1 Tama tialima, Mosesgo Genuai Bidi dali te po wai, “Te Israel hani augwaligo eno wabo po homude dąų wasiąma, tama eno pusubo po te augwali odogobeo. Tama augwaligo te po weyu, ‘Nago tibo po naga obao,’ waibao. ‘Tama Genuai Bidi nageba pedalobeo,’ te po waibao. Te augwaligo tama weyu da, teda eno magi sę egowe?”

2 Tama Genuai Bidigo Moses dali hanalu wai, “Nago magi nai tolalubawe?” Tama agai te po wai, “Tolasa bilibo dono tolalubo,” po wai. 3 Tama Genuai Bidigo te po wai, “Te dono tǫba sąyao.” Tama Mosesgo te dono tǫba sąbadi, te hasamani gagawai, tama Mosesgo te hasamani sulama, wi pai. 4 Tiali goli, Genuai Bidigo Mosesbolo te po wali, “Tagalama, nago nogo aiyaba munama, te danu nogogo touao.” Tama Mosesgo te hasamani nogogo danude touwai, tama te hasamani hasegelama, tama te bilibo dono ma pedelai.

5 Tama Genuai Bidigo te po wai, “Nage te Israel bageba pabo sogode nago tama tiao, tama augwaligo nago e sę tiwai ebo sulama, nago po homude dąų weyu, mu tama Genuai Bidi ena nageba pedelali da, te homu emainogo nago tama tiao. Tama augwaligo koneyu, te ena augwa wąį dabego God da, ena te bidi Abraham, me Aisak, me Jekop, te bagego God ena nageba pedelai dao,” wali. 6 Genuai Bidigo Moses dali te po ma wai, “Nago nogo naga ugwa tomoba muao.” Agai te Genuai Bidigo wali po gilama tama tiai, tama agai nogo me teda sai, tama te nogode keni dwai mu, tama te keni tigidali tedela yai. 7 Tama Genuai Bidigo te po ma wai, “Nago nogo naga ugwa tomoba ma muao.” Te agai tama tiali, tama agai nogo ma teda sali, tama te nogo wiegi yai yali, te aga tigi me badu elalubo tiwai yai.

8 Tama Genuai Bidigo te po wai, “Te augwaligo homude nago po dąų olama musiąbaso da, te nago hasia ebo bomo yai sę yali augwaligo homu teba dąų wasiąbaso da, te gasa bomo yai sę si nago ebo te augwaligo sulama, tama augwaligo homu nageba muaibao. 9 Tiali goli, augwaligo te bomo yai sę si ebo sulama, tama augwaligo nago po homuba dąų wasiąbaso da, teda nago te genuai wę Nail meba selama, te tǫba gelao. Tama te wę hasegelama, kaneme pedelaibao,” wali.

10 Tama Mosesgo Genuai Bidi dali te po wai, “Tama Genuai Bidi, tiali goli polobadu bidi hauwa gedude eno po bugagia wai menio. Tama megi nago ena dali po wali, tialima tego ena te po wabo bidi tiwai egobeo. Eno pedauwali sęgę mu yai, tama eno po bugagia wainogo ebo, te usu egobeo,” wali.

11 Tama Genuai Bidigo agabolo te po wali, “Niwai bidigo te we bidibolo po wabo pedauwali te mabo dawe? Niwai bidigo te bidi odo dega weyu, te pedauwali paliyu ebo dawe? Tama dego te gedugo tonono bilimainogo eyu, ma te gedu widao po wabo dawe? Ena, Genuai Bidigo naga, eno tama tiwai kolesaga ebo dao. 12 Megi da, nage pao. Te nago wabo po tigidali te eno tau siyu, tama te nago wabo po nagebolo ola mayu yaibao,” wali.

13 Tiali goli Mosesgo te po wai, “Genuai Bidi, eno usugobeo. Nago gasa bidi tagala palao.”

14 Tama Genuai Bidigo Moses dali wado po weyu, te po wai, “Magi basowe? Nago ama genuai bidi Aron te Livai hani bidibao. Eno koneani, te aga da, te po bugagia wabo bidi mu dao. Tama megi naga tama agai nage tiąba asobao, agai nage suyu, wiegi yai homu yaibao. 15 Nago agabolo te po olama, tama agai te po tigidali pusumainao. Tama eno dage sigo pedauwali tau siyu, tama dage sigo eno po bugagia naga waibao. Tama magi sę dage sigo yainogo ebaso, te sę yao po eno waibao. 16 Aga te nago pedauwalide po selama, te nago po te we bidibolo mawaibao. Tama agai gedude te nage te God tiwai bidiyu, te nago wabo po agai te we bidibolo pusaibao. 17 Tama megi da, nago te bilibo dono selama, tama nage pao. Tama nosali nago te donode te bidigo isiąwai bomai sę meba yaibao,” Genuai Bidigo te po wai.

18 Mosesgo po God dali ola silama, tama aga te aga wąį Jetro bidibo teba ma pelama, tama agabolo te po wai, “Eno homugo nago ena te Isip tǫba ma pelama, te eno deli hani sugi painogo ebo, te nago ena pao po wabo te usu da wao. Eno koneama, augwali bidibowe, ma augwali isaliwe, te eno augwali sugi peyu pobao,” wali. Jetro agai te usu da po aga dali wai, “Te usu da, nage pao.” 19 Tialima, Moses aga pisąbadi, tama Genuai Bidigo agabolo te po wai, “Megi nage te Isip tǫba ma pao, te nage elainogo yali bidi dabe, augwa digi isai dao,” wali. 20 Tama Moses agai te po wabo odolama, te aga we dali te aga wai si augwali te kibu donki me deliba muai. Tama agai te Godigo dono me selama, tama augwali Isip tǫba ma pabo gagalali.

21 Tama Genuai Bidigo Moses dali te po wai, “Nosali nage Isip tǫba pedalobode, te nago te bomai sę te Isip tuni bidi gedude yao. Eno nagebolo te bomai sę yabo bomo mobao. Tiali goli, eno te tuni bidide ilama, tama aga te aga homuba masigi sąwai bidi pedelaibao. Tama tibaso, agai te we bidi dabe augwali pao wagobeo. 22 Nosali nago tuni bidi dali eno po weyu, ‘Te Genuai Bidi agai tiwai po wabo dao, “Israel hani te eno hasia wai, te gomunai ogwa tiwai dao. 23 Tama eno nagebolo te po wai, ‘Nago te wai tagala palama, enabolo lotu po omainao.’ Tiali goli, nago hagela homu eyu da, te nago hasia wai te ogwa eno ela muaibao,” Genuai Bidigo te po wai,’ nago te po te Isip polasa tuni bidibolo wao.” [Sai 12:29]

24 Te Moses te Isip tǫba pabo tųde pibadi, tama te toma nabo pesage tede Moses aga gasi selama, tama te gasigo aga ela muainogo yai. 25 Tama Sipora, te Mosesgo wego, te poa pai masigi selama, tama aga wai te ogwa te gasa tigiwali togolama, Moses sągąba muai. Tama agai te po wai, “Nage eno bidi dao, tiali goli nage kaneme tama sabo bidi dao.” 26 Tama Genuai Bidigo sulama tagaliyu, tama Moses bidimainogo yai, tama agai aga ela mubeo. Te we Siporago te dąį ilibo tigiwali togwabo kolesaga tede hagela homu eyu, tama agai te po wai, “Kaneme sabo bidi dao.”

27 Tama Genuai Bidigo Aronbolo te po wai, “Nage te masigi sane yai buluba pelama, Moses dali tede sisinaibao.” Tialima, aga pelama, Moses te Godigo bulu dude sisinama, gesabidi suyu, tama dwagi yai homu eyu, augwa si gesabidide nono nai. 28 Tama Mosesgo Aronbolo te Genuai Bidigo agabolo wali po tigidali wai, te Genuai Bidigo aga tagala paliyu wali, te po wai. Tama Mosesgo Aronbolo te Genuai Bidigo agabolo te bidigo isiąwai bomai sę yabo po wali, te po me Aron dali wai.

29 Tama nosali Moses de Aron augwali si te Isip tǫba pelama, tama augwali sigo te Israel tobolu bidi dabe deliba sisinai. 30 Tama Arongo te Genuai Bidigo Mosesbolo wali po tigidali augwalibolo te po wai, tama te Israel hani olo we bidi dabe me deliba sisinama, tama agai te bidigo isiąwai bomai sę te we bidi augwali gedude yai. 31 Tama tibaso, augwaligo homu Aronba mu dąų wai. Augwaligo te po tiwai wabo odali, Genuai Bidigo suali, te Isip hani augwaligo te Israel hani dali dwai kolesaga ebaso, agai homu hauwa augwalide ebo dao. Tama te we bidi dabe augwaligo te po odolama, tama augwa tobolu tǫba aiyaba munama, Genuai Bidibolo lotu po wai.