Chru I TIMÔTHE 3

Mơnih Apăn-Akŏ Tơrpuơl Goh-Sơc̆ih

1 Ni la pơnuaĭ iơŭ păl păng-gơnừm: Yah aràng sơi khiăng ngă mơnih apăn-akŏ Tơrpuơl Goh-Sơc̆ih, nư̆n la lơkơu-khiăng sa gơnuăr-bruă màng-siàm biă. 2 Yơu nư̆n, mơnih apăn-akŏ păl la mơnih 'buh hũ anih lơi tô puaĭ 'buah jiơ̆ng, la pơsàng mĭn sa aràng sơdiŭ soh, thơu tư̆ng-kơrhia, jak khờh, hũ mơnih pơkơ̆n c̆ơ prŏng-màng, jiăng wă-rò thuai, sơ̆ng khờh pơto-pơsài, 3 'buh rơmbuh-rơmbèng, 'buh mơsak ơmrah, bloh păl lơnguh-lơngui hơlàr-siàm, 'buh tămgeh-tămc̆ồ, sơ̆ng 'buh hàm jền-priă. 4 Mơnih nư̆n păl khờh apăn-akŏ sàng-dơnò drơi, thơu pơto du anà păng-bơbah ngă tui sơ̆ng hũ hơtai-hơtiàn păng-duh. 5 Kơyoa mơnih lơi 'buh thơu c̆ơ apăn-akŏ sàng-dơnò drơi nư̆n ngă hơyơu c̆ơ apăn-akŏ Tơrpuơl Goh-Sơc̆ih Yàng Pô Lơngì jiơ̆ng? 6 Mơnih bơrhơu păng-tui Yàng 'buh hũ ngă mơnih apăn-akŏ Tơrpuơl Goh-Sơc̆ih, huơĭ mơnih nư̆n rơŭ yeh-drơi pơglòng-rùp bloh lĕ-tơma lăm pơnuaĭ ngă glài pioh tơ kơmlài jĭnràk ơu. 7 Mơnih apăn-akŏ Tơrpuơl Goh-Sơc̆ih kŭng păl hũ mơnih agàh ka păng-tui Yàng ngă grơh siàm, tô 'buh kơđòng lĕ tơma lăm pơnuaĭ klau-pơtăt sơ̆ng gạu-pơtơ̆ng kơmlài-jĭnràk.

8 Du mơnih dŏng-bruă Tơrpuơl Goh-Sơc̆ih kŭng păl la mơnih jơnăp-kơđơ̆ng, păl đờm tơpă 'buh đờm lơ̆r, 'buh alak-tơpai mơbŭ-mơbèng, 'buh hàm phơ̆n-priă sơŭ-brơŭ 'buh rĭng-tơpă, 9 bloh păl gàr-rơmiă pơnuaĭ tơrđơŭ-dơrlăm pơnuaĭ păng-tui sơ̆ng sa hơtai-hơtiàn sơc̆ih-goh. 10 Buơl guñu kŭng păl hũ lòng-c̆ơ dơlhơu, yah 'buh hũ hơgĕ păl puaĭ 'buah nư̆n ka hũ ngă mơnih dŏng-bruă Tơrpuơl Goh-Sơc̆ih.

11 Du mơnih kơmơi * kŭng yơu nư̆n rơi, păl la mơnih điaŭ-kơđơ̆ng, 'buh đờm bơrlơi sơdia, thơu tư̆ng-kơrhia, sơ̆ng tơpă sa hơtai-hơtiàn lăm abih tơgrơ̆ bruă. 12 Du mơnih dŏng-bruă Tơrpuơl Goh-Sơc̆ih păl la mơnih mĭn sa aràng sơdiŭ sa aràng pơsàng soh, păl khờh apăn-akŏ du anà sơ̆ng sàng-dơnò drơi. 13 Kơyoa du mơnih ngă siàm gơnuăr-bruă dŏng-bruă drơi rơŭ hũ aràng c̆ơ prŏng-màng, sơ̆ng hũ hĭl-pràn lăm pơnuaĭ păng-tui anih Yàng Jêsu Krist.

Pơnuaĭ Tơrđơŭ-Dơrlăm Mư̆ng Hơtai-Hơtiàn Păng-Duh

14 Kơu lơkơu-khiăng sơmăr truh c̆uă-rơwăng anà, bloh sơđaŭ wă du pơnuaĭ ni, 15 tô yah kơu hũ suơi truh, nư̆n gơnừm tơ bơ-àr pơyoa ni anà rơŭ thơu păl ngă hơyơu lăm sàng Yàng Pô Lơngì, nư̆n la Tơrpuơl Goh-Sơc̆ih Yàng Pô Lơngì hơdiŭ mĭt-mĭt, gơ̆ng-jơmư̆ng sơ̆ng rơnơ̆ pơnuaĭ-tơpă. 16 Biă yơu nư̆n, pơnuaĭ tơrđơŭ-dơrlăm mư̆ng jơlàn păng-tui Yàng la prŏng biă:

Pô hũ ràng-tơbiă lăm rùp-phàp drah-rơlo,

Hũ Bơngă Sơc̆ih-Sri angăn la rĭng-tơpă,

Hũ du mơnih gơdrưh c̆ơ 'buh,

Hũ pơto-akhàn tơkrah du buơl làng agàh,

Hũ tơgrơ̆ mơnih păng-tui đồ-mă,

Hũ rò đì lăm pơnuaĭ màng-kơc̆rà.

*3:11 3:11 Du mơnih kơmơi: la đờm mư̆ng sơdiŭ du mơnih dŏng-bruă Tơrpuơl Goh-Sơc̆ih, sơ̆ng hũ rơgơi kŭng đờm mư̆ng du mơnih kơmơi dŏng-bruă Tơrpuơl Goh-Sơc̆ih rơi.