1 Te bidi Lot te we bidi sisinibo pesagede te Sodom hanu genuai sunumi elalubo madigi bididuai, tama piode te mobo bidi ensel si teba pedelai. Lotgo te bidi si asobo sulama, tama aga hogodama, augwali si pąba pai. Aga te bogoli sugunu pogiluama, tama aga gesabidi te tǫba mu pogulama, 2 tama agai te po wai, “Abagi, dage si aselama, duayagasu bolo yao,” te po wali. “Dage si eno beba asiąo. Dage si sągą bolo wę tedelama, tama dage si megi hulide ede piagameo. Tama kigamu duga si hogodama, pagameo.” Tiali goli, augwali sigo po wei ponoyu, te tiwai po wali, “Menio. Da si te bede me pigobeo. Te da si e bidi sisinibo pesagede piaibao,” wali. 3 Tiali goli, Lotgo augwali si dali anoma mu idubadi genama, tama nosali augwali si aga dali beba pali. Tama Lotgo te bo disiąwai te yis meni yai bret ulubadi, te augwali si wiegi yai nai sisi ilama, mani. Tama augwali sigo te nai tuali.

4 Te Lot aga abagi si pisąbadi, tama te Sodom bidi dabego te be bobogela sagasali. Te hanude bidaluali tigidali bidi dabe asali, te gesi bidi dali, te monu dabe dali asai. 5 Augwaligo Lotbolo i olama, tama tiwai wali, “Te bidi si aselama, te nage dali te hulide bidibo, te bidi si mena bidibawe? Te augwali si buluba dinao. Te dago augwali tąwaibao,” wali.

6 Tama Lot te buluba teda solama, tama aga sobadi sunumi paliali. 7 Tama agai te po wai, “Abagi dede, dagego odiąo. Dagego te dwai kolesaga igimio. 8 Eno wegi si bidibao, tama augwali si te bidi dali me pisąbadi dao. Eno augwali si dageba odasa buluba asaibao, tama duga magi homu ebo te augwali side siliagameo. Tiali goli, te bidi si da, te eno abagi si, tama augwali si eno bede bididubadi, tama eno augwali si bugagia te ena tonaluaibao. Tama tibaso, dagego dwai sę augwali side me igimio,” wali.

9 Tiali goli, augwaligo te po wali, “Nage bulu wau bilibo bidi, nage gedao! Nago dago ebo kolesaga dagaligio. Te nage geda sisąwani da, teda dago augwali side dwai sę eyu, tama nage me te gisiga mu yaibao.” Tama augwaligo Lot te be tomoba edaba pogoliyu, tama augwaligo te be sunumi aluainu yali. 10 Tiali goli, te be tomode bidali bidi sigo te be tų dalama, tama nogo buluba dįnama, tama Lot be tomoba kegali, tama augwali sigo te be sunumi paliali. 11 Nosali augwali sigo te tigidali bulubadu bidaluali bidi dabe augwali gedu paliali. Tama gedu widai bage tiwai osogo bidiyu, tama augwaligo te be sunumi gegabo usu me isiąwai dao.

12 Tialima, te bidi sigo Lotbolo hanalu wali, “Te nago hani meba te hanude bidalubawe? Nago te naga ogwa dabe dali, wegi dabe dali, te wegi sabo wąį dabe me, te tigidali badi, te nago ede bidalubo gasa hani dali tigidali selama, tama dagego te hanu taga piąo. 13 Te da si go te hanu dolaibao. Yawego te bidi dabego dwai kolesaga ebo po odama, tama augwali dolomainu agai da si tagala palai dao,” wali.

14 Tialima, Lot te aga wegi si noma sali bidi aga wąį si bidibo madi pai. Tama agai te po augwali sibolo wagi pali, “Dage si hogodama, te hanu polo taga soao,” wali. “Yawego te bulu dolainogo ebao.” Tiali goli, augwali sigo homugo agai te gagali po wabo homu naga yai. 15 Te be posai madi, tama te mobo bidi ensel sigo te Lot seliyu, tama po wali, “Asesa yao! Te naga we dali, naga ede bidibo wegi si dali selama, tama e hanu taga piąo. Tiyu, dage te gasa we bidi dabe dali haga yabuo.” 16 Augwali sigo po wabode, tama Lot polo asesa me pabe. Tiali goli, Yawego Lot homu dene eyu tau sainogo yali. Tama tibaso, te bidi sigo te Lot aga me, te aga we me, aga wegi si dali, augwali nogo tulama, tama augwali sigo augwali odasa te hanu buluba dilanio. [2 Pi 2:7]

17 Te mobo bidi ensel sigo te augwali bulubadu dilama, tama mego te po wai, “Dage wi piąo. Tiyu, dage isabuo! Dagego tudiba begelama, ma tonogio. Tama dage te malu elalubo madi toma me nenamuo. Te dage udada pelama, te bulu duba ugwa holali da, teda dage me isigobeo,” wali.

18 Tiali goli, Lotgo te po wali, “Genuai Bidio, eno homugo hagela homu ebao. 19 Odao! Nago ena homu dene mu elama, tama nago ena tau siyu, wiegi yai sę yai. Tiali goli, te bulu du digibulu mu elalubao. Te ena polo sabalogobeo. Tiyu, te hanu doliyu, te ena dali hagawaibao. 20 Nago ude te elalubo dwasianu hanu suao. Te pąde elalubo, tama ena teba polo sabalubo usu yaibao. Te dwasianu bulu naga dao. Nago ena teba pomainogo eyu da, te ena me isigobeo,” wali.

21 Tama mobo bidi enselgo te po wali, “Te me usu dao. Teda te hanu eno me dologobeo. 22 Te polo pao! Asesa yao! Eno magi sę deli isiąbadi, dage te hanuba sabolaibao,” wali. Lotgo te po wai, te hanu da te dwasianu hanu da, tama tibaso augwaligo te hanu nogi Soar poai dao. * Te hanu nogi Soar wabo po page te Hibru pogo te “dwasianu bulu” tama wabo dao.

23 Te giliga aselama pedalubo sogo, Lot te dwasianu hanu Soar teba sabaligi palio. 24 Tama Yawego digi te posolo yai masigi, me te sia dali te Sodom de Gomora hanu siba te dagaludu aiyaba tula palali. 25 Tama Yawego te hanu si dali, te malu tǫ me, te hanu side bidali we bidi tigidali badi, tama te tǫde pedelali nai tigidali te siago delama, mu dolalio. [Mt 10: 15; 11:23-24; Lu 10:12; 17:29; 2 Pi 2:6; Ju 7] 26 Tiali goli, Lotgo we te Lot tudibadu wali asudu, tama agai tudiba ma begelama tonani, tama aga tede isalima, tama aga tigi te gelali ni page tiwai elalualio, tama te tamugo aga mu mesegelali. [Lu 17:32]

27 Te kigamu digi mu Abraham te Yawe dali dolalu polobadu te po miani pesageba palio. 28 Abrahamgo te Sodom me, Gomora me, te tigidali tǫ odogo maluba aba tonono bilalio. Tama agai te hano pedalubo suali, te genuai sia hano tiwai pedalubo sualio. 29 Godigo te tigidali malu tǫde elaluali hanu dolali. Tiali goli, agai te Abrahamba homu kone palama, tama agai te Lot dali, te aga bidali hanu dali, te me dolobeo. Te dolobo sę ebogo te Lot polobadu bidali hanu dabe mu dola silalio.

30 Te Lot te Soarde me bidibo wi yai. Tama tibaso, aga te bulu duba te aga wegi si dali holali. Tama augwali te ola be me delide bidai. 31 Tama gomunai wegigo tomo wegibolo te tiwai po wai, “Te da sigo aya monu dabe megi ebao,” wali. “Tama te tigidali tǫ pedaide te da si sabo bidi menio. Te da sigo wai magi ilama ame naibawe? 32 Te dena ayago hani te silidali weyu, te tama tinao! Te da sigo dena si aya te bomai ąį wain tumainu menama, tama aga tobolu gęǫ ilaibao. Tialima, da si aga dali pagela pilama, tama agade wai ame naibao,” wali. 33 Tama hulide augwali sigo te wain wę augwa ayabolo menama, tama aga tobolu gęǫ yali. Tama gomunai wegi aga dali piali. Tiali goli, waingo te aya gęǫ mu ilama, tama agai te tiali sę me konebeo. 34 Te me sogo side gomunai wegigo tomo wegibolo te po wali, “Te do hulide ena aya dali piali. Te e sogo hulide da sigo te aya tobolu gęǫ yabo sę ma ilaibao,” wali. “Tama nage aga dali te eno yali gilama piagameo. Tama tilama, da sigo agade wai ame naibao,” wali. 35 Tialima, te sogo hulide te augwa si aya te wain menama, gęǫ ma ilali, tama tomo wegi aga dali pialio. Augwa si aya te tobolu mu gęǫ page elama, te polobadu yali tiwai ma yali, tama te sę yali te agai me konebeo. 36 Te tama tiali kolesagade te wegi si augwa si aya Lotde digi, te augwali haliga yalio. 37 Tama gomunai wegigo te ogwa ame nani, te ogwa nogi Moap poai. Te we bidi hanigo wai nogi Moap nogi poai dao. 38 Tama tomo wegigo me te ogwa ame nani, te ogwa nogi Benami poali. † Hibru pogo te ogwa wai nogi Moap te nogi wabo po page da te “aga idago ayadu asai dao.” Tama te gasa ogwa wai nogi Benami, te nogi page da te “eno ayago ogwa.” Te bidi da, te Amon we bidi hani dabego wąį monu dao.