1 Tama Genuai Bidigo Mosesbolo te po wai, 2 “Te Israel dabe augwalibolo po olama, tama augwaligo nai dabe selama, enabolo ofa momainao. Te we bidi augwaligo mena ofa nai mawainogo homu ebaso, te usu da, te nago sao. 3 Nago e tobage tiwai nai dabe augwali dali sao, te kapa gol, me silva, me bras, 4 me te sipsip nisigo nigai hobi dabe, meba sisi yai, meba mama yai, tama te wiegi yai au yai name ugwa me, te gasa ugwa augwaligo meme nisigo nigai me, 5 te sipsip omaigo wali te augwaligo mama pengo pilai me, tama wiegi yai hasa sikau wali tamu ąįde elalubo me, te me badu ni akas, te tama nai dabe sao. 6 Tama te lam sole udulabo oliv ni du wel me, te wel dali begelabo pauda me, te eno nai dabe dąį ilabo nai, tama te pauda wiegi yai denami elalubo te hano dali yabo nai me sao. 7 Tama haniani bomai masigi, te mone hauwago abelabo masigi tiwai, te pris dabe tobolu bidi aga ugwade belabo ugwa, me te aga bobobage gudubo ugwade te hagawia badu muabo, te sao. 8 Tama te we bidi augwalibolo te po olama, tama te ofa mani naigo augwaligo te eno ugwa be me deli sęnama, te wiegi yai tedali bede ena augwali dali tomode bidaibao. 9 Tama dagego te ugwa be me, te be tomode munalubo nai tigidali me, te dolo bugagia nigimainogo eyu, tama eno te piksa noma nagebolo hasia ola mawaibao.”

10 “Tama dagego halobage me deli te akas ni namego nigao, tama te halobage bobobage nigabo usu ni te 110 sentamita, te genuai te 66 sentamita, tama ugwadu usu ni te 66 sentamita, te tama tiwai nigao. 11 Tama dagego wiegi yai kapa gol te augwaligo siade ulama, pobele bage sela sąwai selama, tama golgo te halobage bulu badu me, tomode me haluama, tama bobobage gol dage me deli te halobage sesegede bagulama kęąo. 12 Tama te halobage tolabo ring me si me si te golgo nigilama, tama te dwasianu halobage dolalubo sągąde kęąo. Tama me si me sągą side kęyu, me si me sągą side kęyu yao. 13 Tama dagego te ni akas pedai si dulama, te halobage tolabo te ni pedai si te golgo haluao. 14 Tama te ni pedai si te ring tomoba te me badu muyu, me badu muyu elama, te halobage tolasa pomainogo eyu, tama tiao. 15 Tama te ni dage si sesemane sogo te ringde elalumainao. Tama dagego te gudulamo dao. 16 Tama nosali eno nage te bomo yai po elalubo masigi sawali si mawaibao, tama nago te masigi si te halobage tomoba muao,” wali.

17 “Tama dagego te halobage po paliabo nai te wiegi yai kapa golgo nigao, te bobobage nigabo usu ni te 110 sentamita, tama te genuai usu ni te 66 sentamita dao. Te halobage da, te we bidigo dwai sęgę sali sela sąbo digi dao. [Ro 3:25] 18 Tama dagego te gol meba selama, tama te hamago elama, tama te ensel mobo bidi noma si te golgo nigao. 19 Tama me deli te halobage dolo nogo badu te halobage po paliabo nai elalubo digi te dolalumainogo eyu, tama me deli te pobase nogo badu dolalumainogo muao. Dagego te gol dage me deli selama, te halobage paliabo nai nigilama, tama aga te mobo bidi si me nigao. Tiali goli, dagego te nai sela nigilamuo, menio. Tigidali nigibo nai te deli nai tiwai naga nigao. 20 Tama te mobo bidi si te we bidi dabego dwai sę yali sęgę sela sąbo digi dolaluyu, tama mego gesabidigo me gesabidiba tiwai tonaluyu, tama augwali sigo aba te halobageba me tonalumainao. Tama augwali sigo bogo dinigina pai elaluyu, tama te halobage te tama dualumainao. 21 Tama nagebolo eno te bomo yai po elalubo masigi sawali si menama, tama nago te masigi si te halobage tomoba munama, tama te halobage po paliao. 22 Tama ena nage dali te dwai sęgę sela sąbo buluba sisinaibao. Tama ena te mobo bidi si daidu tomode ugwadu bidiyu, tama nage dali da si deliba sisinama, tama eno te bomo yai po tigidali nagebolo pusaibao. Tama nago te bomo yai po te Israel we bidi dabe augwalibolo menama, tama augwaligo wali pomainao,” wali.

23 “Tama dagego te ni akasgo te tebol sai me deli nigao, te bobobage usu ni te 88 sentamita, te genuai usu ni te 44 sentamita, tama te ugwadu daidu te usu ni 66 sentamita dao. 24 Tama te tebol sai te wiegi yai golgo haluama, tama bobobage golgo te tebol sesege badu bagulama, dąų wao. 25 Tama dagego te gol genuai ilibo te 8 sentamita ilama, tama dwasianu gol dagego te tebol sesege badu tigidali te obo bogegelao. 26 Tama dagego te tebol tolabo nai ring me si me si te golgo nigilama, tama te tebol sągą me si me si te badu kęąo. 27 Tama te ring dabe te tebol pąde ugwadu daide munaluaibao. 28 Tama dagego te ni akas si te tebol tolabo ni dulama, tama te ni si te golgo haluao. 29 Tama te wain ofa yabo genuai pou dabe, me te dwasianu pou dabe, me kap, me te botol me nigao. Dagego te nai dabe te wiegi yai golgo naga nigao. 30 Tama sesemane sogo dagego enabolo maiabo bret te tebolba naga munama, tama eno gedude munaluaibao,” wali. [Prs 24:5-8]

31 “Dagego te lam sole dabe muabo nai me deli te wiegi yai golgo nigao. Tama te gol hamago elama, te lam dabe tolalubo nai dolaluabo pesage nigilama, tama dono nigilama, te lam nogo dabe muabo digi nigao. Tama te golgo naga aga au yabo ni duduli noma meba nigao. Tama te tigidali nigibo te deli tigi tiwai naga nigao. 32 Te lam donogo nogo te a naga olama nogo me badu deli elalubo, te me sela te me badu muyu, te me sela te me badu muyu yao. 33 Tama tigidali nogo deli delide usu nama, te ni duduli noma sela elaluyu, te ni amongo nigai tonobo tiwai yaibao. 34 Tama te lam dono aga digi me te tiwai yao. Tama te ni duduli noma me si me si te amon ni aga duduli tiwai dao. 35 Tama te ni duduli yabe dwasianu dabe te lam dono nogo si si dologode naga nigao. 36 Te dagego hama selama, te gol haluama, tama te nai dabe tigidali te deli nai tiwai naga nigao. 37 Tama dagego te lam a naga olama me badu nogo si nigilama, tama augwali te lam tolalubo naiba muao. Tama augwali te bugagia wasilama, augwaligo ula te ugwa be tomoba pomainao. 38 Tama te lamde mubo hobi dodolobo nai me, te pou me, te nai dabe te wiegi yai golgo naga nigao. 39 Dagego te wiegi yai genuai sęgę elalubo te 35 kilogram golgo te lam tolalubo nai te nai dabe nigao. 40 Dagego te nai nigibo sogo, dagego dua bugagia te piksa noma eno nagebolo e bulu dude ola mani, te dolo wali pelama, te nai dabe nigao,” Genuai Bidigo te po Mosesbolo wai. [Tpi 7:44; Hi 8:5]