3 Tialima, Abram aga basi giluama, tama aga gesabidi tǫba pubaligiluali. Tama Godigo agabolo tama tiwai po wai, 4 “Te enade da, te eno nage dali te tama tiwai dwagi yai tau sabo bomo yai po dąų waibao, te nage umabo hauwa we bidi hanigo wąį monu pedelaibao. 5 Nago nogi megi te Abram ma wagobeo. Megi nago nogi te Abraham waibao. Magi baso meni, eno nage te umabo hauwa we bidi hanigo wąį monu pedalumainogo ilali. * Te Hibru pogo te nogi Abram page da, te “genuai nogi elalubo aya,” te wabo. Tialima, te nogi Abraham page da, te “we bidi umabogo aya,” te tiwai wabo. Tama tibaso, eno te nogi nagebolo mobao. [Ro 4:17] 6 Te eno nago wai hani dabe te hauwa pedalumainu elama, tama meba te gavman tuni bidi pedelaibao. Te nago hani wai dabe te umabo hauwa hani mu pedelaibao. 7 Te eno nage dali me, te augwali nosali pedalubo hani dabe dali me, te eno dwagi yai tau sabo bomai po dąų walobao. Ena da, nago God me, te ena nago nosali pedelabo hani wai dabe augwaligo God me dao. Te dąų wali bomai po da, te sesemane bidada pabo sogo elalua piduaibao. [Lu 1:55] 8 Te nage megi e bulu wau biliyu, te e bidibo tǫ da, te eno nagebolo, me te nago hani wai dabe nosali pedalabo bage augwalibolo maiabo tǫ dao. Tigidali te Kenan tǫ dabe da, te sesemane sogo dagego tǫ elaluaibao, tama ena da, ena te nago wai puluba hani dabego God bidaibao,” wali. [Tpi 7:5]

9 Tama Godigo Abrahambolo te tiwai po wai, “Te nagede, nage badi, te nago hani wąį dabe augwali badi, te dage tigidaligo eno dwagi yai tau sabo bomai po dąų wali te wali piąo. 10 Dagego eno te dąį ilali bomai po wali pao. Dagego te duga hani bidi tigidali te tigiwali togoiąo. [Tpi 7:8; Ro 4:11] 11-13 Dagego te duga ame nabo ogwa wai dabe tigidali tigiwali togobo sę te a naga olama, me badu sela wabo side silibo si, te tigiwali togwao. Tama dagego te duga sę ebo bidi dabe augwaligo tigiwali me togwao, te tigidali sę ebo bidi, te augwa ida duga bede ame nani sę bidi, me te digibulu bulude abelali sę ebo bidi dabe tigidali, te augwali tigiwali me togwao, te nosali pedalubo ogwa wai dabe augwalide me tama eyu, bidada piduao. Te dąį ebo da, te eno dage dali dąų wabo bomai po te dao. Mu tama dao. Dagego duga bidi dabe tigidali te tigiwali togoiąo. Tama te dąį ilali te duga tigide elalubo, te bidi dabe augwaligo koneama, te eno dwagi yai tau sabo dąų walali po te bomo sesemane sogo elaluaibao. 14 Te bidi me deligo hagela homu eyu, tama augwaligo aga tigiwali togosiąbaso da, te agai eno bomai dąų wali po sela sąbao. Tama tibaso, te bidi aga te aga hani dali hodobo me bidilamuo,” wali.

15 Tama Godigo Abrahambolo te po wai, “Nago naga we nogi Sarai nosali me nogigio. Megi agai nogi Sara dao. 16 Te eno Sara wiegi yai tau sabo po menama, tama agai nago ogwa me deli ame naibao. Te eno Sarabolo wiegi yai homu elama, dwagi yai tau sabo po mayu, tama aga te we bidi hauwa hanigo auwa mosi pedelama, tama meba te gavman tuni bidi pedelama, bidaibao,” wali.

17 Te Abrahamgo God genuai nogi mabo eyu, tama Abraham basi giluama, tama aga gesabi te tǫba mu pogulali. Tama aga gisugu weyu, tama homu yali, ‘Te bidigo kibu be te bidi sese a naga, te 100 kibu be yai elalubadi da, te aga wai ame nabo usu dawe? Tama Sarago kibu be bidi sese me si me si olama, nogo si, te 90 kibu be yai madi, te agai wai ame nabo usu egowe?’ 18 Tama Abrahamgo Godibolo te po wai, “Eno homugo nago te Ismael me bugagia tonalumainu ebao. Tiyu, aga bugagia bidaibao.” Te po wai.

19 Tiali goli, Godigo te po wai, “Awe. Tiali goli, nago we Sarago te wai ogwa me deli ame naibao, tama nago aga nogi Aisak poao. † Te Hibru pogo te wai ogwa nogi Aisak te page elalubao, te nogi page e tiwai dao, “Aga gisugu wali.” Te eno aga dali, me te aga hani wai dabe dali, te dwagi yai tau sabo bomai po dąų waibao. Te dąų wabo bomai po te sesemane sogo bomo elaluaibao. 20 Nago enabolo te Ismael me bugagia tonaluao wali. Teda eno tama tiaibao. Te eno agabolo wiegi yai tau sabo po mawaibao. Tama tiyu, eno agabolo te wai puluba hauwa menama, tama eno agai wai puluba hani te umabo mu pedalumainu ilaibao. Te aga te nogo si olama, sągągo si tobolu bidigo aya pedaliyu, tama eno agai hani wai dabe te genuai mu pedalumainu yaibao. 21 Tiali goli, e tobage sogo te nosali kibu bede te Sarago nago wai ogwa te Aisak ame naibao, tama eno aga dali naga te dwagi yai tau sabo bomai po dąų walaibao.” Te po wai.

22 Godigo te tama po Abraham dali ola silama, tama aga ugwaba holoyu, tama pai. 23 Tialima, te sogo digi polo tama Abrahamgo Godigo po wali pelama, tama agai hanide tigidali bidi te gasa tigiwali togwali. Agai aga ogwa Ismael tigiwali togobadi, tama aga sę ebo bidi dabego tigiwali me togwai. Te sę ebo bidi meba augwa idago te Abrahamgo bede ame nani, tama meba agai te gasa bulude abelai bidi te augwali tigiwali togwai dao. 24-25 Abrahamgo kibu be te bidi sese a naga wabo pąde deli, te 99 kibu be elalubadi, te aga ogwa Ismaelgo kibu be te nogo si olama, sągą badu sela kibu be yai madi, tama augwaligo augwali si tigiwali togwai dao. 26 Augwaligo te augwali si tigiwali te deli sogode naga togwai. 27 Tama augwaligo Abrahamgo tigidali sę ebo bidi dali tigiwali togwalio, te Abraham me Ismael hodobo, te meba augwa idago te Abrahamgo bede ame nani, tama meba agai te gasa bulude abelai bidi dabe dao.