1 Mosesgo te tigidali Israel we bidi i olama, asobode augwalibolo e tiwai po wai, “Genuai Bidigo te po wali, dagego te e bomai po wali piąo, te po wai dao. 2 Te Sarere dagego sę yabo side te 6 sogo te sę yabo side te elalubao. Tiali goli, te 7 wali, te me deli sogo te olo bidiyu, toma naga niąo, tama te sę idali weyu, habu mu selao, magi baso meni, te Genuai Bidigo side dolo dao. Te side te bidigo, ma te wego, te sę ebaso da, teda dagego aga ela muao. [Sai 20:8-11; 23:12; 31:15; 34:21; Prs 23:3; Bom 5:12-14] 3 Te dwasianu sę dagego bede te sia udulabo sę elalubaso, te me habu selai dao, te olo bidiyu toma nabo side dao.” Te po wai.

4-5 Nosali Mosesgo te Israel dabe augwalibolo e tiwai po wai, “Genuai Bidigo te po wai, megi dagego nai meba agabolo mao. Te agabolo nai mawainogo ebo we bidi, augwaligo e tiwai nai dabe sela asomainogo yao, te gol, me silva, me bras, 6 tama te gasa au wiegi yai name ugwa badi, te sisi yai, me te mama yai sipsip nisi, tama te augwaligo te meme nisigo nigai ugwa badi, tama te nai dabe sela asa wai. 7 Tama augwaligo te omai sipsip wali te mama pengo pilai, te sela asomainao. Tama augwaligo te wiegi yai hasa nogi sikau wali, te tamu ąįde elalubo, te wali me, te ni akas dage dabe, te sela asobadi, 8 tama te lam wel me, te wel dali taluabo denami ebo haniani nai me sela asiąo. Te taluali wel da, te Godigo nai dabe sa mubo wel dao. Tama wiegi yai denami ebo pauda, te denami ilabo nai dao, te me sela asomainogo yao. 9 Tama augwaligo te wiegi yai masigi meba sela asiyu, te ugwa aulubo nai, tama te het pris bidi hagawiade muabo dwasianu masigi muai ugwa dage, teba muabo masigi dabe, te me sela asomainogo yao,” Mosesgo Genuai Bidigo po tama pusali.

10 “Dage tomode te nai dabe nigibo koneai bidi dabe augwali bidibo, tama te bage aselama, te Genuai Bidigo dagebolo niga wali nai dabe tigidali nigao. 11 Tama te ugwa be sę badi, tama te haluabo nai dabe me nigiyu, tama te bisigi dabe te obo ni dili me, te obo eyu te pipili pabo ni dabe me, te tigi ni pos bras dali, te pos page dąų walabo halobage, te nai dabe nigao. 12 Tama augwaligo te bomai po muabo halobage nigibadi, tama augwaligo te halobage tolabo ni togobadi, tama augwaligo te gol selama, te sęgę sela sąyąbo madi te pesage nigiyu, tama augwaligo te bomai po muani halobage haluabo name ugwa nigibadi yao. 13 Tama augwaligo te tebol nigiyu, te aga tede muabo nai dabe me nigibadi, tama te tebol tolabo ni dulubadi, tama augwaligo te God gedude te tebolde muabo bret me niga po wai. 14 Tama augwaligo te lam muabo nai, me te aga nai dabe dali nigao. Tama augwaligo te ula yabo lam dabe me, te wel me nigao.”

15 “Tama augwaligo te denami ebo nai pauda ulabo alta nigiyu, tama te alta tolabo ni me togwao. Tama augwaligo te Genuai Bidigo nai da olama, te sa muabo wel me nigiyu, tama wiegi yai denami yabo pauda me nigao. Tama te ugwa be tųde walabo name ugwa me nigao. 16 Tama augwaligo te ofa yabo te alta nigibadi, tama alta tomoba mubo pololai moni bras nai, te bras nai dage nigiyu, te alta tolabo ni dage si me, te altade muabo nai dabe tigidali me nigao. Tama te ąį pauabo genuai pou me, te aga muabo page me, nigibadi yao. 17 Tama augwaligo te ugwa be bagulali te obode muabo ugwa nigibadi, tama te obo tigi ni pos dabe nigibadi, te tigi ni pos page dąų walabo halobage me nigao. Tama augwaligo te obo bagulali madi tųde muabo name ugwa me nigao. 18 Tama augwaligo te ugwa be kęabo te bono dabe nigibadi, te obo kęabo me te tǫde enebo bobobage nil bras, te haliga bono bomonabo nai dabe badi, tama nigao. 19 Tama augwaligo te Aron aga ogomani dali augwaligo te Tedali Gasagi Yai Be Habuba augwali te pris sę igi pabo sogo muabo ugwa, te gasa wiegi yai mu nigao.”

20 Tialima, tama tigidali Israel we bidigo Moses tagalama, tama palio. 21 Tama Mosesgo wali pogo te Israel we bidi hauwa augwali homude enebaso, tama augwaligo te Mosesgo wali po tiwai gilama te sę yainogo yali. Tama augwaligo nai dabe te Genuai Bidiba sela pelama, agai ugwa be sę emainogo yai. Tama augwaligo te lotu wabo nai dabe tigidali me, tama te ugwa bede sę yabo tigidali nai dabe badi, te pris dabego gudabo ugwa nigibo nai dabe tigidali sela pai. 22 Tama tigidali we bidigo homugo, te augwaligo e tobage haniani au dobage dabe sela pali, gudubo ugwade walobo pin me, olode walobo ring me, nogode mubo ring me, magede domobo beli me, tama golgo haniani doado bage sela pai. Tama te we bidi dabe augwaligo te doado bage te Genuai Bidibolo te ofa tiwai elama, mu mawai dao. 23 Tama meba we bidigo te gasa au wiegi yai ugwa, me te sisi yai, ma te mama yai sipsip nisigo, me te meme nisigo, me te omai sipsip wali te augwaligo mama pengo pilai badi, te tamu ąįde elalubo wiegi yai hasa sikau wali badi, te tama doado bage elaluali, te augwaligo te nai dabe sela asai dao. 24 Tama tigidali we bidigo te silva me bras elaluali, te augwaligo sela aselama, tama Genuai Bidi magasai. Tama te ni akas elaluali bidi dabego te ugwa be sę yabo ni sela asai.

25 Tama te hobi gudubo koneani tigidali we, augwaligo te sisi yai me mama yai sipsip nisi selama, te hobi gudai. Tama augwaligo te wiegi yai ugwa nigabo te tedela yai hobi nigai. Tama augwaligo te hobi dabe dali, te wiegi yai tedela yai name ugwa me, selasa asai. 26 Tama te meme nisigo te hobi gudubo bugagia koneai we dabe mebago, te hobi augwaligo bugagia gudai dao. 27 Tama te tobolu bidi dabe augwaligo wiegi wiegi yai masigi te ugwaba, me te het pris bidigo hagawiade mubo ugwa, me te aga magede mubo ugwade muabo masigi dabe selasa asai. 28 Tama augwaligo te gasa tigi, me tedali yai pauda, me wel, me sanda te wel nigilama, te Genuai Bidigo naiba sa muyu nigabo nai, me te lam dabeba muabo nai, me te denami emainogo munama nigabo nai dabe selasa asalio. 29 Tigidali Israel we bidigo Genuai Bidibolo nai maiabo homu yali bage, augwaligo dwagi yai homu eyu, te Genuai Bidigo sę te Mosesbolo yao wali, te sę yainogo, te nai dabe olo sela asai.

30 Mosesgo te Israel dabe augwalibolo e tiwai po wai, “Genuai Bidigo te Besalel sa muani, te Urigo ogwa, tama Hur te aga wąį, te Juda hani dao. 31 Tama Genuai Bidi Godigo digi aga noma bidi te agabolo mani, tama agai homu kolesaga wiegi yai elaluyu, tama tigidali haniani sę ebo kolesaga wiegi yai koneai elaluai. 32 Tama agai homude bugagia koneama, tama te gol, me silva, me bras, te nai dabego te sę emainogo yai. 33 Tama agai te wiegi yai au yabo masigi togobo me, te ni dulama te todogo pabo sę me, te gasa au yabo nai meba togobo dabe me, te tigidali agai koneai. 34 Tama Genuai Bidigo wiegi yai kolesaga te Besalel de Oholiap, te bidi sibolo mawai, te Oholiap aga te Ahisamakgo ogwa, te Dango hani dao. Tama augwali sigo te gasa bidi dabego te sę dabe emainogo ola mabo te usu yaibao. 35 Genuai Bidigo te bidi si te haniani sę yabo homu kolesaga mawai dao, te masigi togobo sę, me te gasagi yai au yai piksa noma nigibo sę me, te wiegi yai gasa au yai ugwa hobolobo sę me, te hobigo au ebo sę me, te augwaligo sisi yai me mama yai sipsip nisigo augwaligo nigai. Augwali sigo te tigidali nai me, te piksa noma dabe me augwaligo nigainogo ebo, te augwali sigo te sę dabe me ebo te usu yaibao,” Mosesgo te po wai.