Salmos sb'i jun libro tic, syalelc'ochi to tz'och b'it yed' juntzan̈ yamc'ab' yic b'it ay sch'an̈al. Yuj chi' icha chi' ix sb'iejcan jun libro tic. Himnario yaji, slibroal pax lesal yaji. Tzijtum eb' anima tz'ib'jinac jun libro tic, najtil tiempo yic'nac yic tz'ib'chajnac chi'.

C'ojanc'olal ajnac yil-lan sb'a juntzan̈ b'it chi'. Axo ix aji a' sc'an eb' israel yic sb'itan eb' ayic tz'och eb' ejmelal d'a Dios. Axo yic ix b'eyn̈ej tiempo, ix och yed' juntzan̈xo libro ojtacab'il yuj eb' israel to a slolonel Dios tz'ib'ab'il d'ay.

A jun libro Salmo tic ch'occh'oc tastac ay d'ay: Ay b'it, ay aloj vach' lolonel d'a Dios, ay lesal yuj sc'anchaj scolval Dios, ay lesal yuj sc'anchaj nivanc'olal, ay b'it yic ac'oj yuj diosal yuj svach'c'olal Dios, ay pax lesal yuj sc'anchaj yaelal d'a yib'an̈ eb' ajc'ool. A juntzan̈ lesal tic ay b'aj junn̈ej mach slesalvi yuj tas snib'ej d'a yol yico', ay pax juntzan̈xo lesal yuj eb' schon̈ab' Dios.

Ix yac' b'inaj jun libro Salmo tic Jesús. Tzijtum b'aj sb'inaj d'a yol ch'an̈ Nuevo Testamento. Sc'annac pax jun libro tic eb' b'ab'el creyente ayic sb'itan eb' d'a sculto, ayic yelnac yich Iglesia.

A jun libro tic oye' macan̈ yaji: B'ab'el macan̈, tz'el yich d'a Salmo 1 masanto d'a 41. Schab'il macan̈, tz'el yich d'a Salmo 42 masanto d'a 72. Yoxil macan̈, tz'el yich d'a Salmo 73 masanto d'a 89. Schan̈il macan̈, tz'el yich d'a Salmo 90 masanto d'a 106. Yoil macan̈, tz'el yich d'a Salmo 107 masanto d'a 150, aton d'a tic slajvican jun libro tic.