanll Hebrewshuchee tputs waama tiptsireem ipusarangu anootsi.
Apanll chtarangu 12.1—25.34: Apramarinee kamankiya.
Apanll chtarangu 26.1-36: Isaakarinee kamankiya.
Apanll chtarangu 27.1—36.43: Akoparinee kamankiya.
Apanll chtarangu 37.1—50.26: Osiyarinee kamankiya.
Apanll chtakchuri ashirangu anu
1
Nuw Móysisi kamanchintspa yuwaa Apanll ichtaru maacheetsi tinarangu anootsi
1 Apanll chtakchu, kanindaatstam, tsapootstam tinarangiya. 2 Anpur zar tsap izuuru ndunarimuna; kurimunazimuna. Ichingaru kungunandamuna. Mishat, izuuru tápimuna. Itaru, kungumunsha iwaz Apanll wani mangamangtar ashishtar ashku ksutarangiya.
Apanll ichtakachuri minamtash zar tinarangiya
3 Mang Apanll tárangiya, 'Sineem taachpa, táyaru, 'sineerangiya. 4 Sheeru, Apanll nap ashku, Kizpurcha wanasiri, tárangiya. 5 'Sin kaschireem waani taachpa, mishat tapi waani psaanaam taachpa, mang tárangiya. Anush zar minumtarini tapitaranll ashirangiya.
Putamsha tarasitaranllu, Apanll tsimbunarinsha zari minootssha tinarangiya
6 Apanll mangush chinarangu, Waani íwar kung msas tamapari ashiru taachpa; tsapushsha kung waanitam taachpa, mang tárangiya.
7 Sheeru, tsapushsha kungunand taarangiya. Kanindapshat arang kungutam taarangiya. Apusashsha kurimunazeem kasarangiya. 8 Anush tsimbunarini zar tapitaranll mang ashirangiya.
Putamsha tarasitaranllu, Apanll tuchparinsha zari tinarangiya
9 Apanll tárangiya; Kungoo piyam waanitam wayachima. Puzaatssha waanitam wayachima, táyaru, 10 puzaa tsapu átu ísamarangiya. Itaru, kungootssha mar átu ísamarangiya. Ashiramchu, Apanll tsapoo, mishat kungoo kis naparangiya. Kizpurcha wanasiri, tárangiya. 11 Waanitam tsapumun mangina kxoonachpa; chirichir waanitam kxoonachpa. Mangintam wanus waani yusiyustanllpa; aranginasha pzapanichpa. Chirichirtam wach arang pzapanichtampa, tárangiya. 12 Amb mangin sheeru taachpa; ichingaru kxoonachpa. Wanus waanitam yusiyku, ashiru taachpa, tárangiya. Sheeru anoo Apanll kis naparangu, Kizpurcha wanasiri, mang tárangiya. 13 Anush tuchparini zar tapitaranll ashirangiya.
Putamsha tarasitaranllu, Apanll ipunpunarinsha zar tinarangiya
14-16 Apanll tárangiya; Tsapoom tuwasineemaam zareewa wayachima. Waani kanindap zar, tsup, tsangach ashiru taachpa. Zar waani kaschireem 'sineemaam taachpa. Tsupsha psaanaam 'sineemaam achim taachpa, mang tárangiya. Ashkachu, tputssha: Na zar tatsameenlltanda, táchpasinaya. Na in tsup tatsumamaam waritayanlltanda. Kanusamaamtam tatsameenlltanda. Na in masach amb ashtachinipa, tputs ayam ántanchinaya, tárangu, Apanll anoom zareewa wayarangiya. Ashchiri ztaru kanindamand tsapurunasish tuwasineemaam wayarangiya. 17-18 Apanll napku, Kizpurcha wanasiri, mang tárangiya. 19 Anush ipunpunarini zar tapitaranll mang ashirangiya.
Putamsha tarasitaranllu, Apanll zameetpatashsha zar tinarangiya
20 Ashiriya, Apanll waani kayupcheewaa kungush taaratartanllpa. Kpurangamashsha waani yuwar mangamangtanllpa. 21-22 Kungushuch waani watareew taaratartanllpa, tárangiya. Sheeru napku, kungush kayupich kuringkuringtangat, yuwarsha nap ashku, ichingaru kpurangamash mangarurtangat ashirangiya. Apanllsha naparangu, Kizpurcha wanasiri, tárangiya. Waani kungushuch kpukchu, kayupchirtatam ichingaroom tsapurunas pzapanintanllpa. Zamizsha waani wayangchirtatam ituwartakchu zamzeem pzapanintanlltampa ichingaroom tsapurnasi, tárangiya Apanlli. 23 Anush zar zameetpatarini tapitaranll mang ashirangiya.
Putamsha tarasitaranllu, Apanll minamtarinsha matayaru zar tinarangiya
24 Apanll tárangiya; Waanitam maachi kayustaneew tsapush taachpa. Chinuzeetssha waani tputs ksutku taachpa. Mishat, tsapumun pshiyrataru an waanitam taachtampa, tárangiya. 25 Sheeru Apanll napku, Kizpurcha wanasiri, tárangiya.
26 Maacheetsi tinamaam iwatsparamchu, anush Apanll mangush chinarangu, Na tputseemsha yaana tamapari ashiritam tinayani, tárangiya. Waamari tputsimari kurak tamapari ashiru ichingaroo kasiru taachiya. Kungushcheetstamta, manginshucheetstam, chinuzee chinutarich anootstam, misha tsapush pshiyrataru anootstam tputsimari kasiru taachiya. Waamari tputs mangurir kasikastachpa, tárangiya Apanlli. 27 Tárangu, tputseemshat tinarangiya. Chtaru kamuzaatsima tinarangu, anumunshat wipunasheemsha kizaatssha tinarangitamta.* Yuwaa nish átu anootstam Márkosa 10.6 tayusima kamankiya. Waana tamapari ashtamaru mang' kapung tinarangiya. 28 Tinaramchu, tputsee tárangiya; Mangis kis taangtsa. Aranginasha iparis pzapaneengtsa. Tsapurnasish ashchiri shuneeyarus tatsitangtsa. Sheerus, siyamari ichingaroo kasitssa, tárangiya. 29 Táyaru, arangeem yusur kamachtarangiya. Manginshucheetstam wanus ktungangtsa. Mishat, wanuseetstam wach katungchitamsa. Mishat, tsapushtam yutataru anootstam katungchitamsa, tárangiya. 30 Ashiriya, zamzeetssha manginaa wanus katungku taachiya, misha tsiripcheetstam karutaa wach katungkusin taachinllinaya, tárangiya Apanlli.
31 Ashiriya, Apanlli amb ashiramchu, napku, Ichingaru kizpurcha wanasirinanda, tárangiya. Anush, minamtarini matayaru zar tapitaranllu, tinamaam iwatsparangiya. Putam tarasitaranll mang ashirangiya.