1 Nzhazhin gax la lani Pask, lë' Jesús nane la, nzhazhin la zhë bi Me yizhyuo re' par yëk ska Me lo Xuz Me. Dub mbi'd Jesús yizhyuo re', kun dub la Me michizhi' Me rë men che'n Me haxta zhë ña Me. 2 Or kiyao xche' Jesús kun rë men che'n Me, ze' nzob Judas Iscariote, xga'n Simón, no lë' Mizhab migoch la yek xa' par chi xa' Jesús lo rë men Israel xa' nak zhi'n. 3 Per lë' Jesús nane la, lë' Xuz Me Dios mila' la rëi ya' Me, no nane Jesús, Dios mixë'l Me, no lë' Me yëk ska lo Dios. 4 Or dub kiyao Jesús lo mes, ngwatsuli Me, orze' ngulo' Me kaxkem che'n Me, no nguzen Me tu lar, mili'b Mei laxto' Me, 5 orze' ngulo Me che'p nits le'n tu chë', nguzublo Me kizët Me ni' rë men che'n Me, no kun lar ze' kitsibizh Me ni' tuga' bixa'. 6 No or mizhin Me lo Simón Per, nzhab Per:

―Lë' go, ¿taxa Go zët ni'n?

7 Orze' nzhab Jesús:

―Nal nanetal kwa'n kilen, per lë'l zobyek ka kwane.

8 Orze' nzhab Per:

―¡Nase lata zët go ni'n!

Per nzhab Jesús:

―Chi lë' Da nazët ni'l, nagaktal men da.

9 Orze' nzhab Simón Per:

―¡Lë' go, nazëta' go nab ni'n, nu ya'n nu yeka bizët go!

10 Orze' nzhab Jesús:

―Rë xa' laore ngoz, gat naki'ntra' gaz xa' xtu wëlt, nab tsa ni' xa' naki'n yët; lë' rë go nambe la, ter gat lë't rë nak goi.

11 Midi'zh Me, gat lë't rë nak bixa' nambe; lë' Me nane la cho chi Me lo rë xa' nile' mandad. 12 No or milox mizët Jesús ni' rë nak men che'n Me, orze' ngok Me kaxkem che'n Me, no nguzobska Me, orze' nzhab Me:

―¿Chi mizobyek go kwan milen kun go? 13 Lë' go nine lon: “Maestr”; mbaino nine go, na nile mandad go; no walika go nak dai. 14 Pwes chi lë'i Da nak Maestr che'n go, mbaino xa' nile' mandad lo go, no dub sba' mizeta ni' go; no se'ska ñal zët go ni' rë men Da. 15 Na milu lo go, xmod ñal le' go, par nu go le' kwa'n milen. 16 Go nane ka, yent cho tu mos nado más tsak xa' lo xa' nguzi' xa'; mbaino ni tu xa' ña mandad natsakt más lo xa' nixë'l xa'. 17 Chi lë' go zobyek kure', mbaino le' goi, dox wen ya go.

18 ’Gabt go por rë go kidizha kure'; na nili'be' ka rë xa' ngulen, per naki'n gak widi'zh kwa'n nzobni' lo Yech che'n Dios por Da: “Men nzhao kun na, men ze' niyi' nine da.” 19 Kure' nin lo go, lë'ga' naga gak rë kure', nes par or gake, orze' yila go, na nak xa' nzhapa nak da. 20 Walika kwa'n nin lo go, xa' le' wen lo men Da, lon mile' xa'i; mbaino xa' le' wen lon, lo Xuza mile' xa'i, Me mixë'l da.

21 No or milox midi'zh Jesús kure', dox niwin laxto' Me, no tuli nzhab Mei:

―Walika kwa'n nin lo go, mis tu rë go re', chi da lo rë xa' nile' mandad.

22 Orze' nguzublo niwi' rë men che'n Jesús lo wech bixa', per nanet bixa' par cho yek nzha kure'. 23 No tu rë men che'n Jesús, xa' dox nichë'l Me kun lë', nzob kiyao gax ta' Me, 24 orze' milu' Simón Per tu señ lo xa' re', par na'bdi'zh xa' re' lo Jesús, cho ka xa' ze', 25 orze' nguzubi xa' re' xche'p gax ta' Jesús, par nzhab xa':

―Lë' go, ¿cho ka xa' ze' ga'?

26 Orze' nzhab Jesús:

―Lë'da gazh tlë' pan, no zane ka' xa', xa' ze'i orze'.

Orze' migazh Jesús tlë' pan, no miza' Mei nka' Judas, xga'n Simón Iscariote. 27 No or milox ndao Judas tu bok pan re', orze' nguio Mizhab laxto' xa', kuze' nzhab Jesús lo Judas:

―Kwa'n nile'l xigab le'l, bile'i tuli.

28 Per ni tu rë men che'n Jesús, xa' nzhin kiyao xche' ze', nangazobyekt bixa', chon midi'zh Jesús lo Judas se', 29 no por lë' Judas nak xa' niguchao' dimi, kuze' mile' zipla bixa' xigab, pas nzhab Jesús, zi' Judas más kwa'n gao bixa' par zhë lani, o ki'z xa' dimi ka' rë men prob, 30 no or milox ndao Judas bok pan re', tuli nguro' xa', no yë'l la orze'.

31 No or nguro' la Judas, orze' nzhab Jesús lo más rë men che'n Me, xa' mia'n ze':

―Mizhin zhë, rulo yalnazhon kwa'n kinu Xga'n Dios, Me nu nak tu men yizhyuo; mbaino por Xga'n Dios, rulo yalnazhon che'n Dios, 32 no chi lë' Xga'n Dios lu' xmod nak yalnazhon che'n Dios, nu ska Dios lu' xmod nak yalnazhon che'n Xga'n Me; no lu' Mei tuli. 33 Rë xmë'da, nin lo go, kaxche'ptsa nzon kun go; lë' go kwa'n da, per nela nzhap ka lo rë xa' nile' mandad lo rë men Israel, se'ska nin lo go nal: Nagakt bi go plo bi'n. 34 Lë'da lu xtu mod ban go: Bichizhi' go wech go. Nela xa nazhi' da go ga', se' bichizhi' go tu go kun xtu go. 35 Chi lë' go chizhi' tu go kun xtu go, orze' lë' rë men yizhyuo ne, lë' go nak men da.

36 Orze' mina'bdi'zh Simón Per lo Jesús, nzhab xa':

―Lë' go, ¿plo biu?

―Plo bi'n, ―nzhab Jesús― nagakt yi'dkël ticha nalre', per zhin zhë, lë'l yi'dkë ticha.

37 Orze' nzhab Per:

―Lë' go, ¿chon nagakt yi'dkë'n ticha go nalre'? ¡Wanei kwane lë'da re', ter gat da por go!

38 Orze' nzhab Jesús:

―¿Chi walikal, ter gatal por da? No kwa'n nanen, ni naga kë' gai kant, chon wëlt ka'chal, gabal, nalibe'ta'l da.