Genuai Bidigo po te haniani kantri dabede elaluai
46
( Dąį 46-51 )
Te hwįnama, boi bidi dabego Isip dabe aiyaba elaluai
1 Genuai Bidigo po te haniani tǫ kantri dabede elalubaso, tama agai te po Jeremaiabolo mawai dao. * Te Jeremaiago Godigo po te Jerusalemde pusali sogo, me sogo Godigo te gasa bulu kantri dabego po agabolo mawai. Augwaligo te po dabe deliba sisinama, munama, te profet Jeremaiago bukude asęna siligi pai dao.
2 Po me deli Isipba palio. Te po te Isip king Neko tego ami dabeba po ola tolali. Te ami dabe te taun Karkemisba sabolali, te wę Yufretis pąde dao. Te kibu be me si me si wabode te Jehoiakim, te Josaiago ogwa, te Juda king bidibo sogo, te Babilon king Nebukatnesargo ami dabego te Isip ami dabe dali boi hwįagaselama, tama te hanu Karkemisde augwali aiyaba elaluali. Te Isip ami tobolu bidiba pusabo po e tiwai dao,
3 “Dage Isip dabe, dagego te awa sabele dabe selama,
te boi hwįabo sisi yao,” te po wai.
4 “Dagego kibu hos dabe dodolao.
Te dage hosde dugulama, hwįabo ami dabe,
dage te duga hos dabede dugayao.
Dagego duga kapago nigai madi munama,
te lainde wasilama, te hwįabo sisilaluao.
Te duga ene dabe dodolama,
te dage deli deligo te kapa holobo ugwa gudama,
bidao,” wali.
5 “Tialima, megi da, magi ebawe?
Ena Genuai Bidi, eno suali, te Isip dabe wi mu elama,
te edaba wi ma begasa asobao.
Te boi bidi dabego augwaligo bomai ami bidi dabe
aiyaba mu elalubaso,
te Isip dabego boi hwįani tagalama,
te umagia mu ma begasa asobao.
Augwaligo begelama, tudiba me tonobeo.
Magi baso meni, te bidi dabe wi ilibo nai dabe te
augwali tigidali badu elalua pabo dao.
6 Te asesa polo mu udabo bidi,
ma te hwįbo bomai bidi tagalao,
augwali te boi bidi dabede wi painu ebaso,
usu me egobeo.
Menio. Augwali esela pabo bidi tiwai umuna palama,
te wę Yufretis pąba tulalueibao,
te not badu tama tiaibao,” wali.
7 Mena hani dabe te wę Nail tiwai te tǫ kantri Isipde
pedelama,
te genuai wę bomo elama, asobo tiwai ebawe?
8 Te Isip hani dabe tama dao.
Augwali te genuai ąį Nail tiwai pedelama,
tama te genuai ąį bomo elama asobo tiwai ebao.
Kantri Isipgo te tiwai po wai,
“Ena te genuai pedelama,
te tigidali tǫ habu mesega saibao.
Tama eno te taun dabe dali,
tede bidalubo we bidi dabe dali dolaibao.
9 Dage eno hos dabe, dage udayao.
Dage eno karis dabe, dage umagia mu udayao.
Dage eno bomai ami bidi dabe,
dage te tǫ kantri Sudan me Libia ami dabe,
dage te hwįbo sabele tolasa pabo bidi dabe,
dage Lidia ami dabego,
dage te enesigigo enebo koneai bidi,
dage tigidali te boi hwįgi pao,” te po wai.
10 Isipgo te tama po wai, tialima,
te hwįbo sę te Godigo sę tama,
te Tigidali Bomo Elalubo Genuai Bidi dao.
Te sogo aga boi bidi dabeba dwai dene wei ponaibao.
Te bomai boi mu hwįnama, te bidi dabe isila paibao.
Te bainat hwągo nasi mu ebaso, te bidi dabe tigi tuyu,
te kaneme tueibao,
tama te bainat mu pągąna paibao.
God, Genuai Bidi Tigidali Bomo Elalubo dao,
te hani dabe elama,
te aga te wę Yufretis badu pąde te ofa ebo tiwai
yaibao, te not badu dao.
11 Genuai Bidigo te tama po wali,
“Kantri Isip, nago te gesi wegi aga tigide te keni me
deli pedelai tiwai elaluai.
Nage te Gileat badu pelama,
te wiegi yai marasin me deli gegegi pao.
Tiali goli, nage te haniani marasin sabo sę dene odolali
yaibao.
Te marasin me deligo nago keni me deli pedela
somainogo ebaso, usu me egobeo.
12 Te nago ami dabe wi tedela peyu,
te augwa tigide digi hudula palama,
te augwa deliba tula muaibao.
Nage te boi hwįani tulalubaso, te nage hale mu elama,
te gasa tǫ kantri dabego nage hale yali po odaibao.
Te nago gela wali te tigidali tǫ pedai usu naibao,”
te po wai.
King Nebukatnesargo Isipba boi hwįagasaibao
13 Genuai Bidigo po me deli te profet Jeremaiabolo mawai, te Babilon king Nebukatnesargo te Isipba hwįagasali sogo. Te po e tama wai dao, [Jer 43:10-13]
14 “Dagego te taun Mikdol, me Memfis, me Tapanes,
me te gasa Isip pedai badu, teba te po hanilama,
pusao.
Augwaliba te tiwai po wao,
‘Dage Isip te hwįabo sisilama, dolaluao.
Magi baso meni, te boi bidi pedelama,
te dage ela mubo sę yaibao.
15 Te magi elama te Apis,
te bulmakau omai tiwai tibo god me deli dagego
nigali,
aga te wi pelama, te bomo elama, dolalube dawe?
Te page e tiwai elalubao.
Genuai Bidigo digi te aga tula paliyu sąwaibao.
16 Te Genuai Bidigo te Isip hani hauwa tulalubo sę
ilaibao.
Te gasa bulu kantri we bidi augwade digi te tama po
waibao,
“Te bageo, dago te Isip tagalama,
te dena hani we bidi dabeba ma pelainao.
Te boi bidi dabego te bulu kantri dolobo sę ebaso,
tama da dena page buluba ma pinao.” ’
17 Te augwa buluba ma sabolama,
tama te Isip kingba te tiwai gesi nogi mawaibao,
Odolali Po Dagą Olama, Hagoma Eyu, Te Sę Yabo
Sogo Hagawai dao, te nogi poaibao.”
18 Tialima, te king mu bidibo kingo nogi,
te Tigidali Bomo Elalubo Genuai Bidi dao,
te agai te tiwai po wali,
“Ena Genuai Bidi, ena sesemane sogo bidada paibao,
eno po dolo obao, bidi me deli asaibao,
tama te bidigo bomogo te gasa bidi dabego bomo aiyaba
elalueibao,
te bulu du Taborgo te gasa bulu du dabe
aiyaba elalubo tiwai yaibao,
tama te bulu du Karmel te tamu ąį nambisde ugwadu
mu elalubo tiwai yaibao,” wali.
19 “Dage Isip dabe, dage gasa kantriba kalabus igi
paibao,
te duga doado bage sisi ela muao.
Te boi bidi dabego te taun Memfis dolama,
tama te taun olo elalu, bidi tede me bidigobeo,”
te po wai.
20 Genuai Bidigo te tama po wai,
“Isip te sawi yai gesi so bulmakau me deli tiwai elaluai.
Tiali goli, te dwai bolia me deligo te not badu tagalama
asu,
te aga gąų kelagasobao.
21 Te Isip dabego te gasa hani bidi dabe te augwa ami
bidi pedalumainogo abelali.
Te Isip dabego augwali bugagia tonalubaso,
te augwali bugagia mu bidali,
te nisai bulmakau tiwai yali.
Tialima, te boi bidi pedelabo sogo,
te bidi dabe te hwįbo tagalama, wi paibao,
te gasa Isip ami dabego me te tiwai yaibao.
Augwali te bomo elama,
dolalu me hwįbeo, magi baso meni, te dwai sę ebo
sogo mu augwaliba pedelama, te augwali dolaibao.
Te sogo te augwa yali dwai kolesagade usu nama,
te augwali dwai dene mu saibao.
22 Te genuai boi bidi hani asobaso,
te Isip dabe wi elama, wi pelama,
te augwa genuai posolu me wagobeo.
Augwa te posolu wabo te hasamani wi peyu,
kili kili wabo tiwai yaibao.
Te boi bidi dabego te hwągo ni dabe gelainogo asobo
tiwai elama,
augwa sigi hwą tolasa asaibao.
23 Te Isip dabe hauwa ebaso, te bomo umabo elaluali,
te bulu tomode ni dabe benegelama elalubo tiwai
mu elalu,
te bidi dabe tomoba pabo usu meni yai.
Tialima, te boi bidi dabego namba te umabo mu
elalubaso,
te kuli mano genuai hani dabe aiyaba elaluali.
Tibaso, ena Genuai Bidi, eno te po obao,
te boi bidi dabego te Isip dabe mu silaibao,
te bidi dabego te bulu tomode ni dabe gela silibo
tiwai yaibao.
24 Te Isip dabe eno te not badu hani bidi dabe nogoba
mubaso,
te Isip dabe hale dwai mu yaibao,” wali.
25 Tigidali Bomo Elalubo Genuai Bidi, aga te Israelgo God, agai te tiwai po wali, “Odao. Eno dwai dene te Emonba tamadi mawaibao, te Tebes taunde tibo god dao, te Isip king dali, te we bidi dabego me, te homu eyu, te kingo augwali tau selama, bugagia bidaibao homu ebao. Eno te dwai dene mabo sę te Isip kantri we bidi dabe dali, te augwa god dabe, me te aga kingba te dwai dene mabo sę yaibao. 26 King Nebukatnesargo aga ofisa dabe daligo te Isip dabe ela muainogo yaibao. Tama eno te Isip dabe te Babilon dabego nogoba mawaibao,” wali.
“Tialima, nosali da, te we bidi dabe te Isipde polobadu bidali tiwai ma bidaibao. Ena Genuai Bidigo, eno te po wai dao,” wali. [Ais 19:1-25; Ese 29:1-32:32 ]
Genuai Bidigo aga we bidi dabe ma saibao
27 Genuai Bidigo te tama po wali, “Dage Israel, dage Jekopgo hani, dage eno sę bidi me sę ebo we dabe, dage wi me elama, dwai noma me sigio. Mu tama, te eno dage kalabuside bidibo digibulu bulude bidibadi, te eno dage ma saibao. Te dage duga tǫba ma aselama, bugagia bidagameo. Te mena hani me deligo dage wi me iligobe dao. 28 Dage Israel, dage eno hani, dage eno sę bidi, me sę ebo we dabe, dage wi me igimio, magi baso meni, ena Genuai Bidi, ena dage dali bidibao. Eno dage sela sąnama, te augwali dali dage bidigi pali hani dabe te eno augwali mu silimainogo yaibao. Dagego te dwai sę yali dao. Tama eno dage dodolobo sę igi menigi da, te dolo meni da. Tama tibaso, eno dage e tǫde sela sąwaibao. Tiali goli, dage da, eno me siligobeo. Mu tama, eno dwai dene dagebolo mawai, tialima, te eno doloba pai kolesaga wali peyu, te eno dage dodolobo sę yai dao,” te po wali. [Jer 30:10-11]
*46:1: Te Jeremaiago Godigo po te Jerusalemde pusali sogo, me sogo Godigo te gasa bulu kantri dabego po agabolo mawai. Augwaligo te po dabe deliba sisinama, munama, te profet Jeremaiago bukude asęna siligi pai dao.