1 Abrahamgo gasa we me sali nogi te Ketura dao. 2 Te wego ame nani ogwa wai dabe te Simran, Joksan, Medan, Midian, Isbak me Sua, tama dao. 3 Joksan te Seba de Dedan sigo aya pedelai. Tama te Dedango wai dabe te augwali hani wąį dabe te Asur hani, te Letus hani, me Leum hani, te augwa aya Dedango wąį dabe te tama dao. 4 Tama te Midiango ogwa dabe te e tama elaluai, Efa, Efer, Hanok, me Abida, me Elda. Te tigidali hani sibi wąį augwa auwa mosi te Ketura dao.

5 Abraham aga isabode, te aga nai me tigidali doado bage te Aisakbolo naga mena silai. 6 Tiali goli, aga bidibo sogo digi, te agai doado bage meba te aga gasa wego wai puluba augwaliba olo mani. Tama agai augwali te giliga pedalubo pedai badu tagala palama, te aga ogwa Aisak bidibo digi te augwali digibulu bidigi pomainu yali. Tama augwali pelama, te giliga pedalubo bulu te badu bidigi pai dao.

7 Abraham te kibu be umabo te 175 kibu be bidai. 8 Aga te monu dabe mu elama isibaso, tama augwaligo aga pubulali. Tama aga te aga polobadu isali wąį dabe augwali dali ma sisinanio, tama wabo. 9 Aga ogwa si te Aisak me Ismael sigo aga pubulali, te gų page dedage page te Mamre, te badu te Makpela ola be gų page te giliga pedalubo badu muani. Polobadu te tǫ pedai te Sohargo ogwa Efrongo tǫ, aga te Hit bidi hani me deli dao. 10 Abrahamgo te tǫ te Hit bidi dabe dali abelai. Augwaligo Abraham te aga we Sara polobadu pubulali madide, te tǫ pedai badu pubulai. [Gag 23:3-16] 11 Abraham isai digi, tama Godigo aga ogwa Aisak dali dwagi yai tau sabo sę yai. Aisak te wę ulu me deli pedalubo madi pąde bidali, te augwaligo nogi yali ‘Ena subo Bidibo Ula Elalubo Bidigo wę ulu.’

12 Te e da, te Ismaelgo wąį hani dabe e dao. Ismael te Abrahamgo ogwa te Hagargo ame nani. Hagar te Isip we me deli, te aga Sarago olo sę iduai we me deli bidai dao. 13 Tama Ismaelgo wai dabe nogi te gomunai waide gagalama, te ogwa bidi wai dabeba siminigi paibao, Nebaiot te Ismaelgo gomunai ogwa nogi, nosali te Kedar ame nani, Atbel, me Mipsam, 14 Misma, Duma, Masa, 15 Hadat, Tema, Jetur, Nafis, me Kedema. 16 Te augwali Ismaelgo ogwa dabe tama te augwali nogi dabe dali, te bulu dabe te tǫ pedai me te augwaligo pesage nigilama bidali, te nogi dali dao. Tama augwaligo tobolu bidi dabe te nogo si olama, sągągo si elaluali, tama nogo si olama, sągą si hani bidi dabe bidali. 17 Ismael te kibu be hauwa 137 kibu be bidama isibaso, tama augwaligo aga pubulali. Tama aga te aga polobadu isali wąį nǫų dabe dali deliba sisinama, bidigi pai dao, tama wabo. 18 Te Ismaelgo hani wąį dabe augwali te tǫ pedai Havila me Sur te tomo agebele side bidaluali. Te bulu te Isip pąde te Asur teba pabo sunumi te giliga pedalubo pedai badu elaluai. Te Ismaelgo hani augwaligo te haniani hani dali boi bidi homu ebaso, tama augwali digibulu bidigi pai dao.

19 Te e po da te Abrahamgo ogwa Aisak aga te tama bidali wabo po dao. 20 Aisakgo te Rebeka sali sogo te aga kibu be bidi sese si 40 elaluai. Rebeka te Betuelgo wegi da, aga te Aram bulu bidi me deli, te Mesopotemia pedai badu elaluai. Tama Rebeka te Labango abe, aga te Aram bidi me deli dao.

21 Te Aisakgo wego wai me ame nabeo. Tama tibaso, Aisakgo aga tobade gedu haluasa po weyu, te Yawego aga we tau somainu yai. Yawego te Aisakgo gedu haluasa po wabo odama, tama Rebeka haliga yalio. 22 Te Rebekago haligade te wai si elalu, tama augwa si tomode usu siyu begelali. Tibaso, Rebekago te po wali, “Te ebo kolesaga magi baso enaba pedelaliwe?” Agai te sę ebo page koneainu, teda agai Yawebolo gedu haluasa po hanalu wali. [Rom 9:12]

23 Tama Yawego te tiwai po Rebekabolo wai, “Te bidi hani si te nago haliga tomode bidibao. Te hani bidi si nago ame nainu ebaso, te augwali si dali si ususu si yainu ebao, tama nosali hani si bugulama, tedali bidaibao. Te me hani deligo gasa hani me dali bomo mu yaibao. Tama polasa te ame nabo wai aga te nosali ame nabo waigo sę ebo bidi pedelaibao,” Yawego Rebekabolo te po wei ponani.

24 Tama te tiabo sogo bodolu pedelama, tama mu tama Rebekago te wai ogwa si ame nani. 25 Te polasa ame nani waigo tigi da, te mama mu elama, tama tigi tu nisi hauwa elaluali, te hasa nisi tiwai yai. Tama tibaso, augwaligo aga nogi Iso poali. * Te Hibru pogo te nogi Iso te page tama elalubo, te “nisi hauwa” tama wabo.

26 Te nosali pedelali wai ogwa aga ame nobadi tama aga nogogo te Iso sągą gabulude tolalubadi, tama ame nani. Tama augwaligo aga nogi Jekop poai. † Te Hibru pogo te nogi Jekop te page elalubao, te “sągą gabulu tola sabo bidi dao,” tama wabo. Tama tede po digi po wabo begelama, tama te nogi page “te tibo po weyu, tama gasa bidigo magi nai sabo bidi dao,” tama wabo. Te sogo Aisakgo kibu be te 60 kibu be elalubo sogo Rebekago te wai si ame nani.

27 Te ogwa si genuai elama, tama Iso te bulu hasa gegebo koneai bidi mu bidali. Aga te bulu hasaba naga pabo sę ebo bidi bidai. Tiali goli, Jekop te subigila me bilisiąbo bidi dao. Aga te augwaligo ugwa be dabede naga bididuai. 28 Aisakgo te Iso godolo elaluai, magi baso meni, agai te Isogo elebo bulu hasa tuyu, wiegi yai homu pemene iduali. Tiali goli, Rebekago Jekop agai godolo homu yali.

29 Me sogo side Jekopgo te nai tegabi sup uludubadi, tama Iso te bulu hasa gegegi pelama, ugwa beba ma sabolali. 30 Aga moni nasi ebaso, tama agai Jekopbolo te po wai, “Ena nasigo mu dwalio. Te ulali mama yai naigo ena dwasianu mao, tuaio,” wai. ‡ Te Hibru pogo te nogi Idom te page elalubao, te “mama yai,” tama wabo. (Tama tibaso, nosali augwaligo aga nogi Idom poali.)

31 Tiali goli, Jekopgo te tiwai po wei ponani, “Da si dobu si inao. Hasia bolo nago enabolo te nage gomunai ogwa da nogi wabo po te enabolo mobaso da, teda nosali eno te ulali sup nai nagebolo mawaibao,” wali. § Te Hibru dabego ebo kolesagade te aya isibo side, te gomunai ogwago aga ayago doado bage meba hauwa siyu, tama i badu ogwago te meba dwasianu naga siyu yali.

32 Tama Iso te po wai, “Te usu dao. Nasi baso te pąde ena isabo homu ebo, tama ena te gomunai bidi elalubo nogigo te enabolo magi nai magowe?”

33 Tama Jekopgo te po wali, “Tiali goli, nago hasia bolo te nago po dąų weyu, tama po wao, ‘Eno te enade elalubo gomunai bidi nogi te Jekopbolo mu mobao. Tede eno tibo po obaso da, teda eno homugo te Godigo ena ela muao,’ tama po hasia bolo wao,” Jekopgo te po wai. Isogo te mu po naga da dąų wabo po ola silibo si, tama aga te gomunai ogwa nogi elaluali te nogi Jekopba mawai. [Hi 12:16]

34 Nosali Jekopgo te bret meba dali, te sup me mawai. Iso aga te nai polo tuyu, wę tuyu yai. Nosali aga hogodama, palio. Agai te aga gomunai bidi da, tama aga aya isibosi da, teda aga doado bage hauwa sabo bidi dao, tede te olo nai naga dao homu elama, tama tagalalio.