1 Te silama, tama Jisas aga Galili genuai tǫba pelama, tede bidiyu, te me me buluba bilalio. Juda bage augwaligo Jisas elainogo yai, tama tibaso Jisas aga te Judia genuai tǫ te badu me bilibo te hagela yai. 2 Tama Juda bage olo bidibo side, te augwaligo nogi te nami ugwa bede bidabo side, te olo bidibo si te pąba yagasai. 3 Tama tibaso aga ama dabe augwaligo Jisas agabolo te po wai, “Nage e bulu tagalama, tama nage Judia moni tǫba pao, te nago ebo sę te naga wali pabo we bidi augwaligo te sę sumainogo yao. 4 Bidi me deli agai homu te tigidali we bidigo aga sumainogo, te agai ebo sę me geme dualama ebo menio. Te tiwai, nago te sę eyu da, tiali da, nage tigidali we bidi gedude augwaligo nage sumainogo, waselao,” aga ama dedego te po wai. 5 Magi basowe? Aga ama dede augwaligo agabolo bomo yai homu dąų olama, mubeo, tama tibaso augwaligo te nage te moni Judia tǫba pao po wai.

6 Jisasgo augwalibolo te po wai, “Eno side te polo pedalobeo. Tialima, tigidali sogo te dagego side dao,” wai. 7 “Tǫde we bidi augwaligo dage dali sębę elama, boi bidi me ebo menio. Tialima, augwaligo ena dali sębę elama, boi bidi mu ebo dao. Magi basowe? Eno augwaligo ebo dwai kolesaga bolo eno augwali dali po wabo dao. 8 Dage naga ugwaba holiąo, te Juda bage augwaligo olo bidibo side te dagego sugi pao. Tialima, ena teba pabo me elalubo. Eno bodolu mani si te me elalubo,” Jisasgo te po wai. 9 Jisasgo agai tama po augwali dali wai, tama aga Galili bulude bidai.

10 Tialima, Jisas aga ama dede augwali Juda bagego olo bidibo side ebo sę sugi pai. Sugi pelama, tama nosali Jisas aga me holai. Aga teba hania me holobeo. Jisas aga geme pai. 11 Te Juda hani tobolu bidi dabe augwaligo te side aga gegebo sę yai. Tama augwaligo te po wai, “Te bidi mena bidibowe?” te po te Juda bagego hanalu wali. 12 Tama te we bidi augwa hasi pomu po hauwa Jisasde wali. Mebago te po wai, “Te dwagi yai bidi dao,” wai. Tialima, mebago te po wai, “Agai augwali we bidi ili po ola mabo dao,” Jisasde te we bidi augwa hasi te pomu po wai. 13 Tialima, augwaligo te Juda tobolu bidi dabe suyu, wi yai. Tama bidi deligo Jisasde aga po hanilama me wabeo.

14 Te Juda bagego olo bidibo si tomode mu Jisas te Moni Lotu Be tempel tomoba holama, te we bidi po ola mabo gagalali. 15 Tama te Juda bage tobolu bidi dabe augwaligo agai ola mabo pode noma sali. Augwaligo te po wai, “Te bidi aga te skulba pisąwai bidi dao. Te tiwai bidama, tama agai mena sę ilama, te po page hauwa konebo dawe?” augwa hasi te po wai.

16 Te Jisasgo augwalibolo te po wei ponoyu, te po wai, “Te po eno dagebolo ola mani po da, te eno po menio. Te God agai po dao, agai ena tagala palobaso, ena asai dao. 17 Niwai bidigo Godigo homu kolesaga wali pabo bidi agai eno ola mabo po page koneagameo. Eno te we bidibolo ola mabo po menade saliwe? Te Godigo po dawe? Ma eno homugo naga te po obawe? Niwai bidigo Godigo homu kolesaga wali pabo bidi agai eno ola mabo po page koneagameo. 18 Bidi mego agai homugo digi po wabo bidi da, te bidi aga genuai nogi aga digi sainogo tibo dao. Tialima, bidi homugo tego ena tagala palama, ena asai da olama, agai Godigo nogi ugwaba siyu da, te usu yaibao, te tebo bidi da doloba pai bidi da, agade tibo dwai sę me isiąwai bidi dao. 19 Polobadu Mosesgo dage te Godigo bomo yai po mawai dao. Tialima, dage tomode bidi mego te bomo yai po wali pabo menio. Magi baso dagego ena elainogo ebawe?” Jisasgo te po hanalu wai.

20 Te we bidi augwaligo Jisasbolo po wei ponoyu, te po wai, “Dego nage elainogo ebawe? Woo, noma bidi dwai me deli nagede bidibaso, nago te po wali,” te olo we bidi augwaligo te po wai. 21 Jisasgo augwalibolo po wei ponoyu, te po wai, “Ena bomai sę me deli te Sabat sogode ebaso, dage tigidali noma sali. 22 Moses agai dagebolo te bomo yai po polobadu mawai dao, ogwa ame nenama, a naga bidama me badu nogo sela wabo side, aga tigiwali togwa, dąį ilao wali. Duga wąį mu te po me wai dao, tama nosali Moses me agai te bomo yai po asęani. Tama te bomo yai po bolidali weyu, me sogo Sabat sogode dagego ogwa tigiwali togobo sę ebo dao. [Gag 17:10; Prs 12:3] 23 Dagego te tigiwali togobo bomai po wali peyu, te Sabat sogode me sogo te sę eyu da, teda dagego enade magi baso sębę ebawe, ena te gasi yai bidigo tigi eno dodolobo sę yalide. 24 Dagego gedugo naga ena olo dali osola sulamuo. Dagego bugagia osola suyu, homu kolesaga dolo mu yao,” Jisasgo te po wai.

25 Te Jerusalem we bidi mebago noma dwasianu siyu, te po wai, “E bidi te tobolu bidi dabego elai hagede yali bidi dawe? 26 Suao. Agai po bidi gabidide te wabao. Tialima, augwaligo Jisas dali po me wabeo. Dago tobolu bidi dabe augwaligo me e homu ebawe, ‘Te bidi Jisas da te Krais da, te sa muyu asaiba wali bidi,’ augwaligo te homu ebawe? 27 Tiali goli te asaiba wali bidi pedalobo si, te bidi me deligo agai page bulu me konegobeo. Me ma, dago e bidi Jisas agai page bulu te dago kone dao,” te we bidi mebago te po wai.

28 Tama Jisas agai te Moni Lotu Be tempel tomode te we bidi agai po ola mobadi, agai i bomo elama weyu, te po wai, “Ao, dagego ena koneai dao, eno page bulu be dagego koneai dao. Tiali digi, ena homugo digi ena me asobeo. Ayago ena tagala palobaso, ena asai dao. Agai kolesaga te mu tama dao. Dagego aga me konebeo. 29 Tiali digi eno da God aga koneai dao. Ena da aga dali bidai. Agai ena tagala palai, e tǫba. Tama tibaso, eno aga mu koneai dao,” Jisasgo te po wai, te Juda dabe dali.

30 Tama tibaso, te Juda bage tobolu bidi dabe augwaligo Jisas aga kalabus ilainogo yai. Tiali digi, agai sogo meba elalubuo, aga bodolu mani sogo asobeo, tama tialima bidi me deligo aga nogo me tubeo. Menio. 31 Me ma, te olo we bidi hauwago Jisasbolo augwa konealubo homu dąų olama, elaluali. Augwaligo te Jisasba homu musiąwai bagebolo te po wai, “Te God agai sa muyu, asaiba wali bidi pedalobo si, te bidigo bomai sę hauwa mu eyu da, Jisasgo yali bomai sę aiyaba elaluaibawe? Menio,” augwaligo te po wai

32 Te Farisi hani bidi augwaligo te olo we bidigo Jisasde te tobage po pomu po wabo odali. Tama te po odama, te Farisi hani bidi dabe dede, te pris tobolu bidi dabe dede, augwaligo enesigi bidi dabe tagala palama, Jisas kalabus yainogo, “Sigi pao,” wai. 33 Tialima, Jisasgo te po wai, “Dwasianu sogo ena dage dali bidaibao. Te silibo si, ena te ena tagala palai bidi pageba ma paibao. 34 Tama dagego ena gegebo sę yaibao, tiali digi dagego ena me sugobeo. Magi basowe? Dagego ena bidabo buluba me pogobeo,” Jisasgo te po te Juda dabe dali wai. 35 Tama Jisasgo te po obaso, te Juda dabe tobolu bidi augwa hasi po weyu, te po wai, “Te bidi Jisas aga menaba pai digi, dago aga gegelama, sugobewe? Jisas aga te Grik po wabo bidi dabego moni be naniba pogowe? Tede Juda bage me badu bidibo dao. Tama Jisas teba pelama, agai te Juda dabe me, Grik dabe augwalibolo te po ola magi paibawe? 36 Agai dabolo te po wai, ‘Dagego ena gegebo sę yaibao, tiali digi dagego ena sugobeo.’ Agai te po me wai, ‘Dage ena bidabo buluba me pogobeo.’ Jisasgo te wali po page mena tamawe?” te Juda dabe tobolu bidi dabe augwa hasi te po wai.

37 Te olo bidibo si silibo side, te genuai side dao, wai. Te tebo side Jisas dolaluyu, bomo olama, i wai, “Bidi me deli ąį nogone ebaso da, te bidi ena pageba aselama, ąį tuagasao. 38 Godigo wali po asęani bukude te po asęani po gilama, ‘Bidi mego enabolo homu dąų olama, mubaso da, ta, te bidigo homu kolesagade te bidabo bomo elalubo ąį hauwa mu ulu pedalama, bilaibao,’ wai,” Jisasgo te po wai. [Ese 47:1; Sek 14:8] 39 Jisas agai te ąį po te Godigo Mobo Bidide wai. Augwa homu dąų olama, Jisasba mubo we bidi teba Godigo Mobo Bidi nosali asaibao. Tiali goli te sogo Jisas aga bomo dali moni nogi dali sisąbadi, God agai Mobo Bidi te we bidibolo mabe, te nosali mawaibao.

40 Meba we bidi augwaligo Jisasgo wali po odolama, te po wai, “Mu tama, te bidi Jisas da te polasa asobo bidi, te Krais aga asobo sogo te pąde tama dao.” 41 Meba bidigo te po wai, “Te aga da, te Godigo sa muyu asaibao wali bidi dao.” Tiali digi mebago te po me wai, “Woo, Godigo asaiba wali bidi te Galili bulude pedalogobeo. 42 Godigo nosali yabo sę po ola mani profet bidi mego bukude asęani po, te po me deli te tiwai dao, Godigo asaibao wali bidi te Devitgo hani asali digi tedu asaibao, te be nani nogi Betlehem tedu asaibao, te bulu polobadu Devit aga page bulu dao,” bidi mebago te po wai. [Mai 5:2] 43 Tama tibaso, te we bidi augwali bidi hani si tomode bugwai, te Jisasde. 44 Meba bidi hani augwaligo homugo Jisas kalabus yabo homu yai. Tiali digi bidi me deligo Jisas agaba nogo me mubeo.

45 Te geasa pelama, enesigi bidi dabe augwali te pris tobolu bidi dabe dali, te Farisi bidi dabe dali, augwali bidibo digi sabolai. Tama te tobolu bagego te enesigi bidi dabe hanalu wai, “Magi yaliwe? Dagego te bidi Jisas sela asai meniwe?” 46 Te enesigi bidi dabego po wei ponoyu, te po wai, “Polobadu bidi mego Jisasgo wabo po tiwai munu me wai menio,” te po wai. 47 Tama tialima, te Farisi bagego dwai homu eyu, augwalibolo po wei ponoyu, te po wai, “Agai dage me ili po ola maniwe? 48 Da tobolu bidi hani dali, Farisi bidi hani dali dago Jisasgo wabo pode homu musiąbaso, te dagego me agabolo duga homu mugio. 49 Tialima, te olo we bidi hani augwaligo Godigo bomo yai po page konebeo. Tama tibaso, augwali Godigo gedude dola silaibao,” Farisi bagego te po wai.

50 Nikodemus te bidi polobadu Jisas pageba pai, te bidi te Farisi aga hani tobolu bidi me. Tama agai augwalibolo te po wai, 51 “Dago bomo yai po e tiwai dao, te olo bidi me po tų odosiąbadi, dago te bidibolo sęgę magobeo. Aga yali sę po dago odama, te aga dwai sę ebaso, teda dago aga po tų elama, sęgę mawaibao,” Nikodemusgo te po wai. 52 Augwaligo po wei agabolo ponoyu, te po wai, “Nage me nage Galili bulu bidi dawe? Godigo bukude po bugagia nedao. Nedelama, koneao, Godigo nosali yabo sę po ola mabo profet bidi me deli te Galili buludu munu me pedalogobeo,” augwaligo Nikodemusbolo te po wai.