1 Wech, chi niwi' go nzho tu men che'n Jesukrist xid go, no ngwaga' xa' mile' xa' tu kwa'n nayi' par lo Dios, orze', rë go xa' más nzho Sprit che'n Dios laxto', bidi'zhnu go xa', no goknu go xa' par zo xa' wen lo Dios; per chul bidi'zh go lo xa', no mis go bikina go go par nazak go nela lë' xa'. 2 Goknu go rë guchin go lo rë kwa'n nizak xa', nes par le' go rë widi'zh kwa'n nak ley che'n Krist.

3 No chi nzho tu xa' nile' xigab, lë' xa' más tsak xid go, no chi niyent kwan nak xa' xid go; lo mis lë' xa' kikide xa'. 4 Kad men naki'n wi' xa', xmod naban xa' lo Dios, no chi kile' ka xa' kwa'n nzhakla Dios, orze' ñal ka zak laxto' xa' por lë'i; per nachë'lalt xa' xa' kun xtu men, par nagab xa' nabei cho más wen kile'. 5 Kad men, lë' men wane xmod nak men lo Dios.

6 Xa' kwa'n kitse'd widi'zh nazhon che'n Dios, naki'n gaknu xa' men kwa'n kilu' widi'zh che'n Dios lo xa', kun che'p rë kwa'n kinu xa'.

7 Nala't go kide men go, porke yent cho gak kide Dios: Rë ta' tu kwa'n nzha'n men, no or nikan xa'i, más nayaxe nikan xa', mbaino mis lë' skai. 8 Kuze', rë xa' kwa'n nile' rë xigab kwa'n nzhakla kwerp che'n xa', por rë xigab ba' namás lë' xa' gat lo Dios; no rë xa' kwa'n nile' rë kwa'n nzhakla Sprit che'n Dios, por lë'i lë' xa' ban par dubta' lo Dios. 9 Gat ñalt yazha be, le' be kwa'n nzhakla Dios, dub tiemp naban be, porke lë' Dios ne' tu kwa'n wen ka' be, or zhin zhë ne' Dios kwa'n gal be. 10 Kuze', zilita' kwa'n gak le' be, le' be kwa'n wen kun rë men, per galo laka kun rë men che'n Jesukrist le' bei.

11 Biwi' go, letr kwa'n mikë'n lo go, letr roi, no mis na mikë'i. 12 Rë xa' kwa'n kiki'l go, par kë señ kwerp che'n go kwa'n lë circuncisión, kile' bixa'i namás par ya'n bixa' wen kun rë men; sa' nile' bixa' par nagab men Israel, nu bixa' ñila, ngut Jesukrist lo krus por rë men. 13 No lë' bixa', ter nikë' señ bixa', per gat nile't bixa' kwa'n nzobni' lo ley; per nzhakla bixa' kë señ kwerp che'n go, namás par di'zh bixa' lo men, lë' go nak men che'n bixa'. 14 Per nase, ni tu kwa'n gat nzhaklata' yët da wen. Nabtsa kwa'n nzhaklan di'zh men, lë' da ñila, ngut Jesukrist lo krus, Me kwa'n nile' mandad da. No por kure', rë kwa'n nzho yizhyuo re', lë'i ngut la lo krus por da, no haxta na ngut la da par yizhyuo re'. 15 No par rë be, xa' nak tutsa kun Jesukrist, nawi't be chi nikë señ be, o gat nikëte; par be, kwa'n más tsak nak be xtu men por ñila be Jesukrist. 16 Rë men xa' nzhon rë widi'zh re', mbaino naban xa' loi, kina'ba lo Dios, ya bixa' wen, no lats laxto' Dios bixa', porke rë men xa' naban sa', walika men Israel che'n Dios bixa'.

17 Lult kwa'n kinin, di re' par dilant, ni xtu men gat nzhaklatra' kixian da, porke nikë rë ndi'b kwerp da plo mizakzi rë men da, namás por nak da tu men nguzi' Señor Jesukrist.

18 Rë go wech no bizan, lë' Señor Jesukrist gaknu go kun Sprit che'n Me. Sa' gake.