1-2 Lachi acola, soquila, seque pano duque tenfe joe. Tsachila natiya seitonque patuto nenano podeimanpari, jera uyan jutsacanan fe loto sen tsachila jonola jonhoe. Tsan josanan, jeralela duque ne seiton quiminlayoe. Junni seque pano duque tenfe jonan, nulari layan micariminla ichi titulajona! Labe uyan micariminlabeca Diosi nanni fe tuca miichunae seque quinanunca o seitonque quinanunca. Nulari yaca numa miralarae.

3 Aman jana caluca tenca calaquede! Calucari freno ponomanhe yaca mantachun. Jun frenochi calu pucaleca nunchi jisa tenjanatiya mantanomanhe. 4 Junsi barcocanan tenca calaquede! Duque jelelen joe. Sonba wuchi jimanhe. Junni barco tumin mantimini napen cutape nacachinan tumanhe nun tala jisa tenjanatiya. 5 Aman chiquilachi fiqui forori jun calu freno cuwenta, o jun barco cutape cuwenta joe. Na nacá jotonan, duque poden joe. Junsi ninca tenca calaquede! Nasiri nin chuditonan, duque chide yucapiyarimanhe. 6 Jun tsanquenan chiquilachi fiqui foro nin cuwenta joe. Duque seiton suwamin joe. Chiquila seiton pacachi jera seiton iminlayoe. Piyanlete numasitiya fiqui foro tsachilaca seiton suwamin joe. Junni yucan patsanan tsanque seiton fiquica pasa carimin joe.

7 Aman ti animalilatiya, pichulatiya, pinilatiya, watsalatiya tsachilabe miimanhe. 8 Aman tencachique fiqui foro mantimini natiya miituchi timanhe. Duque seiton joe. Totemin beneno pun cuwenta joe. 9 Fiqui forochi Apa Diosica seque paminlayoe. Junni tsachila Diosi cuwenta jominlaca jun fiqui forochi yucacuraminlayoe. 10-12 Mancari fiqui forochi nechinan sen fiquicanan, seiton fiquicanan paniquiminla joyoe. Lachi acola, soquila, tsantuntsan joe. Olibo puca ico pelebi ino podeitumanhe. Ico pucanan uba silibi ino podeitumanhe. Tsanban pi bulanaminnan, sen pi manhino podeitumanhe. Jun pi forobinan tsanban pibe sen pibe lotumanhe. Jun tsanquenan chiquilachi fiqui forochi nechi sen fiquibe seiton fiquibe larituntsan joe.

13 Nulari seque tenca tan tsachila jotori, jamiminque pato tencabe nenantsan joe yape tenca tan tsachila jolajoeque miilaisa. 14 ¿Junni nulari niyaque tenca caminlayun? ¿Uyanlaca fe lochique paiminlayun? Ticatiya quino joyoe tinatori, ¿tencachique munateri tsantiminlayun? Tsan jotori, tsarasica tenca tan itolajoe. Junto nene pato, tenca tanyoe titulajona! 15-16 Uyanlaca fe jochi titulajona! Titiya quinato, tencachique munateri quilaquituna! Tsanlaquinatori, jera palaque tenca cato, natiya seitonque nenalarachunae. Diosiri nulachi tsanque tenca cuwatumin joe. Diosichi Tencabe penenatuto, tsachilachi miteri tenca calaquinae. Yucan tsanque tenca cuwamin joe. Tsa tenca tanla itochunae.

17 Aman Diosi tenca cuwanari, seque tenca calaquichunae. Pataalaquituchunae. Jamimin palaquichunae. Uyanla ticatiya panhanasatiya, pailaituchunae. Duque laquiralarachunae. Sen jolajochunae. Fiqui canbiyaituto, tsarasi palaquichunae. Nene palaquituchunae. 18 Aman pataatuminlari uyanla pa tala nenaminlaca manse patarilaquichunae. Tsanque nenatori, seque nenamiyalaquichunae.