1 Quie lenaꞌ bide bihuele ta huele defender cuinle lao Diuzi, nutiꞌtezi nacale, chi rnale rue laguedyile tamala, naꞌ leꞌe tu lëbizi ziole ruele cabëꞌ tamala rnale rue laguedyile. Conlë diꞌidzaꞌ rero luꞌu ruꞌale ruluꞌen lëscanꞌ leꞌe nacale benꞌ mala. 2 Neziro ta naca tali rchuguli Diuzi huenëꞌ castigo nu benꞌ rue tamala. 3 Leꞌe rnale rue laguedyile tamala, naꞌ lëbizi ziole ruele tamala, ¿raquele bihue Diuzi leꞌe castigo? 4 ¿Quele aoquixile binezile ga huen dyin yelaꞌ benꞌ huen quie Diuzi? ¿Quele binezile rue Diuzi tahuen quiele rbezëꞌ yetzaꞌle pensari quiele inaole xnezëꞌ? 5 Pero benꞌ yaladyiꞌ nacale, bireꞌenle yetzaꞌle pensari quiele. Quie lenaꞌ huataꞌ castigo huala quiele dza hue Diuzi juicio. Huachugulinëꞌ ta tzuꞌu niꞌa xnezi quiele. 6 Huaguiz̃unëꞌ quie quiero según ca bëro. 7 Hueꞌnëꞌ yelaꞌ neban tuzioli yaca benꞌ biyeyati hue tahuen yugu dza, yaca benꞌ reꞌen gataꞌ yelaꞌ balaꞌana quiejëꞌ lao Diuzi, yaca benꞌ rbeza gataꞌ quieyaquëꞌ ta biyeyudyi yedu. 8 Pero huadzaꞌ Diuzi huenëꞌ castigo yaca benꞌ bireꞌen uzu diꞌidzaꞌ quienëꞌ, yaca benꞌ bireꞌen inao neza li quienëꞌ, yaca benꞌ reꞌen inao neza mala. 9 Yugulu benꞌ rue tamala yedzagalaoyaquëꞌ, huataꞌ tazëdi gula quieyaquëꞌ. Chi benꞌ Israel yedzagalaorayaquëꞌ, pero chi benꞌ tula, lëscanꞌ yedzagalaoyaquëꞌ. 10 Pero yugulu benꞌ rue tahuen, hue Diuzi leyaquëꞌ benꞌ z̃e, cuëchinëꞌ chizi laxtaꞌoyaquëꞌ. Chi benꞌ Israel hueranëꞌ leyaquëꞌ benꞌ z̃era, pero chi benꞌ tula, lëscanꞌ huenëꞌ leyaquëꞌ benꞌ z̃e.

11 Canaꞌ hue Diuzi, porque birue Diuzi natzaꞌla quie yaca benëꞌ, tuzcazi ca ruenëꞌ. 12 Pues yugulu benꞌ rue xquia, pero binezijëꞌ con cabëꞌ rna lëꞌë guichi ley naꞌ pcaꞌn Diuzi lao naꞌa Moisés, huachuguli Diuzi lëjëꞌ, pero bihue Diuzi cuenda con cabëꞌ rna lëꞌë guichi ley naꞌ. Lëscanꞌ yaca benꞌ rue xquia nezijëꞌ con cabëꞌ rna lëꞌë guichi ley naꞌ, huachuguli Diuzi lëjëꞌ huenëꞌ cuenda con cabëꞌ rna lëꞌë guichi ley naꞌ. 13 Birlëꞌë Diuzi benꞌ laxtaꞌo yëri benꞌ ruzënagazi con cabëꞌ rna lëꞌë guichi ley naꞌ, naꞌ biruzunëꞌ diꞌidzaꞌ con cabëꞌ rnan. Rlëꞌë Diuzi benꞌ laxtaꞌo yëri benꞌ ruzënaga con cabëꞌ rna lëꞌë guichi ley naꞌ, naꞌ ruzunëꞌ diꞌidzaꞌ con cabëꞌ nan. 14 Naꞌra quie ja benꞌ binaca benꞌ Israel, cati ruzujëꞌ diꞌidzaꞌ con cabëꞌ rnan lao guichi ley naꞌ, laꞌacazi binezijëꞌ chi de guichi ley pcaꞌn Diuzi lao naꞌa Moisés, lenaꞌ ruluꞌen naca pensari quiejëꞌ conforme con cabëꞌ rnan lëꞌë guichi ley naꞌ. 15 Pues nun quie naojëꞌ neza dyaꞌa, lenaꞌ ruluꞌen yuꞌujëꞌ pensari con cabëꞌ rnan lëꞌë guichi ley quie Diuzi. Ca naca pensari yuꞌujëꞌ, lenaꞌ ruluꞌen quiejëꞌ nezcazijëꞌ ca reꞌen Diuzi huejëꞌ. Cuincazi pensari quiejëꞌ yuꞌujëꞌ rchugulina quiejëꞌ chi ruejëꞌ tahuen, chi ruejëꞌ tamala. 16 Dza hue Diuzi juicio huachugulinëꞌ con cabëꞌ bë yaca benꞌ raque nagachiꞌzi bëjëꞌ binꞌ bëjëꞌ. Lao naꞌa Diuzi huachuguli Jesucristo yaca benëꞌ conforme con cabëꞌ rna diꞌidzaꞌ laꞌiya quienëꞌ. Lëdiꞌidzaꞌ naꞌ rguixoguiꞌa yaca benëꞌ.

17 Pero leꞌe rnale nacale benꞌ Israel. Raquele hueziꞌ Diuzi leꞌe nun quie naole guichi ley pcaꞌn Diuzi lao naꞌa Moisés. Ruele dzalo inale nacale benꞌ quie Diuzi. 18 Nezile ca reꞌen Diuzi hue yaca benëꞌ. Lëscanꞌ rsëdile con cabëꞌ rna lëꞌë guichi ley quie Diuzi ta inezile bi huele huele tadyaꞌa. 19 Raquele rioñeꞌele, bidzebile uzioñeꞌele benꞌ birioñeꞌe. Raquele dyin quiele uzioñeꞌele benꞌ rda lao lato lao chula. 20 Raquele inezile usëdile yaca benꞌ birioñeꞌe. Raquele inezile uluꞌele yaca benꞌ binenezi con cabëꞌ rna lëꞌë guichi ley pcaꞌn Diuzi lao naꞌa Moisés ga rguixogueꞌn quie yelaꞌ rioñeꞌe len yelaꞌ li quie Diuzi. 21 Chi leꞌe rusëdile benꞌ tula, ¿bixquienꞌ birusëdile cuinle? Chi leꞌe yëbile benëꞌ bireyaꞌalaꞌ cuanle quie benëꞌ, ¿bixquienꞌ rbanle quie benëꞌ? 22 Chi leꞌe yëbile benëꞌ bireyaꞌalaꞌ utilale nigula tula, ¿bixquienꞌ rutilale nigula tula? Chi leꞌe ratzale ilëꞌële yaca ídolo, ¿bixquienꞌ ruꞌule luꞌu idaoꞌ ga rdyia yaca ídolo rbanle ta zacaꞌ ta yuꞌu dumi quieyacan? 23 Ruele dzalo inale tadyaꞌa naca guichi ley pcaꞌn Diuzi lao naꞌa Moisés, pero rutitule Diuzi biruzule diꞌidzaꞌ cabëꞌ diꞌidzaꞌ rnën lëꞌë guichi ley naꞌ. 24 Quie lenaꞌ rna lëꞌë guichi ley naꞌ cani: “Yaca benꞌ binaca benꞌ Israel, rnëbiz̃oyaquëꞌ quie Diuzi, pero dulaꞌ quiele rnajëꞌ canaꞌ.”

25 Talicazi de ga huen dyin uzule tu xëdyidaoꞌ cuinle ca mandado bë Diuzi dza naꞌ, pero solamente chi hue quiele quie guichi ley pcaꞌn Diuzi lao naꞌa Moisés. Porque chi bihue quiele quie guichi ley naꞌ, naꞌ naca quiele ca quie benꞌ bizu xëdyidaoꞌ cuine. 26 Naꞌ chi ruzu benꞌ bizu xëdyidaoꞌ cuine diꞌidzaꞌ quie guichi ley pcaꞌn Diuzi lao naꞌa Moisés, naꞌ hualëꞌë Diuzi lëjëꞌ ca quie benꞌ zu xëdyidaoꞌ cuine. 27 Pues yaca benꞌ bizu xëdyidaoꞌ cuine, pero ruzuyaquëꞌ diꞌidzaꞌ con cabëꞌ rna lëꞌë guichi ley pcaꞌn Diuzi lao naꞌa Moisés, lëjëꞌ huachugulijëꞌ quiele leꞌe, benꞌ biruzu diꞌidzaꞌ con cabëꞌ rnan, laꞌacazi napale leꞌe guichi quie ley, laꞌacazi zu xëdyidaoꞌ cuinle. 28 Binaca dugalo benꞌ Israel yaca benꞌ bëꞌruezi con cabëꞌ rna Diuzi. Lëscanꞌ binaca dugalo benꞌ Israel yaca benꞌ zu xëdyidaoꞌ cuine, pero birue quienëꞌ xtiꞌidzaꞌ Diuzi. 29 Naꞌ naca dugalo benꞌ Israel benꞌ rue quie du guicho du laꞌadyiꞌ ca na Diuzi. Lëscanꞌ cati hue quiero du guicho du laꞌadyiꞌro con cabëꞌ rna Diuzi, lenaꞌ ruluꞌen dugalo nacaro benꞌ zu xëdyidaoꞌ cuinro. Nu benꞌ rue quie con cabëꞌ rna Diuzi, rlëꞌë Diuzi lëbëꞌ benꞌ laxtaꞌo yëri.