3
1 Ashiri na Israelchichis, yuwis Apanll siyaa Ijiptop tsap tashitungarangu anis mazinantsa. 2 Apanll siyaa Israelchicheetsis átcha.
Siyaatsimari nish tsapurunas ipusarangina.
Piyartachee tputs nda ipusarangina.
Ashirucha, yuwamand yutaritshishee chinarangis, anumand,
¿Mayaamsa siy ashirangsa? tápi turi, zandkina.
3 Itaru, siy nuwapa nda kis ipunaksa.
Tputs waanpata wanasir tsiyateerandsin,
ngootsish ipuneerandsin, kis naantach ashtaranaya.
Siysa nda nuwapa ashiksa,
Apanll siyaa átcha.
4 Mishat, napa: tumuz manginash puu átar ashtaru, an wazamari pachindku,
nuwaanitari katungpi átu átariya, ashiritam Apanllsha siyaa pachindkitamta.
Wipsha nguranazush tanuntar ashtaru, an maachtaa wanutsee katungpi átu, átariya.
5 Tsiripichsha purangataranllu, ¿antaati mangutari tsapush pantsatareeja? nda.
Tputs tutsangkayaru, anush pshtukamchu, pantsatariya.
Tutsangamsha, ¿antaati mangutari pzku ashtareeja? nduni.
Tsiripich pshtukamchu ashtariya.
Apanllsha siyaa yutaritshishimandis tutsangachpaz ashkitamta.
6 Tsangampansha tputs wakarash pup puu táyachu, tputssha anoo mazinakchusin,
Papcha. Tputs pachamaam naanllpa, atusin,
tapachindamaam uru k'chirpungoo yáyarusin, napataranll ashtariya.
Mishat, ¿antaati yaktash kapung yutarit tushiyku, an mangutari ashtar? nduni.
Apanll zangankachu ashtariya.
7 Itaru, Apanll siyaa ateeja.
Nuwshat tputsee wanimaam zandkachuri,
uru tputsireetsi kamanimapani wasina kamankina.
Anoo tsiyatsis kapung punimaam waritariya.
8 ¿Chakaja yuwaa tumuz puu átaru, anoo nda punima yasaru taayach?
Mishat, nuw tputsireetsi kamanipanee,
Natu nuwaa kuki kamaningcha, tákchuri,
kamanipansha uru kamanchiya.
Gadamaam wanindaja, Apanll átcha.
Ashirucha, nuw Amosi ashiritam siyaa waneekuri, punikus, kaapa kitsis mazinangtsa, nuw siyaa Israelchicheetsis atashina.
Apanll Samariyashchee tputs wanichu anoo kamanchintspa
9 Ashiriya, Apanll siyaa Samariyashcheetsis ateeja. Mazinangtsa. Asdodshuchis yuwis kurakash pang' taakis anis, misha Ijiptoshchis pangus kizpur wanasirish taakis antamtis Apanllee kuk mazinangtsa. Naanints. Samariyap napangtsa. ¿Kamaparee anush pangatssa? Waj, tputssha waanpatatin kiyung yachakana. Kizpur yutarit taakana. Napeerus, waneengtsa.
10 Nuw Israelchichee atina. Siy nda wanasirimshee chinamaam zandkus, shuchimangazimarisha kizpur chinaksa. Amb ashkus, yuwaatsimarisha shuchikis anootsimarisha pangishis wanasirimshish wayaksa.
11 Ashiriya, yuwamand amb ashirangis anumand Apanll siyaa átcha. Samariyashchi undarar ashchiri taturpiyaru, sundaroom pang' patumbichpa tinarangis, anoo zuramptari kapeetchinllinaya. Pangishis yuwash maachi wayataris anush kurimunazsha kasachiya.
12 Nuw siyaa atina. Tputs opeejaa chinuru, tumuzsha zapi átu, kamuu ashkatu, anoo waanasha nda sambaytaku, watsimsha, nduntaatiya ashiru witsimsha itutstariya. Ashiritam nuw siyaa Samariyashchis itutskachuri, kamungatssa. Siy watam Damáskush yakat maashish kizpur kurakurtaru anush maamaw ashiksawa.
13 Na kaapaniri mazinatssa. Nuw kizpur Apanlleeruri siyaa atashina. Akoparinchich ¿tamaru taarangana? Siysa anoo yasayarus, nuwaa kamaningandama. 14 Nuwaa kamankus, musásiri Israelchichee anumand, ¿Mayaamsa siy ashirangsa? tápi turi, zandkina. Waanamandari yutaritshishirini wanichima. Anshurtatam zar Betelshuch opeejaa muchimaam kayatarangana, anoo witspatari ichuychakchuri, tsapumun xanaramchu kasachima. 15 Anush tsimbunataati pangis taaru, anoo kapeetchina. Yuwash zarpas maa ashkis, misha sinapas ksanitaru kis taakis anootstam kapeetchima. Mishat, tputs kurikpan pangoom kizpur wanasir patumbich mburshimashpa kurakurtaru pangurangana anootstam tunupeeruri, kasachima, Apanll siyaa átcha.
Ashiriya, siy Samariyashuchis yuwaa Apanll siyaa wanichu anoo chinangtsa, atashina.