1 Tialima, Josepgo te tiwai po Ferobolo wagi pali, “Te eno aya me, eno ama dede dali, augwali te Kenan tagalama, tama megi eba sabolalio. Augwaligo te sipsip dabe me, te bulmakau me, tama augwa doado bage tigidali selasa asai. Augwali megi te Gosen tǫde bidibao,” wali. 2 Tama Josepgo aga ama dede a naga sela pelama, tama agai augwali te Ferobolo ola magi pali. 3 Tialima, Ferogo augwalibolo hanalu wali, “Dagego magi sę ebo dawe?” Augwaligo te po wai, “Genuai bidi, dago te sipsip dabe te dena ayago polobadu yali tiwai, te dago me te sipsip dabe tonalubo sę ebo dao. 4 Da te e bulude bidiyu, sę yainu asali, magi baso meni, te nasi genuai te Kenan tǫde eyu, tama dago sipsip dabe te tuabo nosai meni baso, da eba asai. Tama dago homugo te nago dabolo usu da po obaso da, teda da te tǫ Gosende osogo bidaibao,” wali.

5 Tialima, Ferogo Josepbolo te po wali, “Te nago aya me, te nago ama dede dali, augwali te asalio. 6 Te Isipde wiegi yai tǫ hauwa te elalubao. Nago me deli gegelama, tama augwali teba muao. Te augwali te Gosende bidainogo ebaso da, te usu dao. Tama nago koneani, te augwali mebago te bulmakau tonalubo sę kuna koneani homu eyu da, teda nago augwali te eno bulmakau tonaluabo bidi me nigilao,” wali.

7 Tialima, Josepgo te aga aya Jekop te Fero pageba odasa pali. Tama Jekopgo agabolo te “Eno homugo nage bugagia bidao,” wabo po te Ferobolo mani. 8 Tama Ferogo agabolo hanalu wali, “Nago kibu be nisu naga megi elalubawe?”

9 Jekopgo te po wai, “Eno kibu be te 130 elalubadi, te ena tigidali tǫ pedaiba bilali. Tiali goli, te kibu be dabe te bobage sogo sesabi elama bidisiąbadi, tama ena sęgę hauwa gegali. Te eno kibu be yali, te eno aya dabego yali kibu be te augwali bilali kibu beba usu nubeo,” wali. 10 Tialima, Jekopgo Ferobolo nage tao po olama, tama aga pali.

11 Nosali Josepgo aga aya me, aga ama dede dali, te Isipde bidimainu tau sali. Agai augwalibolo te Rameses hanu badu elaluali tǫ te augwali mani. Te tǫ te wiegi yai mu tama, te Isipde elaluali tǫ dabe tigidali aiyaba elaluali. Josepgo te Ferogo wali po tiwai gilama yai. 12 Agai te aga aya me, aga ama dede me, te augwa we wai puluba usu nama, te bidabo tubo nai mani.

13 Te genuai nasi mu pedelama, tama tigidali tǫ pedai badu nai meni yai. Tama te Isip me Kenan tǫ bidi dabe si te augwali bomo mu meni yai. 14 Josepgo te Isip de Kenan bidi dabego te wit abelali mone tigidali sisinama, tama agai te Fero pageba selasa pai. 15 Te Isip me Kenan tǫde bidali we bidi tigidaligo mone silali. Tialima, te Isip we bidi tigidali te Josepba pelama, tama augwaligo te po wai, “Nago da nai mao! Te meniyu da, teda nasigo da isaibao. Te nago da tau sabo sunumi me deli gegao! Te dago mone tigidali silalio,” wali.

16 Josepgo te po wali, “Te dagego mone mu silali wida, teda dagego kibu sibi dabe enaba selasa asao, tama eno dage nai mawaibao.” 17 Tialima, augwaligo te hos dabe me, te sipsip me, meme dabe me, bulmakau dabe me, te donki dabe me, te augwaligo Josepba sela asobaso, tama Josepgo augwali nai mani. Josepgo te tiwai sę ela pidubadi, te kibu be siligi pali.

18 Tama gasa nosali kibu be mede augwali te Josep pageba ma pelama, tama augwaligo te po wali, “Genuai bidi, dago sęgę ebo te nagebolo geme me dualugobeo. Te dago mone tigidali silibadi, te tigidali sipsip me bulmakau, te doado bage te nageba mena silai elalubao. Dago nageba maiabo nai me elalubeo. Te dago tigi dali, te dago tǫ dali si naga te elalubao. 19 Nago da te nasigo isimainu sula tagalamuo. Te nago da tau sabo sunumi me deli gegaibawe? Nago te gasa bidi dabego dago tǫ somainogo elamuo. Nago da me, te dena tǫ dali abelama, tama da nai mao. Te da Ferogo olo sę ebo bidi selama, tama agai dago tǫ me saibao. Tiali goli, nago da bulabo nai wai mao. Meniyu da, te da tigidali nasigo isiyu, tama te bulude bidi meni yaibao,” te po wai.

20 Te nasi bomo mu ebaso, te Isip we bidi tigidaligo te augwa tǫ Josepba menama, tama agai te tǫ tigidali abelai. Tama te Isipde tigidali tǫ te Ferogo tǫ naga pedelama, elaluali. 21 Tama te Isip tǫ pedai tigidali badu we bidi tigidali augwali te Ferogo sę olo mu ebo we bidi pedelali. 22 Te Isip bagego lotu wabo pris dabego tǫ naga te augwaligo me abelibeo. Ferogo te pris dabebolo mone menama, tama te monego augwaligo nai abela tuyu, bidali. Tama tibaso, augwaligo tǫ te me abelimainu me ebeo.

23 Te Josepgo te tiwai po te tigidali we bidibolo wali, “Dagego odao, te megi e sogode eno dage me, te dagego tǫ dali abelalio. Megi da, dage te Ferogo bage elalubao. Te e da dagego bulabo nai wai dao. Tialima, dagego te giba bulugi pao,” wai. 24 “Nosali te gide bulali nai tau elama, sabo si, teda dagego te nai bugulama, pesage a naga holama, tama a wali pesage Ferobolo mao. Te me si me si nama pesage te dagego sao, meba te wai bulao, me badu duga we wai dali tuabo nai muao,” wali.

25 Tama augwaligo te po wai, “Genuai bidi, nago da tau mu saligo, tama da me deli te gų pageba me mubeo. Tialima, megi da, nago homugo usu eyu da, da tigidali te Ferogo sę olo mu ebo bidi dabe pedelaibao,” wali.

26 Tialima, Josepgo te tiwai bomo yai po me deli te Isipde muani. Te gide nai inabosi da, teda augwaligo gide sabo nai bugulama, pesage a naga holama, tama a wali pesage te Ferogo nai dao, te bomai po te megi me elalubao. Te prisgo tǫ naga te Ferogo me sabe.

27 Te Israel dabe augwali te Gosen tǫde bidaluali, tama augwaligo wai dabe umabo hauwa mu ame nani, tama augwaligo doado bage me hauwa elaluali. 28 Jekop te Isipde bidibadi, te kibu be nogo si olama, sągągo a naga, me badu sągą si wagi soali, tama agai kibu be deliba sisinama, te kibu be 147 mu bidai. 29 Te pąde Jekop isainu yali. Tama tibaso, aga ogwa Josep i olama, agabolo te po wali, “Te nago enabolo usu da po weyu da, teda nago nogo si te eno sągą si tomoba munama, tama nago bomai po dąų mu weyu, te nago ena bugagia tonaluama, tama ena isibode nago ena te Isipde munu me pubulamuo. 30 Eno homugo nago ena te ena aya dede pąba pubaligi pao. Te ena Isipdu ugwaba tolasa pelama, tama ena te augwali muani gų pageba pubaligi pao,” wali.

Josepgo te tiwai po wei ponani, “Te eno nago po wabo gilama tama tiaibao,” wali. [Gag 49:29-32; 50:6]

31 Tiali goli, Jekopgo te po wali, “Megi nago te sę mu yaibao olama, tama mu dao po wao.” Josepgo te bomo yai po dąų walama, tama agabolo nage usu da po omainogo eyu, Jekopgo tobolu te aga betiba pǫgulali.