Kolesaga Koneai Bidigo Pusali Po Elalubo Buku
Hasia Nedebo Po
Te e bukude, kolesaga konea pai bidi me deligo, ma po ola mabo bidigo homu kolesagade po pusali. Te kolesaga mu konea pai bidi agai te nai hauwade homu konea pabo bidi, tama te we bidi dabe augwali bilibo page me, bidabo ula page me, tigidali badu bugagia osola subo bidi dao. Agai suali, te nai hauwago te aga haliga sęgę ilibo suali. Agai suali, te we bidi dabe augwaligo bidabo ula te pęwadage elalu, te wiegi yai elalubo homu me ebeo. Te sę hauwa te bidi dabego ebo sęde te wiegi yai nai tede me pedalubeo. Tibaso, te bidigo te tiwai po pusalio, te da we bidigo bidibo ula te page meni yai elalubao.
God aga te dago bidibo ulago Aya da, tiali goli da we bidigo te Godigo kolesaga page mu bugagia koneabo usu ebeo. Te tobage sęgę yai pogo te po odabo mu hagela ilali, tiali goli te kolesaga koneani bidigo te dago hagela naga igimio po wali. Te dago konesiąbadi digi, tagalao, te dago sę dene eyu, te pęwadage sogo pemene homu elama bidinao, te Godigo da deli delibolo te e tǫde bidabo bodolu mawai dao.
Bidi hauwago te tobage po te buku me delide te tobage po te Buk Baibel tomode elalubaso, te augwa sulama, midigi mu sabo dao. Tialima, te nai me deli te bukude dabolo ola mani, e tiwai elalubao. Bidi me deli te haniani haliga sęgęgo aga dolobo bidi bidali, te tiwai aga me te Godigo we wai bidi hani tomode bidibao. Te e buku tego te bidi hauwa mu tau sabo sę yai dao, magi baso meni, augwaduba digi te haliga sęgę dali bidiyu, te homu hauwa idubao, te po tiwai si te kolesaga koneani bidigo te e bukude asęani elalubao. Augwaligo te buku nedebo sogo, augwaligo koneama, te augwaduba me bidibe da homu yali. Te tama tebogo augwali tau siyu, te Godigo dąų wali wiegi yai po te Baibelde te gasa badu elalubo pode te augwaligo homu kone me palobo sę eyu bidibo dao.
1
Tigidali nai te olo nai mu tiwai dao
1 Te kolesaga mu konea pai bidi me deligo po pusali.
Te kolesaga koneani bidi te Devitgo ogwa da, tama
polobadu aga Jerusalemde king bidi bidai dao.
2 Te kolesaga mu konea pali bidigo te tama po walio,
tigidali nai te olo nai tiwai mu elalu,
te nai dabego aga page mu me elalubeo.
3 Dago sę dene mu te kibu be hauwade ebao.
Tialima, dago mena wiegi yai nai dabe
te sę dene yalide sabo dawe?
4 Te we bidi dabe augwali isibaso,
te gesi we bidi hani ma pedelama,
te augwali bidali pesage ma hasegelibao.
Tiali digi te tǫ da, me hasegelibeo.
Sesemane sogo aga elalubo tiwai
naga me tama elalubo dao.
5 Tigidali sogo giliga nanudu gebao,
tigidali sogo aga iba dega siguludubao,
tama ma geasa pelama,
te gasa sogo bubugade ma nanabo sisi elalubao.
Sesemane sogo te giliga ge aga tama naga tidubadi,
aga homu hę mu wabo dao.
6 Wali te not badu hogodama,
te saut badu pedaiba solama, te ma begelama,
te not badu soabo da.
Te tama kolesaga eyu, te wali sesemane sogo
bagula bilibo dao.
7 Te tigidali asobo ąį te tamu ąįba udula pobao,
tiali goli te tamu ąį me pągąbeo.
Nosali, te ąį dabe te asaliba ma begasa holaibao,
tama ma dulubo dao.
8 Dago e tǫde tigidali naide homu kone paludu,
te dago augwalide hagela mu ebo da.
Dago te hagela ebo po hanilama
pusubaso, usu me egobeo.
Dago te tobage nai dabe sulama,
te tobage po dabe odobadi yali,
tiali goli te tebo sęgo da haliga pemene ilama,
mu usu nabo me ebo menio.
9 Te polobadu pedelali nai dabe da,
te nosali ma pedalubo da.
Te bidi dabe augwaligo te polobadu yali sę dabe,
te sę dabe gasa bidi dabego ma yaibao.
Te e tǫde gesi sę me elalube dao.
10 Te me sogo te bidi dabego te tama po obao,
“Te e da, te gesi noma nai me deli da,” po wali.
Tiali goli, te menio.
Polobadu mu digi te nai me elaluali,
te da e tǫde ame nenama bidisąbadi
te nai elaluai dao.
11 Te bidi me deligo te polobadu bidali bidi hani,
te wąį nǫų dabe augwalide
te homu ma kone palobo menio.
Tama da tudi badu pedelabo bage,
te nosali badu mu pedalubo bidi dabe
augwaligo te bagede homu kone me palogobe da.
Genuai kolesaga koneani te olo nai tiwai da
12 Ena te kolesaga koneai bidi, ena te Israel dabego king bidu, te ena Jerusalemde bidai dao. 13 Eno te e tǫde pedelali nai tigidalide homu kolesaga koneabo homu mu yali, tama eno te page hania mu bugagia dagala sigi da homu kone palali. Tiali goli, te sę Godigo dabolo mani te genuai sęgę mu elalubo dao. 14 Eno te tǫde pedalubo nai tigidali sula silali, te mu tama, te nai dabego page mu me elalusiąwai, te bidi me deli udayu, te wali nogogo tola sainu ebo tiwai ebo dao.
15 Te gagea pali nai dabe,
te dago dodolainu ebo usu egobeo.
Te elalusiąwani nai dabe, te dago me nedegobeo.
16 Eno te tama homu yali, eno te genuai homu kolesaga mu koneani, tama te polobadu Jerusalemde king bidali bidi dabego koneani homu kolesaga tigidali aiyaba elaluali. Eno wiegi yai homu kolesaga mu koneai dao. [1 Kin 4:29-31] 17 Eno te wiegi yai homu kolesaga hanilabo sę bomo yali, te kolesaga umuna pabo tobage sę page me gegabo sę bomo yalio. Tiali goli, ena odolali sę dene yali, te bidi me deligo te wali tola sainu pobebo tiwai yalio.
18 Mu tama, te homu kolesaga hauwa koneani bidigo,
te aga homu kone kolesaga konebo
te genuai uga uga ela holobo sogo,
te agai haliga sęgę genuai mu pedalubo dao.