1 Ashiri Apanllsha yusur Jonasaa tsiyatarangiya. Kamachtaku tárangiya. 2 Naayarush, yaktap Ninipi kamanishini, yuwaa nuw kamachtayanlli anootsi, tárangiya.

3-4 Ashiri Jonassha tayuyaru, Ayu, táyaranllu, yaktap Ninipip naatarangiya. Yuwari Apanll waana kamachtayaru, anuri naatarangiya. An yakat kapungumuncha. Ashchiri napamaam tuchip zar waritarangiya. Itaru, Jonassha anush yakat pshturangu, minamari zar naayaru, anush apusanand kapung tsiyatku tárangiya. Apanll mikeeru waneekchu, nimun 40 maats izuuru kachingchiya, tárangiya.

5 Ashiri tputssha kurakaw, misha tiptsirtam ichingaru Apanllee mangoonaranganaya. Sheersin, izuuru tachitaranganaya. Ashiri mang' mantsaksin, Apanlleem manguyani atusin, wamar kuchariwaa kamartaranganaya. 6 Ashiri tsiyatsissha Ninipshuchish urkar kusarangiya. Uwsha kurakush pang' shitungeeru, wamaree wanasirimshee yusheeru, wamar kuchartamsha kamartayaru, tsapushtamsha kuxinarangiya. 7 Anumunsha, kurak wipunashee kamachtaku tárangiya. Na nimun ktungintspa pakchiyama. Mishat, wakaraamtam maritarintspa. Kungootstam yasintspa, kurak tsiyatku tárangiya. 8 Tputs siyaa pamaam ichingurus kamaris kuchar kamartangtsa. Anamun tputs siyaa yasamaama yuwaa mangis mantsakis anootsi. Sheerus, izuuru mangiptis Apanllee mashangtsa, yutaritshishireetsis tachingamaama. Yuwaa mantsir chinakis anoo zurampatari ksangtsa. Tputspatatis yutarit waratkis anootstam ksangtsa. 9 Wapaz Apanll iyaa mapiykchu, misha watsiyun zambazakchu, itaru ashkachinaari chiy tsipacheezich ndambari, kurak tárangiya.

10 Ashirucha, Apanllsha yuwaa ashkana anoo parangu, izuuru mapiyrangiya. Ndusha tputsee wanimaam zandarangiya.

Ashiriya, kamaneena yuwaa Jonasarini Ninipishuchee Apanllee kuk kamanirangu anootsi.