1 Pablo, Silas jadya tatse yudijidya judirunuca jucuare Derbe, Listra jadyaju. Listrajutu anicuare Jesús queja ecatyatique Timoteo bacani. Tuja ecuaquetu israelita jucuare, Jesús queja ecatyatiquedya. Tuja etataque bacue israelita ama jucuare, griego. 2 Listraju, Iconioju cuanaque Jesús queja ecatyati cuanaratu jida quisarati acuare Timoteoja ishu. 3 Pabloratu Timoteo tuque tajiqui datse dujucara acuare. Jadya ama buchatu Timoteo ecuita huitu biti catubumeretima jucuare, tuja etataque israelita ama jucuare tibu. Tumetu tuna tsehue cuama jarijudya Pablora tubumerecuare israelita cuanaja bahue. Jadya tujatu amerecuare, tuna cuayaque epuju jetiama israelita cuana anicuare tibu. Tume cuanaratu pana adeba acuare Timoteo griego jabacuaque. 4 Jadya juatsutu Pablo, Silas, Timoteo jadya Listraju jetiama epu cuana eque cuetiajecuare. Isaracuare tunajatu quirica Jerusalén eque cuadishayaque ecatyati cuanaja huaraji cuana, emuiba cuanaque patya netitsu. 5 Tumetu Jesús queja ecatyati cuanaque cabahuityatiajecuaredya jutidya Yusu pureamatura. Umanaajecuaredya jutidyatu Jesús queja ecatyati cuanaque.

6 Yusuja Espirituratu Pablo, Silas, Timoteo jadya cuejamerecarama acuare quisarati Asia yahuaju. Jadya tibu tuna cuacuare Frigia, Galacia jadyaju camadya. 7 Junaticuare tuna Misia yahua jiruru. Bitinia yahuaju tuna cuacara datse jucuare. Jadya ama bucha tuna Jesúsja Espiritura tuhua cuejamerecarama acuare. 8 Tume tuna tuyu cueti Misia eque jucuare. Junaticuare ecana ebute Troas bacaniju epuju. 9 Tuhuatu Pablora tahuiju bucha bacuare ecuita netiyaju. Tumequetu jecuare Macedonia juque.

—Carequeticue Macedoniaju. Tsahuaticue ecuana, —jadya tujatu Pablo acuare tahuiju.

10 Tume patya ique Lucas tuhuadya jucuare Pablo tsehue Troasju. Yume cabajejetidya ecuana jucuare Macedoniaju cuaishu, Pablo jadya tahui juhuaju. Pana caadebati ecuana jucuare Yusura cuitadya ecuana tuhua cuadishayaque jidaque quisarati Jesús eje buchique cueja ishu.

11 Cuinanacuare ecuana Troas juque cuaba ebari eque. Tume tuyu cuau ecuana jucuare ecububu ebari Samotracia bacaniju. Peya huecaca ecuana judirucuare Neápolis epuju. 12 Tuequedya ecuana Filiposju cuacuare. Tuhuatu anicuare jetiama ecuita cuana epu ebari Roma juque ejueti cuanaque. Filipos tu epu dyaque aridaque jucuare Macedonia yahuaju. Tuhua ecuana tsunuda huecaca ama netinaticuare. 13 Canajara huecacaju ecuana cuacuare cueri jiruru queja israelita cuana Yusu tsehue quisarati bahueju. Tuhua ecuana tuna tsehue caradaticuare. Eje uma epuna cuanatu tuhua ecaradati jucuare. Cuejacuare ecana ecuanara jidaque quisarati Jesús eje buchique. 14 Tuhuatu anicuare epuna Lidia bacani. Tuquetu jucuare Tiatiraju aniyaque. Tumeque epunatu ejutuqui sehuesahuau tsuje aridaque catyati puji jucuare. Yusu muiquitu jucuare. Quisarati bahuetu jucuare Yusu tsehue. Bacacuare tujatu jida inime tsehue Pablora cuejayaque, Yusura pana bacamere aya tibu. Pana baca aatsutu Jesús queja catyaticuare. 15 Cutsamereticuare tuque, Jesús queja catyatihua jadique ejitaju juishu. Tumebaedya tuja etareju cuanaque cutsamereticuaredya. Jadya juatsu tura ecuana amena bacacuare:

—Micuanara ni ique Ecuana Cuatsashaqui queja ecatyatique ejeneya, nenubicue rehua ecue etareju, —jadya tura ecuana acuare.

Tura jadya ahuaju ecuana tuja etareju anibacacuare Filiposju anibacacuare jari tupu.

16 Ecuana Filiposju jarira tuque ecuana epuna ehue ebari ijahua cuanara quijahuatishayaque banaticuare. Ecuita cuana Yusu tsehue quisarati bahueju cuayara tuque ecuana banaticuare. Tumeque ijahuaja casa equetu tuja casa anicuare eje bucha judadiyaque cueja ishu. Tura chipiru inayaquetu tuque metse cuanaja ishu jucuare, tuque metsequique jucuare tibu. 17 Tumeque epuna ehue ebarira ecuana tupujudya aajecuare. Quiqueajecuaretu ecuana tupuju:

—Riyaque ecuita cuana rena Yusu merequi cuanaque. Yusu barepaju aniyaque renajari mereya. Ecuana Yusu queja eje bucha judirue juishuque quisarati cuejaqui cuana rena, —jadyatu epuna ehue ebari jebuda quiqueajecuare.

18 Jadyatu tumeque epuna dutya huecacadya jutidya jucuare. Amenatu Pablo ecahuaiti jipenee cuita jucuare. Jadya bacahuillatsu tujatu tibene bajiyu acuare epuna ehue ebari. Tume tujatu ijahua acuare:

—Jesúsja ebacaniju mique jadya aya. Tumeque epuna quejaque cuinanacue; jacacue tumeque epuna.

Pablora jadya cuinanashayajutu ijahuara pana jaca acuare. 19 Tumeque epuna ijahuara jacahua baatsutu epuna ehue ebari metse cuanaque dyaque cahuaiticuare Pablo, Silas jadya tsehue.

—Amena tujatu cuejanime ama eje bucha judadiyaque, tumeque ijahuara jacahua tibu. Amena tujatu chipiru inajacahua ecuanaja ishu, —jadya tunajatu inime tupucuare.

Jadya juhuaju tunajatu Pablo, Silas ecatse inamerecuare. Inameretsu tunajatu ecatse dujumerecuare ecuita cuana tarepe jubahueju huaraji cuana queja. 20 Inime bajeje puji cuana queja tunajatu bamereticuare.

—Riyaque ecuita ecatse ri israelita ecatse. Retserari bape bape inime tupumereya ecuanaja epuju cuanaque. 21 Tatsera ecuana bahuityacara aya tatseja bahuequedya jutidya. Tuyu ama tu ecuana peya yahuaju cuanaja bahue eque juishu. Tatsera amereya eque ecuana jutaqui ama, ecuana ecuana Roma juque enaruquira cuatsashaya eque camadya juya, —jadya tunajatu ecana acuare.

22 Tume tuna dutya tuhua jucuare cuanaque dyaque cahuaiticuare Pablo, Silas jadya tsehue. Tume tatse huaraji cuanara tacamerecuare tatsera jutuyaque. Tacameretsu tunajatu ecatse catsa catsa amerecuare acui tsehue. 23 Catsa amena au jadya aatsu tunajatu ecatse ishamerecuare etare apudaju.

—Pana naru bacue ecatse neacue ecuinanauju, —jadya tunajatu etare apuda naruquique cuatsashacuare.

24 Jadya bacatsu tujatu ecatse nudyacuare yuqueja educuju cuita. Tume tujatu ecatse pana calla cuita ehuachi ecatse acuare cepoju, tatse ehuanauju.

25 Metapatyatu Pablo, Silas ecatse Yusu tsehue quisaraticuare. Jerucuare ecatse jida pureama tsehue Yusuja ishu. Tume peya cuana etare apudaju netiya cuanara tatse bacacuare jeruyaju. 26 Tatse jadya juyajutu muya jutidya yahua bucucucuare. Dutya etare apudaquetu bucucucuare dudu cuana, esipi cuanaque jadya. Pacashatanacuare dutya eteriqui cuana. Eisha cuanaque risiqui ea cuanaquetu pana tibitanatere jucuare. 27 Jadya juyajutu etare apuda naruquique cabaticuare. Cabatitsu tujatu bacuare eteriqui cuana epacashatanatere. Jadya baatsu tujatu inacuare tuja cuchiru cuerudaque tuta taca quiyeti juishu. Quiyeticaratu jucuare, etare apudaju eisha cuanaque huanaterehua bucha baatsu. 28 Amena quiyeticara cuita juyajutu Pablo jebuda quiquecuare:

—¡Quiyetiume! Riyadya ecuana dutyadya. Ni ejeque buchique ecuana huanahua ama, —jadya tujatu acuare.

29 Tumetu etare apuda naruquira ude bacacuare. Ude tyahuajutu ude inatsu nubiticuare. Tsajaja nubititu jucuare Pablo, Silas jadya queja. Tadadaya jadyatu jucuare bajida juatsu. Nuyucuaretu tatseja yacuaju. 30 Jadya juatsu tujatu ecatse dujucuare etare apuda juque. Tuja etarejudya tujatu ecatse dujucuare.

—Tata ecatse, ¿eje bucha ejuu Yusu queja judiru ishu? —jadya tujatu ecatse bacaduracuare.

31 —Yusu queja judiru ishu Ecuana Cuatsashaqui Jesús queja catyaticue dutya micue etareju aniya cuana tsehue, —jadya tatsejatu cuejacuare.

32 Cuejacuare tatsejatu tumeque ecuita Jesúsja quisarati, tumebaedya tuja etareju aniya cuanaque jadya. 33 Arepa metapatya juya ama bucha tatse etare apuda naruquira cuinanaqueretsu utsacuare acui tsehue catsacatsa ayaque pucucushahua cuanaque. Tuhua dutya tuja etareju aniya cuana tsehuetu cutsamereticuare, Jesús queja catyatihuaque jadique ejitaju juishu. 34 Jadya juatsu tujatu ecatse nubiquerenucacuare Pablo, Silas jadya tuja etareju, tatse mihua ishu. Tuja etareju cuana tsehuetu pureama jucuare, Jesús queja catyatihua cabatitsu.

35 Huecacatsu apudajudya cuitatu huaraji cuanara cuadishacuare sudaru cuana etare apuda naruqui queja.

—Inajacacue jeeque beta ecuita ecatse. Cuinanashacue ecatse etare apuda juque, —jadya tunajatu ecana cuejamerecuare. 36 Sudaru cuanaratu cuejaticuare etare apuda naruquique huaraji cuanara cuejamerehuaque. Jadya cuejamerehuaju tujatu Pablo, Silas jadya cuejaticuare:

—Huaraji cuanara cuadishahua metse inajacamere ishu. Necuinanacue amena. Yusura nenarucue metse eju judiruyaju, —jadya tujatu ecatse aticuare.

37 Pablotu etehua inajacatacarama jucuare. Tume tujatu sudaru cuana cuejacuare:

—Jida yatse nebacue. Romaju cuanaque ebau bucha bae yatse neaacue, quirica yatseja tuhuaque enaruquija ehueneque aniya tibu. Roma juque enaruquira cuatsashaya equedya yatse juya. Dutyara petayaju yatse catsacatsa atanachine. Tunara yatse inime cuana bajejequi cuanaja yacuaju quicueneti ishu emajaca tyachine ama. Yuneridya ni yatse inime metse, inime metse ama jadique baecuaque tunara yatse etare apudaju ishamerechine. Iyacua tunara yatse etehua inajacamere acara aya. ¡Jadya tuna jutaqui ama! Huaraji cuitadyatu jetaqui yatse dutyaja yatucaju inajacana ishu, —jadyatu Pablora sudaru cuana atsacuare.

38 Jadya atsayajutu sudaru cuana masadama yudijidya dirunuca jucuare huaraji cuana queja. Cuejadirucuare tunajatu ecana Pablora quisarati ahuaque.

—Tumeque ecuita ecatseja patu aniya quirica cuana enaruqui Roma juque ebacani equiyatique. Tura cuatsashaya equedyapa tatse juya, —jadya tunajatu ecana cuejadirucuare.

Huaraji cuanatu dyaque bajida jucuare, tatseja quirica cuana enaruqui dyaque aridaque Romajuja ebacani ehueneque aniya jadya bacatsu. 39 Tume tuna cuacuare etare apudaju. Canerecatiticuare tuna Pablo, Silas ecatse queja tatseja ecana nerecaba ishu:

—Nenerecabacue ecuana. Ecuana jucha metse jadya neaume, —jadya tunajatu ecatse aticuare.

Cuinanashaticuare tunajatu ecatse etare apuda juque.

—Necuinanacue riyaque epu ebari juque, —jadya tunajatu ecatse acuare.

40 Etare apuda juque cuinanatsu tatse cuacuare Lidiaja etareju. Tuhua tatse quisaratiticuare Jesús queja ecatyati cuana tsehue. Casaturaticuare tatsejatu ecana. Tuna casaturadiru jadya juatsu tatse dirucuare epu juque.