Hebreos
Mamabʉinore coyʉiyebu iyoca paperayocare cũinácʉ põecʉ ʉ̃i toivacaino mácarõ ina judíova Jesúre jʉ aivʉ Hebreos ãmicʉrivʉ bácavʉre. Caivʉ majibevʉ ñamene toivacayʉ bácʉre diyocare. Ʉbenita iyede majivʉ: Ñai toivacayʉ bácʉ diyocare jápiabedejaquemavʉ Jesúre, quénora jápiarejaquemavʉ Jesús ʉ̃i yávaiye méne coyʉipõeva mácavʉre (2:3). Ʉ̃i toivacaimara ne cójijinocacʉ ãmenejaquemavʉ (13:7). Copaiyʉrejaquemavʉ ʉ̃i toivacaimara ne yebai (13:19). Pablo bácʉi yóvaimaracacʉ bácʉ barejaquémavʉ (13:23). Italia ãmicʉrijoborõcavʉ Jesúre jʉ aipõeva mácavʉ ne yóvaimʉ marejaquémavʉ (13:24). Obedivʉ majidivʉ ne dápiaiyepe, Apolos bácʉ toivacarejaquemavʉ diyocare (Hch 18:24-28). Apevʉ ne dápiaiyepe, Lucas bácʉ toivacarejaquemavʉ diyocare, diyoca ãrojariyoca boje apeyoca pʉcayoca Lucas bácʉi toivacaiye báquepe. Apevʉ ne dápiaiyepe, Bernabé bácʉ toivacarejaquemavʉ diyocare (Hch 11:22-26, Gá 2:11-21). Ã́ĩmarocavʉ bácavʉre mamarʉmʉre eaiyoca bácarõ diyocare máre, aru ã́ĩmaro ñai toivacayʉ bácʉ ʉ̃i cʉriĩmaro ʉ̃i toivacaiyede diyocare máre caivʉ majibevʉ. Apevʉ “Jerusalén ãmicʉriĩmarocavʉre” arĩ, aru apevʉ “Antioquía ãmicʉriĩmarocavʉre” arĩ, apevʉ “Roma ãmicʉriĩmarocavʉre” arĩ, aru apevʉ “Alejandría ãmicʉriĩmarocavʉre”, arĩ dápiaivʉbu. Toivacarejaquemavʉ Jʉ̃menijicʉi cʉ̃rami Jerusalén ãmicʉriĩmarocad̶ãmi mácarõre churarava ne tʉvarĩ jarʉvarãjiye jipocai, que baru ãniʉjʉ bácarõre 70 d.C. jipocare. Majidivʉ ne dápiaiyepe, toivacarejaquemavʉ ãniʉjʉ bácarõre 66 d.C.
Ñai toivacayʉ bácʉ diyocare toivacarejaquemavʉ ina judíova Jesúre jʉ aivʉ bácavʉre, ne dajocabenajiyepe ayʉ ne jʉ aiyede. Dápiarĩduivʉ barejaquémavʉ oatʉvarãjivʉ, mearore jínajivʉ Jʉ̃menijicʉre yópe ne jíye báquepedeca ne Jesúre jʉ arãjiye jipocare. Toivacarejaquemavʉ coyʉyʉ na mácavʉre yópe ne oatʉvaiyepe majibevʉre, Jʉ̃menijicʉi bojecʉbede d̶aiye báque boje javede, Jesúi yainíburu nacajaiye báquede, ãniñami javecad̶ãmi ʉ̃́re mearore jíñami mácarõre, aru ãnina ʉ̃́re jícaiyede jípõeva, sacerdoteva bácavʉre, aru ãnina ãimara ʉ̃́re jícaimara mácavʉre máre. Aru ʉ̃i bojecʉbede d̶aiyede caiye iyede epedejaquemavʉ Jesúre cũinácʉra majare jícaiyede jíyʉre, aru epedejaquemavʉ Jesúi jivede cũinárora ʉ̃́re jícaiyede, aru epedejaquemavʉ cavarõ mearore cũinárora maje ʉ̃́re mearore jíñamine. Que baru ñai toivacayʉ bácʉ jã́d̶ovarejaquemavʉ Jʉ̃menijicʉ “Que d̶arãjare”, ʉ̃i aino põevare Jesúque mearore ʉ̃i aino mácarõ Moisés bácʉque pʉeno, aru Jesúvacari meacʉ bajure caivʉ Jʉ̃menijicʉre coyʉcaipõeva mácavʉ pʉeno.
1
Jʉ̃menijicʉ ʉ̃i coyʉino mamacʉque põevare
(Mt 22.44; Jn 1.1-3; Col 1.15-17)
1 Javede Jʉ̃menijicʉ ʉ̃i yávaiyede coyʉcaipõeva mácavʉre coyʉicõjenejaquemavʉ. Majeñecuva mácavʉre coyʉrejaquemavʉ. Obedinʉmʉa yávarejaquemavʉ. Apecʉ Jʉ̃menijicʉi yávaiyede coyʉcaipõecʉ apede coyʉrĩ aru apecʉ máre apede, obedivʉ coyʉrejaquemavʉ. Que teni Jʉ̃menijicʉ põevare jã́d̶ovari bʉ́rejaquemavʉ aipe ãrojacʉre. 2 Ʉbenita caride, ijãravʉ bʉojaijãravʉare, maje cʉrijãravʉare, Jesucristoi darĩburu yóbore, Jʉ̃menijicʉ yávarĩ jebeibi majare mamacʉque. Ʉ̃́recabe Jʉ̃menijicʉi cʉed̶aicõjeimʉ mácʉ ijãravʉre aru caiye ijãravʉquede. Ʉ̃́recabe Jʉ̃menijicʉ pʉrʉcʉvaicõjeimʉ mácʉ caiyede, ʉ̃i cʉed̶aquiye jipocamia. 3 Ʉ̃́recabe jã́d̶ovañʉ Jʉ̃menijicʉ meacʉ bajure. Coreóvaivʉbu aipe ãrojacʉre Jʉ̃menijicʉre mamacʉi d̶aiyeque aru ʉ̃i coyʉiyeque máre. Ʉ̃́recabe cũinátʉrʉ jípacʉ Jʉ̃menijicʉque. Ʉ̃́recabe caiyede cʉre d̶ayʉ, ʉ̃i cõjeiyeque, ʉ̃i yávaiye parʉéque, caiye nʉquiyepe ayʉ yópe Jʉ̃menijicʉi ʉrõpe. Ʉ̃́recabe jarʉvayʉ bácʉ maje ãmeina teiyede, Jʉ̃menijicʉi ãrʉmetequiyepe ayʉ diede, maje cʉrãjiyepe ayʉ yópe docʉcʉbevʉpe maje ũmei. Que teniburu yóboi, ʉ̃́recabe dobacʉ bácʉ jípacʉ Jʉ̃menijicʉ parʉcʉ caivʉ pʉeno ʉ̃i meapũravʉi cavarõ mearoi, ʉ̃i cʉvae boje caiye jípacʉi parʉéde ʉ̃́pe, jabotecʉyʉ caiyede. Aru nore cʉbi caride. 4 Jʉ̃menijicʉ mamacʉre parʉre d̶arejaquemavʉ caivʉ ángeleva pʉeno, ʉ̃i jaboteicõjeiyede ʉ̃́re caiyede. Aru quédeca Jʉ̃menijicʉ ãmidorejaquemavʉ mamacʉre “jímacʉ”, jã́d̶ovacʉyʉ ʉ̃́re parʉcʉre ina ángeleva pʉeno.
Jʉ̃menijicʉi mácʉ parʉcʉ caivʉ ángeleva pʉeno
(Mt 22.44; Mr 12.36; Lc 20.42-43)
5 Ácʉ ángele cʉbebi ʉ̃́re, yópe arĩ, Jʉ̃menijicʉi toivaicõjeino mácarõre:
Jímacʉrecabu mʉ. Caride caivʉ ne jápiainoi yʉ́vacari jaboteicõjeivʉ mʉre, arejaquemavʉ Jʉ̃menijicʉ mamacʉre.
Quédeca ácʉ ángele cʉbebi ʉ̃́ra, yópe arĩ, bedióva apeno Jʉ̃menijicʉi toivaicõjeino mácarõre:
Yʉ bacʉyʉ́mu ʉ̃i pacʉ. Aru ʉ̃ macʉyʉ́me jímacʉ, arejaquemavʉ Jʉ̃menijicʉ, ʉ̃i daroquiyede mamacʉre.
6 Aru Jʉ̃menijicʉ ʉ̃i daroquiye jipocamiareca mamacʉ parʉcʉre, caivʉ ne pued̶arãjimʉre, bedióva ijãravʉi, yópe arĩ, coyʉcʉyʉme:
Caivʉ ina ji ángeleva mearore jíjarãri ʉ̃́re, Jʉ̃menijicʉ mamacʉrã acʉyʉme.
7 Que baru ángelevacapũravʉ ne borore yópe arĩ, toivaicõjenejaquemavʉ Jʉ̃menijicʉ:
Jʉ̃menijicʉ ʉ̃i daroimara ángeleva ũmevʉpe paivʉre d̶aibi náre. Náre, ʉ̃́re memecaivʉre, toa uruinope paivʉre d̶aibi ʉ̃, ne nʉ́raiye boje ne memecaiyede ʉ̃́re, arĩ coyʉrejaquemavʉ.
Que arĩ, jã́d̶ovarejaquemavʉ ángeleva oatʉvaivʉre aru dajocaivʉre ne memecaiyede ʉ̃́re. 8 Ʉbenita mamacʉcapũravʉre yópe arĩ, toivaicõjenejaquemavʉ Jʉ̃menijicʉ:
Mʉ, Jʉ̃menijicʉ baju, cainʉmʉa põevare jabotecʉyʉmu mʉ. Mʉ́tamu meacʉ baju. Que baru cainʉmʉa põevare jabotecʉyʉmu mʉ ména. Aru náre mearore d̶are d̶acʉyʉmu yópe mi ʉrõpe. 9 Mearo d̶aiyede d̶aiyʉvʉ mʉ. Cainʉmʉa d̶aivʉ mʉ yópe ji d̶aicõjeiyepe. Aru ãmeno d̶aiyede d̶aiyʉbevʉ mʉ. Cainʉmʉa d̶abevʉ mʉ yópe ji d̶aicõjemepe. Que baru yʉ, Jʉ̃menijicʉ, mi mearore jímʉ, beoivʉ mʉre, caivʉ ne pued̶aimʉ macʉyʉ́re, mi jaboteiyede náre. Yʉ epeivʉ mʉre parʉcʉre caivʉ mi yóvaimara, ina ángeleva pʉeno. Aru mʉre ne pued̶arãjimʉ mae boje pare torojʉre d̶aivʉ yʉ mʉre aru ina ángeleva mi yóvaimarare máre, Jʉ̃menijicʉ arĩ coyʉrejaquemavʉ mamacʉre.
10 Bedióva cojedeca Jʉ̃menijicʉ, yópe arĩ, coyʉrejaquemavʉ mamacʉre:
Mʉ, caivʉ ne jabocʉ yʉ́que, mamarʉmʉre mʉ́vacari cʉed̶arejavʉ̃ yo põevai cʉrijoborõre. Aru mʉ́vacari cʉed̶arejavʉ̃ cavarõre máre. 11 Caiye iye mi cʉed̶aiye báque cũiquíyebu. Ʉbenita mʉ́capũravʉ cainʉmʉa cũimécʉbu. Quénora cʉcʉyʉmu cainʉmʉa. Caiye iye mi cʉed̶aiye báque yópe cuitótecaje javecacajepe pojequiyebu. 12 Yópe põeva ne pẽpejeiyepedeca ne cuitótecaje javecacajede, ne doiyede mamacaje cuitótecajede, nopedeca mʉ́vacari pẽpejene d̶acʉyʉmu caiye mi cʉed̶aiye báquede, mi epeiyede joborõ mamarore aru cavarõ mamarore máre. Yópe põeva ne oatʉvaiyepe ne cuitótecajede, nopedeca mʉ́vacari oatʉvacʉyʉmu caiye mi cʉed̶aiye báquede. Ʉbenita mʉ́capũravʉ oatʉvabecʉbu cainʉmʉa. Bʉcʉtebecʉbu. Aru yaibécʉbu mʉ, arĩ toivaicõjenejaquemavʉ Jʉ̃menijicʉ.
13 Aru ácʉ ángele cʉbebi ʉ̃́re, yópe arĩ, Jʉ̃menijicʉi toivaicõjeino mácarõre:
Dobajacʉ ji meapũravʉi, mi cʉvae boje parʉéde yʉpedeca. Aru yʉ epecʉyʉmu mi mauvare mi cʉboba cãchinoi. Que teni mʉre vainí jarʉvare d̶acʉyʉmu yʉ náre, mi jabotequiyepe ayʉ náre, arĩ coyʉrejaquemavʉ Jʉ̃menijicʉ mamacʉre.
14 Ʉbenita caivʉ ina ángelevacapũravʉ torojʉrivʉ memecaivʉbu Jʉ̃menijicʉre aru mearore jívʉbu ʉ̃́re. Námu Jʉ̃menijicʉi daroimara, põeva ne jã́memara, cad̶atenajivʉ maja ʉ̃i mead̶aimara márajivʉre, cʉvarãjivʉre caiye iye méne Jʉ̃menijicʉi d̶acaquiyede majare.