1 'Wii'¹³ joon, tsaru'¹u' 'in 'iin²¹²na, tá² siin'²naa' yaanaa' tyani Ña'ñʉ'¹ʉ'. 'Áa¹mo 'iin²¹²na 'naa' joon 'áa¹mo 'iin²¹²na jǿø²na 'naa'. 'Naa'oo' jmóo²oo' jløø'³na. Joon 'naa' ilíin²naa' lawa corona tyiia mi cwéei¹ Ña'ñʉ'¹ʉ'.

2 Mɨ́³ɨɨ tyani Evodia, la joon jon tyani Síntique wa'a cwosíi¹³mo rǿø² lawa ruu'²¹mo 'in jai'² lɨ́ɨi² Ña'ñʉ'¹ʉ'. 3 Joon 'ñʉ, tsaru'¹u' 'in nijmáa³aa to² caain²¹ coon'¹³ lawa cajmuui¹ joo'²¹ 'íin¹ 'in 'ñúui¹³, mɨ́³ɨɨ tyaní²'i uncoon'¹³'on 'in tsamɨ́² ru'¹u' do. 'Ii gauncoon'¹³o jna cwoo²¹o'o júu³ tyʉ́² tya' Dios tya' 'e tiin'¹³ tsá². Coon²¹ caan²¹mo gacwoo²¹o'o 'e júu³ tyʉ́² do coon'¹³ Clemente coon'¹³ 'in catyaai² do. Joon Dios gataan¹an ni jí² tya'a xiiala sii²¹ jileei'²¹ 'ii.

4 Jmaa²aa' jløø'³naa' tyani Ña'ñʉ'¹ʉ' coon²¹ tǿø²mo. Fo'³oo tún², jløø'³naa' jmáa²aa'. 5 Cwolicwii¹mo tsá² 'naa' 'e 'wo²‑'oo'. Tɨ lɨ cwée¹mo Ña'ñʉ'¹ʉ'.

6 Jo jmaa²aa' cu'²‑'oo' ce jiin'¹³xʉ, lɨ' cɨɨ'¹³ɨ jmaa²aa', mɨ́²ɨɨ' tyani Dios Jmii²¹ tya' jilaa'²¹. Fáa¹³aa' júu³ tyʉ́², cwóo²oo' 'maai'¹³ Dios jon. 7 Tsʉ joon icwo'²o Dios 'naa' 'e seen²naa' tyʉ́² la lɨ 'e seein²¹ 'ña'a. Joon ce jiin'¹³ jaain²¹ tsá² wa ilí² 'øøi'²¹‑tsi jilaa'²¹ 'e tyʉ́² seein²¹ Dios, tsʉ 'e tyʉ́² do 'e fee'¹gɨ 'e jo 'in cwéei¹ 'øøi'²¹‑tsi. Tsʉ 'e tyʉ́² do iun'øøi'¹ almas tyii' coon'¹³ jilaa'²¹ 'e 'ɨ¹‑'oo' tsʉ 'wii'¹³ jai'² lɨ́ɨ²naa' Cristo Jesús.

8 Coon²¹gɨ 'iin²¹²na fuu²¹²uu 'naa', tsaru'¹u', 'í²‑'oo' jilaa'²¹ 'e jai'², joongɨ jilaa'²¹ 'e tyʉ́², coon'¹³ jilaa'²¹ 'e rǿø². Jo 'ɨ¹‑'oo' coon'¹³ jilaa'²¹ 'e un'leei'² tsá² yaai. 'Ͳ‑'oo' jilaa'²¹ 'e 'ya'²gɨ coon'¹³ jilaa'²¹ ifaa'²¹ tsá² 'e tyʉ́². 'Ͳ‑'oo' jiin'¹³ 'e tyʉ́²gɨ coon'¹³ jilaa'²¹ 'e cwóo²oo' 'maai'¹³ Dios.

9 Untɨɨ²naa' yaanaa' jilaa' ga'e'³ee 'naa' joon jmaa²aa'. Jmaa²aa' jilaa'²¹ jiin'¹³ la ganʉ́ʉ²ʉʉ' 'e nifo'³oo coon'¹³ jilaa'²¹ 'e gañí²ii' jmóo³oo. La joon 'in Dios 'in cwo'² 'naa' 'e tyʉ́² seen²naa' ingɨ́¹ caain²¹ coon'¹³ 'naa'.

10 Jløø'³na 'áa¹mo tyani Ña'ñʉ'¹ʉ' mo galiñii² 'e gatɨ'²‑'oo' jna tún¹. Jo 'iin²¹²na fo'³oo 'e ga'ín¹‑'oo' jna pe jo mo gauntyí² fu wa'a 'e uncoon'¹³ 'naa' jna. 11 Jo fuu²¹²uu 'naa' wa' mo 'in tyéen¹³na jmɨɨ²¹². Tsʉ nilɨtɨɨ²¹moo xiiala itaan²¹na juncwii²¹ jløø'³moo coon'¹³ 'e xʉ 'e 'óo³oo. 12 Niñí³oo xiiala lɨ mo tañíi² tsá² la joon jon ñí³oo wa'a mo 'óo³oo sáai²xʉ. Nilɨtɨɨ²¹na xiiala taan²¹na 'e 'yaai²¹‑tsii 'e rǿøi² tu'³uu sɨ 'e un'áa³na 'ee. Jløø'³moo coon²¹ tøø²mo wa'a mo 'óo³xʉʉ la joon jon wa'a mo jo 'ee sá² tyiia. 13 Lí²‑i jmáa³aa doñi'ee tsʉ Jesucristo cwo'²o jna wa'² pí² tyiia. 14 Pe 'naa' 'e tyʉ́² gajmáa²aa' tyiia mo gauncoon'¹³oon' jna coon'¹³ fa'í² 'e seen²na.

15 Joon ñí²oo' 'e jiin'¹³ 'naa' tsá² seein²¹ fuu²¹ Filipos gauncoon'¹³oon' jna mo gajú³uu Macedonia nifu, nicwó³oo júu³ tyʉ́² tya' 'e tiin'¹³ tsá². Jiin'¹³ 'naa'oo' jee²¹² jileei'²¹ 'in nijai'² lɨ́ɨi² Jesucristo gacwóo²oo' jna 'e jmaai¹ to² tyiia tsʉ 'wii'¹³ nicwó³oo júu³ tyʉ́² jee²¹² 'naa' 'e ni'ii'¹³naa'. 16 Tsʉ la 'ɨɨ²¹² 'e taan²¹na fuu²¹ Tesalónica gauncoon'¹³oon' jna cafu lɨ́ɨ¹gɨ tya' jilaa'²¹ 'e tyée¹³na. 17 Jon' wa'a 'ɨ¹‑tsii jiin'¹³ 'e 'ii'¹³na, pe jiin'¹³ 'e 'iin²¹²na 'e lɨ'óo²oo' lɨ́ɨ¹gɨ cwáain¹ tyii' tyani Dios Jmii²¹. 18 Ni'ii'¹³moo jilaa'²¹ ca gasaai²gɨ. Coon'¹³ 'e gasii¹naa' coon'¹³ Epafrodito 'óo³oo 'láai²gɨ. 'E gasii¹naa' do tyiia lɨ́¹ lawa coon²¹ fa'¹ tyani Dios, lawa sʉ́n² jmafuu²¹ 'áai¹. Joon 'yaai²¹‑tsi Dios 'wii'¹³ 'e gauncoon'¹³oon' jna. 19 La joon jon Dios tyiia‑oo icwo'²o 'naa' jilaa'²¹ 'e 'náa²aa'. Icwo'²‑o 'naa' 'e 'náa²aa' 'wii'¹³ Jesucristo tsʉ 'áa¹mo sá² tya'a fu ñʉ'fú² lɨ 'ya'²gɨ 'áai¹. 20 ¡Cwoun'goo²¹o jileei'²¹ tsá² seein²¹ juncwii²¹ Dios Jmii²¹ coon²¹ tøø²mo! Amén.

21 'Aa²¹²mo tsá² fu'²'u 'e fo'³na coon'¹³ la sii²¹ Jesucristo jileei'²¹ 'in jai'² lɨ́ɨi² Dios Jmii²¹. Jileei'²¹ tsaru'¹u' 'in taain²¹² coon'¹³ jna lo sɨɨ¹mo jon 'aa²¹²moo'. 22 La joon jon sɨɨ¹mo 'aa²¹²moo' jileei'²¹ 'in 'iin²¹²in Dios Jmii²¹ 'in jmoo¹o to² inʉʉ tya' tsaa'to² nifu tyíin¹ Roma.

23 Cwouncwaai'³ Ña'ñʉ'¹ʉ' Jesucristo jileei'²¹ 'naa'. Amén.