17
Te Juda dabego augwa sęgę sela sąwainu ebaso, usu egobeo
1 Genuai Bidigo te tama po wai,
“Dage Juda dabego duga sęgę me sela sągobeo.
Dagego tabi haliga te masigi togwai dage tiwai elalubao.
Te bidigo te masigi dagede po asębo nai nogi kolsisis
selama,
te dagego yali dwai sę dabe po te masigi dagede
togogo pelama,
elalumainu ebo tiwai yali.
Tama me te bidigo duga alta nigali gąų tede te po asębo
babaga pabo tiwai yali dao.
2 Sesemane sogo dage hanigo wai pulubago me
te tibo god altaba homu kone kone eyu,
te tibo god we Asera piksaba kone palu ebao,
te dagego genuai ni dabe dologode muyu,
me te tigidali bulu du bagede mubo dao.
3 Dage te bulu du dabeba pelama, lotu wagi pabo dao.
Tama tialima, eno te dagego mone tigidali,
me te wiegi yai doado bage dabe,
te boi bidi dabeba mawaibao.
Dagego dwai sę hauwa te duga tǫ kantri
tigidali usu nama ebao.
Tama eno te boi bidi dabego dagego
te lotu wabo pesage somainogo ilaibao wai dao.
4 Duga digi duga yali dwai sęde
te eno dageba mani tǫ taga paibao.
Ena digi dage te duga boi bidi dabego
olo sę ebo hani pedalumainogo ilaibao.
Te dagego konesiąwai tǫ kantriba pelama, bidigi paibao.
Eno haliga sębę te sia me deli dabo tiwai ebao,
tama dagego te sia ponama, tama te sia sesemane
mu elaluduaibao,” wai.
Bidi sigo ebo tobage kolesaga
5 Genuai Bidigo e tiwai po wali,
“Te bidigo ena tudiba munama, te homu eyu,
te bidigo naga bomo elalu,
te augwaligo aga tau sobaso,
bugagia bidaiba homu eyu da,
teda te bidi dolobo dao.
6 Te wa pai pesage bulu me delide dwasianu ni me
deli holai tiwai yaibao.
Te pesage bulude te ąį meniama,
tǫ te tamu hauwa elalubaso,
te ni me nosai tede me hologobeo.
Te tobage bidi te bugagia dugulalubo
pesage me sogobeo,” wali.
7 “Tiali goli, bidigo konealubo bomai po Genuai Bidi,
enaba elama,
tama eno naga aga tau sabo te homu konebaso da,
teda eno te bidiba wiegi yai sę bugagia mu yaibao.
8 Aga da, te augwaligo wiegi yai ni te ąį pagede bulali
tiwai ebao.
Te nigo bono sele te aiyaba dulama, te ąį sigulali.
Te genuai giliga nanobo side, te nigo wi me egobeo.
Menio.
Aga yabe te kebasi yai sesemane elalueibao.
Te tulubage menibo sogo, aga homu si me egobeo.
Menio.Aga nai sesemane waludubo dao,” wali.
[Tib 1:3]
Genuai Bidigo tigidali bidigo kolesaga dagalaibao
9 Genuai Bidigo te tama po wali,
“Tigidali bidigo haligade tibo kolesaga
sesemane yabo homu kone kone iduaibao.
Bidigo homude dwai mu elalubo dao.
Tama dego te page mu konegowe?
10 Ena Genuai Bidi, eno te tigidali bidigo homude me
haligade ebo kolesaga osola sueibao.
Tama eno tigidali bidi deli deligo kolesaga dagalama,
tama eno te augwa yali kolesaga usu nama wei
ponobo dao,” wali.[Tib 62:12; Ped 2:23]
Kolesaga dolo isąbaso te mone pedalubaso, te hagawaibao
11 Te bidigo kolesaga dolo isąbadi,
te mone hauwa sobaso da,
te aga te ba me deligo te gasa bago ge wi selama,
tama te gede pedelali wai dabe sabo tiwai ebao.
Te bidigo mone tigidali te aga
monu dabe isąbadi hagawaibao.
Tama nosali, te bidi dabego koneaibao,
aga te homu kolesaga meni yai bidi tiwai yalio.
Te Israel dabego Genuai Bidigo augwali tau sabo tonaluai
12 Dena Godigo be da, te God aga dugulalubo sia king
tiwai elama,
te wiegi yai mu elalubao.
Polobadu mu aga genuai nogi elaluai,
tama tiwai me elalubo dao.
13 Genuai Bidio, sesemane sogo da Israelgo konealubo
po nageba dąų olama,
te nago da tau sabo tonalubao.
Te bidi dabego nage tudiba muani,
augwali hale dwai mu yaibao.
Polo tama te bidi dabego augwali homu kone palubo
tagalu,
te nogi me deli homu kone gegeda pabo tiwai eyu,
bidigo te tǫ hogomude asęai po polo hola pabo
tiwai yaibao.
Genuai Bidi, nage te ąį ulu tiwai dabolo ula mabo tiwai
ąį elalubao.
Tiali goli, te bidi dabego nage tagalobo dao.
Jeremaiago Genuai Bidiba hanaluama, aga tau somainogo yali
14 Genuai Bidi, eno homugo nago ena gasi usu ilama,
te ena wiegi yai ma pedelaio.
Nago ena me selama, te ena bugagia bidainogo yao.
Eno nageba naga genuai nogi mabo dao.
15 Te Israel dabego enaba posobo po te tiwai odu gebao,
“Magi baso te dwai sę dabe te Genuai Bidigo yabo po
wabo da, agawe?
Te sę agai yabo homu ebaso da, teda aga megi tama
ebaso usu dao,” wabo.
16 Genuai Bidi, nago enabolo naga te we bidi hani
tonalubo sę mawai,
tama eno te sę me tagalobeo.
Te nago koneai, eno te dwai sę te we bidi dabeba tagala
palao po olama, me wabeo.
Eno pusubo po tigidali nago bugagia konebo dao.
17 Nago ena wi dwai mu me iligio. Menio.
Te dwai sogo nage te ena geme bugagia dula sabo
pesage tiwai ebo dao.
18 Tama megi eno homugo nago te enaba dwai posobo
po sę ebo bidi dabeba hale ilama,
te augwa homu dolomainao.
Tialima, nago ena homu dolobo sę me isąyu,
te ena hale me iligio.
Eno homugo nago te dwai sę ebo sogo augwaliba
pedalumainogo ilao,
te nago augwali dwagila augwali mu doloyu da yao,
ena Jeremaiago te po wai.
Juda dabego te Sabat side bomai po wali piąo wali
19 Genuai Bidigo enabolo te tama po wai, “Jeremaiao, nage pelama, te taun obo bagulali pabo genuai sunumiba doligi pao, augwa nogi eyu te We Bidi Dabego Sunumi dao wali. Te Juda king dabe te sunumidu tomoba soyu, bulu teda soyu ebo, te sunumi te taun bagulali genuai obo te badu elalubao. Tama me te Jerusalem gasa genuai sunumi deli deliba nage pelama, doligi pao. 20 Tama nago te tiwai po pusao, ‘Dage Juda king dabe, me dage tigidali Juda, me Jerusalem, dage tigidali te sunumidu eda asu, iba soyu ebo we bidi dabe, dagego Genuai Bidi eno poba bugagia olo muyąo. 21 Ena Genuai Bidi, eno te tiwai po obao, te dage bugagia bidabo homu ebaso da, teda dage te Sabat side walu me tolisąma, te dagego walu tolama, te side Jerusalem tomoba me aselamu dao. [Neh 13:15-22] 22 Tama me, dagego duga bede te doado bage dabe selama, te Sabat side te gasa tolasa peyu me igimio. Te side te dagego te sę ebo habu mu selibao. Dagego te Sabat sogo te eno side da olama, dąį ilao, te eno duga wąį nǫų dabeba te tiwai tama po wai dao. [Sai 20:8-10; Bom 5:12-14] 23 Tialima, duga wąį nǫų dabego eno po me odama, wali me pabeo. Menio. Augwa hagoma naga eyu, tama augwa te eno wiegi yai kolesaga ola mabo hagela homu yai dao. 24 Tiali goli, dagego da, Genuai Bidi eno po wali peyu, tama dagego walu dabe te Jerusalem tomoba te Sabat side me sela asigimio. Menio. Te Sabat sogo dagego eno side da olama, dąį ilao, tama te side sę ebo habu mu sao. Te dagego eno po wali pobaso da, 25 teda sesemane sogo te king hani te Devitgo hanide naga pedelama, te augwali Jerusalemde king bidaibao. Tama te king dali, te ofisa bage dali, augwali te hos dabede dualama, te karisde dolalua peyu, te Jerusalem sunumidu eda asu, iba soyu iduaibao. Te sesemane sogo Jerusalemde te we bidi bidaluyu, te Juda me Jerusalem dabe te sunumidu eda iba soyu iduaibao. 26 Te we bidi dabego te tigidali tǫ kantri pedai taga soyu, te Genuai Bidi, eno beba ofa sela asaibao. Te Juda taun we bidi dabego, me te Jerusalem pąde, me te Benjamin hani tǫ bage me, te bulu du bagede bidibo bage me, te giliga degasa dulubo pedai dwasianu bulu du badu bidibo bage me, te Juda te saut pedai badu bidibo bage me, tigidali te enaba asaibao. Tama augwa te siaba tigidali domainogo ulubo ofa, me te gasa ofa dabe kibu hasa, me te wit ulubo ofa dabe, me te wiegi yai denami holomainogo ulubo ofa, me te enaba usu da wabo, te tama ofa dabe sesaibao. 27 Tialima, dagego eno po wali me pisąma, te dagego Sabat side te eno side da olama, bodolu te side munama, tama dagego te Jerusalem tomoba te Sabat side da wali sogo te walu doado bage sesebaso da, teda eno te sunumi siago domainogo ilama, tama te sia genuai domainogo elama, te Jerusalemde elalubo genuai bomai be dabe domainogo yaibao. Tama te isi dabo polo sula sogobeo,” te po wai dao.