1 Te Sarago kibu be te 127 kibu be bidama, 2 tama aga te Kiriat Arba, te gasa nogi Hebron, te Kenan pedai badu tede isai. Tama Abrahamgo te Sarade homu dene mu ebaso, aga tigi osogo muani madiba hogonigi peyu, tama agai aga we hagede gela wai. 3 Te gela uduama, nosali Abrahamgo aga te we Sara tigi munalubadi osogo taga peyu, tama aga pelama, te Hit hani we bidi dali po migi peyu, te hanu sunumiba pai. Agai te po wali, 4 “Ena te bulu wau bilibo bidi ede bidibaso, tama eno be tede me elalubeo. Eno te dage tomode te gų page nigabo tǫ pedai me badu mu abelama, tama eno we tede muainogo obao,” wali. [Hi 11:9, 13; Tpi 7:16]

5 Tama Hit hani bidi dabego te po wai, 6 “Woo, genuai bidio, nago dago po odao. Nage te da tomode bidibo genuai tobolu bidi deli dao. Nago we te dago wiegi yai gų pagede pubulao,” wali. “Te da me deli te dago te nago we pubulainu te gų page sainu ebaso, te dago me yogo eyu, dąų me wagobeo. Menio.” Te po wai.

7 Tama Abraham dolalu, tama aga tobolu te bulu page we bidi gesabiba aga tobolu aiyaba basi gulai. 8 Tama agai te po wai, “Te dagego eno we te badu pubula po weyu, usu da po obaso da, teda dagego te bidi mebolo waiąo, Efron te Sohargo ogwabolo hanalu wao. 9 Eno te ola be augwaligo te nogi weyu, te Makpela nogi yali, te eno abelaibao. Te Efrongo tǫ sesege pedai badu elalubao. Te dagego agabolo olama, te dage tigidali gedude te ola be agai enabolo momainu yaibao. Te eno agabolo te mone dolo bugagia mayu, tama dagego tǫ tomode te gų page eno gų page mu elaluaibao,” Abrahamgo te po wai.

10 Efron aga me te Hit bidi dabe bidalubo tomode te hanu sunumi elalubo pąde te po mibo pesagede augwali dali bididuai. Te Hit bidi dabe tigidali bidalubadi, tama augwaligo odali, te Efrongo Abraham dali te tiwai po wei ponani, 11 “Mu menio, genuai bidi. Eno po odao. Te eno te tǫ pedai tigidali me, te ola be gų page dali elalubo, te eno nage olo mu mawaibao,” po wai. “Te ena hani gedude te megi eno nagebolo menama, te nago we tede pubulagameo.” Te po wai.

12 Tama Abrahamgo aga tobolu te bulu page we bidi augwaliba basi gulai. 13 Tama augwaligo odali, agai Efronbolo te tiwai po wai, “Nago po wali dao. Teda eno te tǫ pedai tigidali abelaibao. Nago eno mone sao, tama eno ena we te tǫde pubulaibao,” wali.

14 Tama Efrongo te tiwai po Abrahambolo wei ponani, 15 “Genuai bidio, nago odao. Te tǫde mone te 400 mone silva masigi dabe dao. Tiali goli, tagala, te da si tomode olo bage tiwai elalubao. Te nago we tede pubulao,” wali. 16 Abrahamgo te usu da olama, tama aga mone te bisnis bidi dabego ebo kolesaga tiwai elama, bugula muani. Te Hit bidi dabe augwaligo te Efrongo te tǫde mone te 400 mone silva masigi nogi yali po wabo odali. Tama Abrahamgo te dobolama, tama Efron agabolo manio. 17 Te kolesagade Abrahamgo te Efrongo tǫ te Makpela te badu elaluali tǫ mu sai dao. Te tǫ pedai te giliga asobo badu te Mamrede elaluali, tama Abrahamgo te ola be dali, te tǫde elaluali tigidali ni dabe dali abelai dao.

18 Te Hit bidi dabe tigidali te po mibo madi bidali bidi dabego koneani, te tǫ megi da te Abrahamgo tǫ mu da walio. 19 Nosali Abrahamgo aga we Sara te ola be gų page te Makpela tǫde pubulai dao. Te tǫ bulu Mamre pąde dao, te augwaligo megi gasa nogi wabo Hebron, te Kenan tǫ pedai badu tomode elalubao. 20 Te tama tiyu, tama Hit bidi hani dabego tǫ, te gų page ola be elaluali dali, te Abrahamgo gų page tǫ mu gagawai dao.