1 Bapoxonae tan pena itaboco yawano pena irano, tsipei po itaboco copiya ducua yawa po ira copiya ducua aichurubenae, equeicha jopa naitʉtsiyo. Yawano pin mar mene aichurucuae. 2 Xan, pon Juan tsocuaein, tan Nacom pia pepa pexeinya tomara tatsi ichaxota jinompa pomonae peantobewichi Nacom. Barapo tomara pena Jerusalén tomara, po tomara Nacom pia xainya wetsica tatsi pona xua itaboco wetsica. Barapo tomara nacui xaxainchiya weta, icha yabʉyo ichi xua poxonae nacui xaxainchiya weta xua poxonae pecotsiwa perʉ nacoyobina. 3 Jume tan pejume xua peitaboco wetsica jume daunweya jeye: “Taema anoxuae Nacom popona pebiwitha. Nacom barʉ poponaena, bara barapomonae Nacom pijimonae tatsi tsane. Nacom ataya tsitecaeya barʉ poponaena barapomonae penacana exanaexae xua piamonae tatsi pia Nacom tatsi. 4 Barapomonae Nacom itacuere mene canotsina xua pewecoyeixae, xua barapomonae equeicha jopa peatenewa tsane. Equeicha jiwi jopa werapae tsane barapo petʉpae coyenewatha. Mataʉtano jopa pewecoyeinexa tsane, tsipei xua xuan copiya exana po irathe bayatha aichurucuaeya nacaewita”, jei po jume xua itaboco wetsica paeba.

5 Bapon Nacom pon eca pia pexeinya peecaethopaewatha nejei: “Taema daxita exanan xua xuan penawan”, nejei Nacom. Equeicha nejei: “Baxuan tinare, tsipei barapo jumein pexainyei jumein, daxota ichamonae itacʉpatsi xua tana neyabara jume cowʉntsiwa xua bara exanaein pocotsiwa xua taneme”, nejei Nacom.

6 Bapoxonae equeicha nejei: “Bara baxuan bayatha nacui weta. Xan ponxaein apara ataya tsitecaeya tapoponaein xua poxonae aena daxita tamropata pitaban. Mataʉtano bexano ataya tsitecaeya bara tapoponaewa tsane. Po pebin xua bichocono meratsipa xua daxota bara amanaya mera neapatsiwa barapo coyenewa icha be ichin poxonae jiwi yawenan. Pon xua bejʉntʉ coyene jichatsi xua ajʉntʉcoyeneyapusʉ peexanaewatsi bara bapon amanaya catsin peajʉntʉcoyeneyapusʉwa, po peajʉntʉcoyeneyapusʉwa xua ataya tsiteca. 7 Pon xua jʉntʉ coyene amanayaba caurimonae poxonae caurimonae bequein abe exana bapontha, bapon xeinaena pocotsiwa be pentoma pocotsiwa xua bayatha jʉntana jeban bapon. Barapon pia Nacom tatsin tsane yawa barapon apara bara taxanto tsane. 8 Ichitha pomonae pijunuwi jopa nejume cowʉntsiyo xua ichamonae abe peexanaewa tsane barapomonaetha irʉrʉ pomonae jopa benejume cowʉntsiyo, irʉrʉ pomonae peajʉntʉcoyenebewi, irʉrʉ pomonae jiwi pejutebiwi, irʉrʉ pomonae xua penasi cui exanaewi xua peweiweinaewa, irʉrʉ pomonae mara pexeinaewi irʉrʉ pomonae wʉnae pejainchiwi ibo nacom, irʉno pomonae naerabiya pepaebiwi, daxita barapomonae bebai tsainchi isoto pucuatha po pucuatha ichaxota ataya tsitecaeya taxuncua xua bichocono aitareyapusʉ tsuncuae po peitare pewʉn azufre matawʉn. Barapo petʉpae coyenewa apara xua poxonae equeicha jiwi caewa werapaena pomonae pejume cowʉntsiwi”, jei Nacom pon eca pia pexeinya peecaethopaewatha.

9 Bapoxonae matatsunpin patopa pon xua siete poyobe jiwana, po siete poyobe matatsunpiwi xua xeina coroton siete xoyobe xua wʉnba peabe cuiru coyenewan xua bara nama opi ducua pocotsiwa Nacom exanaena. Bapon nejei: “Anetha catsita itʉtsinchi Cordero pecotsiwa tatsi xua bara yatsicaya piowa tatsi”, jei matatsunpin. 10 Tananetsita itʉtsiwatha xua poxonae Nacom pia Pejumope tʉnaxʉ tatsi netsita itʉta bapoxonae matatsunpin necapona pin demxuwa beya po demxuwa xua bichocono taʉcha. Yawano baxotiya matatsunpin netsita itʉta Nacom pia pepa pexeinya tomara tatsi ichaxota jinompa pomonae peantobewichi Nacom. Barapo tomara pena Jerusalén tomara, po tomara Nacom pia xainya wetsica tatsi pona xua itaboco wetsica. 11 Barapo tomara bichocono wʉnae xua pentha exanuncua Nacom pia pexeinya itʉpanae coicha tatsi, tsipei Nacom baxota popona. Barapo pepentha tsuncuae coichawa bichocono daedaena icha iboto ichi xua po iboto itʉpana po iboto ira bʉxʉpana iboto. Bara pocotsi itʉpanae iboto jaspe matawʉn, po iboto xua epa nasaba. 12 Barapo Jerusalén tomara yacaincha matawacaichiya uncuatsi xua pocotsiwa be curara xua ʉ ibo xua bichocono amʉxʉbʉrʉtiyʉ xuano xua bichocono taʉcha. Yawano xeina doce po coibotobe. Daxita barapo coibotontha tsiniya umena matatsunpiwi, xua be caein tsiniya. Barapo coibotontha tsitsiniya wʉn dudubenapoinya Israel pia pemomoxi susato bicheiton tatsi. 13 Mataʉtano acoibi po coibotobe ducua ichaxota pocotsiwa xometo weecoina. Icha acoibi coibotobe ducua ichaxota pocotsiwa xometo bejopiya. Yawano epataʉta dena ainya acoibibe po coibotobe nantiya ducuabe. 14 Yawano barapo curaratha ira wetsina umena iboton. Barapo iboton doce po ibotonbe xua barapo ibotontha tsiniya wʉn dubena pewʉnxi xua doce poyobe pomonae Cordero pia peitorobi jiwi tatsi.

15 Barapo matatsunpin, po matatsunpin netsipaeba, bapon capatopa pocotsiwa xua pecacanaʉbiwa xua be naewa xua oro nainto peepa canaʉbinexa tomara yawa pecoiboton yawa curara. 16 Tomara nantiya namʉxʉbʉrʉ jʉpabe xua apiya dena. Barapo matatsunpin epa canʉbarena barapo tomara dos mil doscientos po kilómetrobe xeina xua apiya dena yawa xua taʉcha xua asiyeicha daxita baxuan nantiya naepa jʉpa. 17 Bapoxonae epa canaʉba curara mʉxʉbʉrʉ sesenta y cinco po metrobe xeina xua pemʉxʉbʉrʉ xua aitiyʉ. Baxuan matatsunpin exana be jiwi pia pecanaʉbiya coyenewa tatsi.

18 Curara iboton ʉ xuan pexeinya iboton, xua ira bʉxʉpana iboton xuan jaspe matawʉn. Tomara acaba ʉ xuan pocotsiwan oro matawʉn be xuan peepa nasabiwan. 19 Po iboton ira weumeina xua doce po ibotonbe, daxita mata pepena xua mata wʉnae exana icha be iboton ichi pocotsi iboton ainya matoman. Po iboto copiya barapo iboto mata pepena xua jaspe iboton matawʉn. Po iboto ichaxota ba “dos”, jei, barapo iboto mata pepena xua zafiro ibo matawʉn. Po iboto ichaxota ba “tres”, jei, barapo iboto mata pepena ágata ibo matawʉn. Po iboto ichaxota ba “cuatro”, jei, barapo iboto mata pepena esmeralda ibo matawʉn. 20 Po iboto ichaxota ba “cinco”, jei, barapo iboto mata pepena ónice ibo matawʉn. Po iboto ichaxota ba “seis”, jei, barapo iboto mata pepena cornalina ibo matawʉn. Po iboto ichaxota ba “siete”, jei, barapo iboto mata pepena crisólito ibo matawʉn. Po iboto ichaxota ba “ocho”, jei, barapo iboto mata pepena berilo ibo matawʉn. Po iboto ichaxota ba “nueve”, jei, barapo iboto mata pepena topacio ibo matawʉn. Po iboto ichaxota ba “diez”, jei, barapo iboto mata pepena crisoprasa ibo matawʉn. Po iboto ichaxota ba “once”, jei, barapo iboto mata pepena jacinto ibo matawʉn. Po iboto ichaxota ba “doce”, jei, barapo iboto mata pepena amatista ibo matawʉn. 21 Barapo doce po boupanbe exana ʉ xuan be perla matawʉn xua daxita barompaya peboupan tsiniya. Barapo pepa namto xua tomaratha exana ʉ pocotsiwa xua xuan be oro nainton xua xuan peepa nasabiwan poxoru xua be pepa oro nainton.

22 Barapo tomaratha jopa taeinyo Nacom pin pia bo tatsi tsipei bara Nacom baxota pepoponaexae po Nacom daxita pia peayapusʉ itorobi coyenewan xeina. Irʉrʉ xua baxota pepoponaexae Cordero daxota jopa nantawenonaeyo Nacom pin pia bo tatsi. 23 Barapo tomara jopa nantawenonaeyo xometo xua tomara pentha peexanaewa tsane yawano xua jomocoichatono, tsipei Nacom baxota popona peyacoicha jinaexae xua barompaya pia pexeinya pecoichaxae tatsi, xuano irʉrʉ xeina Cordero barapo coicha. 24 Pomonae xua bayatha Nacom capanenebiya, barapomonae barapo coichatha ponaena barapo tomaratha po coicha Nacom pia coicha. Daxita pomonae jiwi itorobiya pia pepa peewatsiwichi barapomonae Nacom catsibinchi barapo tomaratha po coyene xua Nacom wʉnae pejainchiwatsi po coyene xua tsita exanatsi xua bayatha jiwi tsita exana barapomonaetha. 25 Peboupan jopa bapana coibo xatababanobi mataqueitha, xua baxota jopa ataya tsitecaeya pequirei tsaibi tsouneibixae. 26 Daxita nacuanpiwi Nacom capona barapo tomaratha xua Nacom pecatsibiwa tsainchi pocotsiwan pewʉnaewan xua be copei. Mataʉtano Nacom catatsi po coyene xua Nacom wʉnae pejainchiwatsi. 27 Ichitha xua xuan peabe coyenein bapana jopa patsi tsane barapo tomaratha. Mataʉtano jopa patsi tsane baxota pomonae abe peexanaewi irʉrʉ pomonae pemuxuitorobiwi. Saya meisa patsina baxota pomonae wʉn dubena po diborotha ba jiwi nacapanenebiya tsaibi poxonae wʉn dubeibatsi baxota, xua po diboro xeina Cordero.