Apaa, shiyamaricha minamaritish Apanllish. Arangeem Apanll wanindaja. Shiy msasee, mishat arangeem kanindaatstam, tsangacheetstam tinarangsha. Mishat, tsapootstam, tsapurunaseetstam maachiri tinarangitamsha. Mishat, mus kapungu, maree shaana tinayarush, maacheetsisha marish kung wayarangush, shaana ichingaroo ksutaksha. Sheerush, taárasheem shaantatam panaksha. Ashirucha, ichingarusin tsangach shiyaa ungirtakanaya.

7 Apaa, shiy Taarashipantishcha. Shiy shaana Apramaa chinarangush, tputsireemish ipusirangsha. Apramaa tsiyatarangush: Kaldewshuchee tputs ksangi. Urush yakat shitungeerush, nuwash tachitandama, tárangush, uwsha shiyash tachitarangiya. Sheerush, Apramaa, sur Aprahamsha yásamarangsha. 8 Shiy Aprahamaa mang' natstarangush; Nuwamun kapung mang' tatkiya. Nuwaa chinakiya, tárangush, ashiriya, Aprahamaa tsiyatarangush; Nee tsap, Kanaanshuchee tsap, shiyachcheem watsapunoom panachima. Hititshucheetstam, Amorrewshucheetstam Feresewshucheetstam, Jebusewshucheetstam, Gergesewshucheetstam, ashparita tputs watsapun shiyachcheem panachima, tárangasha. Tárangush, shaana k'keetsish, Apaa, izuuru tuminurangsha. Shiy urutari k'keetsish tatsamooksha. 9 Ashiriya, iy zitaminarini Ijiptosh tsap taarangsin, kapung kiyung kachiykana, anoo parangush, shiysha nayanirangush, ichingaroo tapachindarangsha. Mishat, punirustarangusin, mar chumbeepimun wing shiyaa kuruzurangsin, shiysha mazinarangush, istarangsha. 10 Parawaa, mishat tiptsireetstam ichingaru tsiyantarangush; ¿Wanipaja Israelchichee natsakana? tárangush, Ijiptoshchee kapung waneerangsha. Tputsee kapung tpuxtarangush, shiyaa puniranganaya. Wandari na in zar shiyaa waneeshish nda mbizakanaya. 11 Mishat, shiy maree kung apusanand tpatangayarush, tsap puzarangu, tsapunumunsha arachich Israelchich kitaranganaya. Itaru, Ijiptoshuchsha wasundurur, yuw Israelchichee pachamaam tachitarangana, anshtisin izuuru anshurisha ashpartisin kungush yangaranganaya. Patumbich tamapari ashirusin, marish kung imurish pantsarangusin, yangaranganaya. 12 Sheerush, shaana Israelchichee machirangsha. Kaschir naamaam msasee íwar kanindap wayarangush, anoo msasee parangusin, anshuri tachitaranganaya. Mishat, psaansha naamaam msas sumas tamapari ashiru kurakurtaru, ngootsee tuwasineeru wayarangsha.

13 Mishat, shiy Sinayush mach karuweerush, íwar kanindap tputsee tsiyatarangsha. Itsinsaru taamaam kamachtarangsha. Shaanaatsi chinashish tayaspatarangsha. Kamachtamareetsish wanasirimshee kamachtarangitamsha. 14 Sábadoshsha zari kanusamaam, misha shiyapa ipunamaam wayarangsha. Sheerush, Móysisarinee; Nuwaa kuki tputseem yandangcha, tárangush, Móysisarinsha shiyaa kamachtamareetsish ichinguru kirakamun yandarangu, tputsee tayapstarangiya. 15 Mishat, tputs mariz kayatkusin, shaana pangaa kanindamand zanganirangsha, nda marizimun kiyung kachiyamaama. Kungootstam patumbchish wayarangsha, nda sachisimun kiyung kachiymaama. Sheerush, Kanaanush tsap kusarangsin, shiysha; Natu, naangints. Tputsee pachayarus, kasiyarus, watsapunee tsapuneemis yángtsa. Nuw siyaam tsapuneemis panachintspa, tárangsha.

16 Itaru, iysha zitaminarini, shiyaa kukish payumaam ngataranganaya. Nda shiyamun mang' tatumaam zandarangsin, waanamuntarisha mang' taturanganaya. Izuuru shiyaa kukish kapeetaranganaya. 17 Shiy zapantaa istarangush, itaru ashiritaa, pakchiyam anoo nda chinamaam zandaranganaya. Waanpatatin tsiyatarangsin; Min kurakaam ipuseeni, iyaa wapitam Ijiptop tsap machimaama, táranganaya. Ijiptoshuch tputs kiyung yacharangitaatssin ashtaa, kanapeeni, táranganaya.

Itaru, shiysha Apaa, kchinamsheerush, nda tsiyantarangush, tputsireetsish nda kasarangsha. Kapung chinarangush, nayanirangsha. Nda kapeetamaam zandarangsha. 18 Wakaraa orpat tinayarusin, In watacha iy apanllirini, yuw iyaa Ijiptosh tsap tashitungarangu anu, tárangitaatssin, shiyaa kapunguri tayutaritarangitaatssin, 19 shiysha Apaa, kchinamsheerush, upusap ambiri tsipamaam nda wayarangsha. Kaschir naamaam msas ashiru mzeetar ashirangu, mishat psaantam naamaam sumas ashiru kurakurtar ashirangu, ngootsush nda masatamaama wayarangsha. 20 Arangeem Apaa, uwaatssin kapung chinarangush, shaanaatsi kanish wanasirimshee mangoo p'tsimaam wayarangitamsha. Mishat, watungasheemtam manátam uru zanganirangsha, nda marizimun kiyung kachiymaama. Mishat, kungootstam panarangsha, nda sachisimun kiyung kachiymaama. 21 Ashirangush, 40 masach upusap xirangana. Anush nda katungats tputseem pishtarangiya. Ichingaru zar katungaranganaya. Mishat, wamartam nda kucharanganaya. Mishat, araptaa xirangusin, nda watsitam manaranganaya. 22 Ashiri Apaa, shiy tputsireetsish tuwizpurtarangush, kurakaa zapan tiptsirpatari kasirangusin, watsapuneem panarangsha. Ashirangush, tputsireemish waamatawari watsapun panat panat ashirangsha. Mishat, kurakaa Sihona kasirangusin, watsapunee, Hesbona sura, shiy itutsirangsha. Mishat, kurakaa Oga kasirangitamtish anootstam watsapun, Basan sura, itutsirangitamsha. 23 Ashiri, shiy aranginasha istarangush, wip izapaneeranganaya. Aship tsangachi wip izapaneerangana.

Shiy sirútama zitaminarinee; Kanaanaa tsap siyaam tsapuneemis panachintspa, tárangush, 24 wipsha Kanaanaa tsap waamatam itutsiranganaya. Kanaanshuchsha kurak waanaatsi tapachindamaam, tiptsireetstam tapachindamaam pinasaranganaya. Shiy Apaa, iyashcheem tputs ichingaru waamari kasimaam wayarangsha. 25 Yakat kapungtaa, wasundurur zapantaa taarangu, iyashuch pshturangusin, waamari kasirangusin, anoo yakat yarangusin, anush uwshtisin ksutaranganaya. Pangusish maachi kizpur wanasireew tatsitama anootstam itutseerangsin, waamatari yaranganaya. Posootstam, kizarunaatstam, olivootstam, mishat tatsumim yuw wanus zapaneewa anootstam waamatari yaranganaya.

Ashirangsin, kis katungkusin tazazartaranganaya. Wanuts kapunguranganaya. Shiy kizpur wanasiri istarangush, mang' ksaksin zamangaranganaya. 26 Itaru, ambtaa ashirangush, shiyaa kukish payumaam nda zandkusin, kapeetaranganaya. Shiy shaanaatsi kukish kamanimapanee zanganirangush, uwshtisin tputsee; ¿Mayaamsha Apanllee kasarangsa? Yusur Apanllee kuk chinayarus, payungints, tárangitaatssin, itaru tputssha mazinamaam nda zandarangsin, kamanimapanee pacharanganaya. Ashirangsin, shiyaa kapunguri tatsiyuntaranganaya. 27 Ashirucha, shiysha; Waani undarar kiyung yachanll, átush, zanganirangush, tputsireetsish undarar kiyung yacharanganaya. Kiyung kachiykatssin, anush shiyaa, Apaa, Istanda, táranganaya. Ashiri shiysha kchinamsheerush, kanindamand mazinarangush, tputsee tapachindampani zanganirangsha.

28 Ashiri shiy istarangush, tputssha wanasiritaa taarangsin, yusursha shiyaa tayutaritarangitamsinaya. Ashirucha, shiysha tsiyantarangush yusur; Waani undarar kasipana, átush nda istarangush, undarar waamaritin kasiranganaya. Anush yusursha waantatamsin, shiyaa tapachindamaam masharanganaya. Shiysha nayanimpaneerush, íwartaa kanindamand mazinarangush, tapachindampanee zanganta, yusur zanganta ashirangsha. 29 Shiy; Nuwaa kuki payupana, átush waneerangitaatish, itaru uwshtisin; Yuw yaana zandkini an wanasircha, atusin, nda shiyaa kukish payumaam zandakusin, ngataranganaya.

Apaa, waanari tputs shiyaa kukish payukinaareesinaya, urutamari taachiya. Itaru, uwshtisin shiyaa kapung ngataranganaya. 30 Ashiri shiy zapan masach yutaritshishirineetsi kasapana, átush, kutarangitaatish, wizpurireetsish tputsireemish mang' p'tsimaam wayarangitaatish, mishat shaanaatsi kukish kamanimapan zanganirangtaatish, ashiritaa shiyaa kukish nda mazinaranganaya. Ashirucha, shiysha tsiyantayarush, undarari izuuru kasimaam wayarangsha. Undararsha tputsireetsish minup tsap machku, minup tsap machku ashiranganaya. 31 Itaru Apaa, shiy ashirangtaatish, nda watstamari tpachingarangsha. Kchinamsheerush, uru tputsireetsish chinarangush, nda kasarangsha.

32 Ashiri Apaa, na iy shiyaa yasaktanicha. Shiy kizpurtishcha. Apaa, shiy tsiyantakitaatish, itaru ashiritaa, shaanaatsi kukish nda kapeetkush, uru tatsamooksha. Tputsireetsish urutamari chinaksha. Shiy tputsirish kiyung kachiykusin, shiysha anoo nda mapiyksha.

Asiriyshuch kurak iyashchee waanpee watsapun machirangu, iyashuchsha kapung kiyung kachiyarangana. Iy kurakarini, apanllpaneewtam, shiyaa kukish kamanimapaniwtam, zitaminarini ichingarusin kapung kiyung kachiyranganaya. Itaru shiysha Apaa, nda kchimarishtish naparangsha. Uru mangish mantsarangush, iyaa ksutarangsha. Na in zari iy wandaritam kiyung kachiykaniya. 33 Kiyung kachiykini an, Apaa, iyaanamandari yutaritshishirini ashkiniya. Nda shiy msangeerush waneerangsha. Shiy iyaa uru istamaam zandarangitaatish, k'keetsish uru payurangitaatish, itaru iycha kizpur yutaritarangani. 34 Iy kurakarini, misha apanllpantam, zitaminatam shiyaa kukish nda payuranganaya. Shiyaa kamachtamarish nda tuminaranganaya. Waneerangitaatish, ashtaa mazinamaam ngataranganaya. 35 Kurakshitisin, shiyaa ungirtamaam ngatarangitamsinaya. Shiy kapungtaa istarangush, tsapoo kapungootstaa kizpur wanasirimshee panarangush, maachee zapantaa panarangush, ashtaa shiyaa chinamaam nda zandaranganaya. Yutaritshishirineetsini nda kasamaam zandaranganaya.

36 Na iyaa, Apaa, napangcha. Minshuch tputs kurak muchchur ashiru taakaniya. Shiy nee tsapoo zitaminarineemani panarangush; Siysa nish kis taangtsa, tárangush, 37 itaru iysha tatsumarini zapantaa yusiku, nllitaritsha tputs urkari katungchinllinaya. Yaanamandari yutaritshishirini kurak iyaa kasimaam wayarangsha. Uwsha yuw waana zandku an iyaa ashkanaya. Wakarareetstamani putayarusin, yamakanaya. Ashirucha, Apaa, iy kiyung kachiykuni taakaniya.

38 Ashiri na nimun iy ichingaruni shiyaatsimarisha chinamaam zandkiniya. Shiyaa kukish izuuru payuchiniya. Amb ashiru chinaranguni, kirakamun yandaranginiya. Kurak, mishat Leviychichtam, apanllpantam ichingaruni, kirakamun surini yandam chka sheeruni firmashtarangini. Ashiri na shiyaa, Apaa, mbizamaam wanindaja. Ashiriya, na wappari Apaa,