1 Jadya juatsutu Jesús junenicuare Galilea yahua epu cuanaju. Israelita cuanaja huaraji cuana tuque iyecara jucuare cuanaque tuna Judeaju jucuare. Jadya tibudyatu tuqueja junenicarama jucuare. 2 Israelita cuanaja chine ebaritu piji dyane jucuare. Riyaque chine juya tupu ecuana erere cuana catitsu tuhua ani bahue jucuare, ecuanaja baba cuana erere cuanaju béru anianinicuareque adebayaque. 3 Tuatsehuequi cuanaratu Jesús acuare:

—Rehua aniume. Judea yahuaju dirucue; Jerusalénju dirucue chine ishu. Tuhuatu jetiama micue quisarati bacacara juya cuanaque. Tuhua adirucue Yusuja casa tsehue ni ejeque ecuitaja ataquique ama, tunaja dyadi mira aya cuanaque baishu. 4 Jetiamaja eadeba jucara juyaratu etehua bamere ama aya tuja casa. Jadya ejuuque tunajatu aya eje buchadya dutyara petayaju acara. Mira ecuanaja baishu ejeque ecuitaja ataquique ama aya tibu, acuedya jetiama ecuitaja yacuaju, —jadyatu tuatsehuequi cuanara acuare, tuque ijaribayaque.

5 Tuatsehuequi cuanaquetu tuaqueja catyatima jari jucuare. Ejeque ecuitaja ataquique ama aishuque camadya bucha tunajatu inime jucuare.

6 —Huecaca rique ecue juetima jari ecue casa dutya ecuita bamere ishuque. Micuanara camadyatu eau eje tupudya jutidya micuanara ai acara ayaque. Jerusalénju cuacara juatsu, micuana cuayadya. 7 Yusuja ama cuanaquetu micuana tsehue cahuaitiya ama. Eatsehue bacue ecana dyaque cahuaitiya, era tuna jidama aniyaque cuejajacaya amaju. Jadya tibu tunara ique ujeu baya. 8 Necuacue micuana Jerusalénju chine jutayaju. Ique cuaya ama jari. Juetima jaritu huecaca tuhua ique casa cabameretiyaque, —jadya tuna Jesúsra acuare.

9 Tuque jadya au jadya juatsutu tuatsehuequi cuanaque Jerusalénju cuacuare. Jesús bacue ejetsunue cuita ama Galileaju aninucacuare.

10 Eje uma huecaca tuatsehuequi cuanaque chine ishu cuahuaju amatu Jesús cuacuaredya. Batayaju amatu cuacuare, etehua cuau jipenee. 11 Israelita cuanaja huaraji cuanaratu Jesús ujeu baatsu sarecuare. Chinera cuahua cuanaque ducu tunajatu bacaduranicuare:

—¿Bahua amami Jesús? —jadya tunajatu ecana bacaduranicuare.

12 Tuhua jucuare cuanaque tuna Jesúsja ishu quisaraticuare. Etehua quisarati jipenee tuna jucuare.

—Jesús tu dyaque jidaque, —jadya tuna umae jucuare.

—Aijama, jidaque ama tume. Pusha pusha aridaque tume, —jadyatu jucuare peya cuana.

13 Arepa ecana jetiama Jesúsja ishu quisaratiya ama bucha, ejitaju cuita ama tunajatu quisarati acuare israelita huaraji cuanara ebacauju, tunara Jesúsja ishu jida quisarati ayaju bacatsu enerecaturauju caadebatitsu.

14 Amena chine patya patya dyane, chine terehuietu Jesús nubiticuare Yusuja etareju. Nubitsutu catibuticuare tuhua cuanaque bahuitya. 15 Israelita cuanaja huaraji cuanatu tuque jadya bacatsu anajacatacuare.

—¿Eje bucha juatsu jatsu ri riyaque dyaque inime adebabada cuita? Tuque taa tu ecuana cabahuityatihua bucha ama cabahuityatihua. Tujatu ecuita cuana bahuityataqui ama, —jadya tunajatu ecana acuare tuhua anibareya cuanaque.

16 Jesúsra tuna quemitsacuare:

—Ecue casa tsehue camadya ama tuque ecuita cuana bahuityaya, Ique Cuadishaquija casa tsehue. 17 Ecue Etata Yusura cuatsashaya eque juya cuanaque tuna bahue ique Yusuja inime eque quisaratiyaque, ai ecue inime ama. 18 Aniyatu umae tunaja inime equedya jutidya ecuita cuana bahuitya juya cuanaque, Yusura casa tyaya tsehue ama. Tume cuanaque tuna jadya juya muita ishu cuita camadya. Peya cuana bacue jadya ama. Yusu Tuna Cuadishaquija casa tsehue tunajatu ecana bahuityaya. Tuja cuanaque tuna jadya juya Yusu muimere ishu, tunadya jutidya camuimereti ishu ama. Tuna tuna yuneri quisaratiya. Tunaratu ni ejeque ijahue aya ama.

19 “Moisesratu huenecuare micuana dutya tuja cacuatsashati eque ani ishu datse. Jadya ama bucha micuana ni ejequedya jutidya tume cuanaque cacuatsashati eque cuita aniya. ¿Eje bucha juatsu jatsu micuanara iyecara aya? —jadya tuna Jesúsra acuare.

20 Jetiama Yusuja etareju jucuare cuanaratu bacacuare Jesús jadya quisaratiyaju.

—Miquemi equijahuatique jutidya. ¿Aira jatsumi iyecara aya? —jadya tunajatu acuare.

21 Jesúsra tuna acuare:

—Icuene tuque ecue bamere pidya achine casa canajara huecacaju, ujejedaque chachanetsu. Ique jadya juya baatsu micuana eatsehue cahuaitichine, canajara huecacaju mere juhua baatsu. 22 Béru tuna Moisésra deca nana ebacua cuana ecuita huitu biti catibutishacuare cuinana huecaca catsurutihuaju, achaacha eque israelita jadique adebataqui juishu. Riyaque cacuatsashati aijama jarijutu ecuanaja baba cuana ecuita huitu biti catubuti bahuedya jucuare. Arepa canajara huecaca ama bucha, tuque micuana ebacua nana cuana ecuita huitu tubutaqui tumeque huecaca, cuinana huecaca catsurutiyaju. 23 Canajara huecacaju micuana jubahuedya jadya, Moisésra cuatsashahua eque ama ejuu tibu. Micuana tumeque huecaca jadya juya tibu, ¿eje bucha juatsu jatsu micuana eatsehue cahuaitiya era ujejedaque canajara huecacaju chachanechine baatsu? Micuanara ique aya iquepa Moisésja cacuatsashati eque ama juya jadya. 24 Masadama ejeque misida neaume pana bau amaque yuneridya tumeque inime metseque baecuaque. ‘Jidamatu juhua’ jadya neaume ejeque baatsudya jutidya. Cajuchatiya bucha datse ni tuque micuana ebau cajuchatiyaque ama. Micuanara ni ejeque jidama juya jadya aya, pana bahue nejucue yuneridya tumeque jidama juhuaque, —jadya tuna Jesúsra acuare.

25 Tumetu umae Jerusalénju cuanaque tuna cama quisaratitibunecuare:

—¿Jeequedya ama ri ecuanaja huaraji cuanara iyecara ayaque? 26 Nepetacue. Jee di taa junetiya. Ecuita cuana bahuitya juya dutyaja yacuaju. Ni ejeradya jutidya inatsu etare apudaju ishaya. ¿Cacuaretihua ni taa tu inime ecuanaja huaraji cuana? ¿Chamacama ni taa tunajatu ejenehua tumeque ecuita yuneridya Mesiasque? 27 Riyaque taa ri eje bucha jue juma Mesías. Bahuedya ecuana riyaque ejuque jehuaque. Mesías neritu muya jutidya junabuque. Ni ejeque buchiquetu bahue jubuque ama ejuque junayaque, —jadya tuna jucuare.

28 Jesúsra tuna bahuityacuare jari Yusuja etareju. Tuna quisaratiyaque bacatsutu etsuri jebuda tsehue quisaraticuare:

—Micuanajatu inime juya ique adebaya bucha. Bahue bucha micuana cabatiya ique ejuque jecuareque. Cuji micuana juya. Ecue inime taca eque camadya ama jecuare, Ique Cuadishaquija inime eque. Tuquetu pusha pusha baecua; dutya tura quisarati ayaquetu ejenetaqui. Adebaya ama tuque micuanara. 29 Era camadyatu pana adeba aya, ique tuaquejaquedya jecuare tibu, tura ique cuadishacuare tibu, —jadya tuna Jesúsra acuare.

30 “Yusuja Ecuadishaquedya ique” jadya quisarati aya bacatsu tuna cahuaiticuare. Inatsu tunara tibene risi acara acuare. Jadya ama bucha ni ejeradya jutidya inacuare, eje uma huecaca tunaja tuque ina ishuque huecaca anicuare jari tibu. 31 Umaeratu ejenecuare tuque Mesiasque.

—Ebacadya tuque ecuanaja Mesías neri junatsu patu abuque ni ejeque ecuitaja ataquique ama Yusuja casa bamere ishu jadique. Jesúsra ecuitaja ataquique ama aya tibu, jutaquiju taa tu yuneri cuitadya tumeque Yusuja Ecuadishaque, —jadya tuna jucuare.

32 Fariseo cuanara tuna jetiama, Jesúspa yuneridya Mesías neri jadya juyaju bacacuare. Jadya bacatsu tuna cuacuare pae cuanaja huaraji cuana tsehue quisaratira. Dutyara tupu inime bajejetsu tunajatu ihuaracuare Yusuja etare naruqui cuanaque.

—Neinaticue Jesús, —jadya tunajatu ecana acuare.

33 Tuna tumeque inime bajeje juya tuputu Jesúsra ecuita cuana cuejaajecuaredya jutidya:

—Ejetsunue cuita ama micuana tsehue aninucaya. Masadama dirunucaya Ique Cuadishaqui queja. 34 Sareya datse micuanara ique. Banucaya ama micuanara ique. Eju ique judiruyaju micuana judirutaqui ama, —jadya tuna Jesúsra acuare.

35 —¿Eju jatsuri riyaque ediruu ecuanaja daditaquima baishu? ¿Ecuanaja ata cuana peya yahua cuana aniyaju ni taa ri dirucara juya? ¿Israelita cuana griego cuana ducuque ni taa ri anisicuaya? ¿Bahuityacaradya ni taa tujatu aya tumebaedya israelita ama cuanaque dyadi? 36 Ecuanara patu sarebuque. Banucaya amapa tuque ecuanara. Ecuanapa ecuana judirutaqui ama eju tuque judiruyaju. Etehua buchique tume. Adebaya ama tuque ecuanara, —jadyatu israelita cuanaja huaraji cuana tuna camadya jutidya jubarecuare.

37 Jesústu ecuita cuana tsehue quisaratinucacuare. Amena ishuque chine huecacatu jucuare, huecaca dyaque muidaque. Netitsuratsutu Jesús quisaraticuare:

—Eaqueja necatyaticue, micuana majunuca baecua anicara juya cuanaque. Nejecue eaqueja, ijicaraque espereju ebutetiu bucha. 38 Ehuene tu Yusuja quisarati: “Eaqueja catyatiya cuanaque tuna eiyacuane juya terenuca baecua ani ishu. Tuna ducudyatu jubuque ena cani ticu baecua buchique”, —jadya tuna Jesúsra acuare.

39 Jadya cuajayaque tuna Jesúsra cuejacuare; Yusuja Espiritujatu jacanime ama Jesús queja catyatiya cuanaque. Ena cani ticu baecuaque bucha, jadidyatu Yusuja Espirituja jaca baecua juya Jesús queja catyatiya cuanaque. Jadyatu Jesús jucuare, Yusuja Espíritu riyaque yahuaju junama jariju. Junataqui ama jaritu jucuare, Jesús Yusuja yacuaju muita ishu judirunucama jari tibu.

40 Jesús jadya quisaratiyaju bacatsutu tuhua jucuare cuanara bape bape inime tupucuare Jesúsja ishu.

—Pusha ama cuitadya riyaquedya ri Yusu equeque quisarati cuejaquique. Mesías junabuque cuejaquiquedya tume, —jadyatu umae jucuare.

41 —Tuque ama tume, —jadyatu peya cuana jucuare.

—Tuquetu Mesías cuitadya.

Peya cuana bacue jadya jucuare:

—Aijama, tuque ama tu Mesías. ¡Eje bucha jadya jue ni tu juma! Tuque Galilea juque junahua tibu, eje bucha jue ni tu Mesías juma. Mesías neritu Galilea juque ama junabuque. 42 Yusuja quisarati ehuene equetu Mesías David eque ejuracanaque jubuque. Belénjutu cuinanabuque, ecuanaja ebaba David emuique anicuare epu juque, —jadya tuna jubarecuare.

43 Tumetu ecuita cuanaja juticuare amadya inime Jesús eje buchique. Caquemitsati caquemitsati jutidya ecana jucuare tuna cama. 44 Umae cuanaratu inacara acuare. Jadya ama bucha ni ejera inacuare.

45 Yusuja etare naruqui cuanaque tuna Jesusmadya judirunucacuare fariseo cuana queja, pae cuana queja jadya. Jesús dujuya ama baatsu, tunajatu ecana bacaduratsacuare:

—¿Eje bucha juatsu jatsu tuque micuana betihua ama?

46 Enaruqui cuanara tuna quemitsacuare:

—Dyaque jida ecuana bacahua tura quisarati cuana cuejayaque. Aijama tu peya, tuque bucha dyaque jida quisaratiyaque, —jadya tunajatu ecana acuare.

47 —¿Micuana dyadi tura micuana ijahuedya ahua? 48 Huaraji emuita cuanaque tuna tuaqueja catyatihua ama ni ejeque. Ni ejequedya jutidya ecuana fariseo cuana tuaqueja catyatihua ama. 49 Ecuita jetiedya cuanaque cuita camadya tuna tuaqueja catyatihua. Jadya tuna juya, ecuanaja cacuatsashati pana adeba aya ama tibu. Tuna tuna aishuque ama. Yusura tuna nerecaturabuque, —jadyatu jucuare israelita cuanaja huaraji cuana.

50 Tuhuatu jucuare fariseo Nicodemo bacani. Tudyatu Jesús tsehue chineju quisaratira cuacuareque jucuare. Isaracuare tujatu fariseo cuana tuja ecare cuana:

51 —Dutyara tuque ecuana pana adeba aya ecuanaja cacuatsashati. Tumeque cacuatsashati eque tu tuyu ama ejeque jucha metse aishu, tumeque ecuita tsehue cuitadya quisaratimaque. Pana bahue ecuana jutaqui yuneridya tume jidama juchine jadya atayaque jidama juchineque. Jutaquiju “Jidamami juchine”, jadya amaquedya Jesús, neihuarara ecuanaja yacuaju tuque cuita quisaratisha ishu, —jadya tuna Nicodemora acuare.

52 Tunaratu acuare:

—Mira taa tu inime tupuya Galileaju cuanara inime tupuya baedya. Mique taa mi Yusuja quisarati adebayaque ama buchadya quisaratiya, —jadya tunajatu ijaribayaque acuare.

—Jesúspa Yusuja quisarati cuejaquique, jadya tuna juya. Isaracue Yusuja quisarati. Tumeque quisarati eque tu ni ejeque Yusuja quisarati cuejaquique Galilea eque junaya ama, —jadya tunajatu acuare pusha pusha ayaque.

53 Jadya juatsu tuna dirubarecuare tunaja etare cuanaju.