Profet Jonago Buku
Hasia nedebo po
Jonago buku te gasa meba profet dabego buku tiwai mu menio. Te Jonago profet po hauwa me pusubeo. Menio. Te bukude olo Jonago yali sę dabe po naga pusai dao, tama me Jonago yali dolo meni yai sę yali po me asęanio. Godigo Jonabolo te genuai hanu Niniveba po pusigi pao po wali, te Godigo po odisąwai we bidi te haiden bage bidibo madi.
Tiali goli, Jona aga hagela homu yai. Tama hasia bolo aga Godide wi pabo bolo usu sali. Tiali goli, Godigo aga ma odasa asali. Tama te sogo Jona te Niniveba pelama, tama te profet po augwaliba pusigi pali. Tiali goli, agai suali, augwali homu begelebaso agai koneani, God augwali dologobe homu yali. Tama aga tede haliga dwai yai goli tama bidali. Tama tialima, Godigo Jonabolo bidi godolo elama, hobede ebo kolesaga ola mani.
Meba Juda we bidigo homugo tiali, Godigo augwali naga godolo ebo dao homu yali. Tama agai gasa we bidi godolo ebo menio homu yali. E bukugo augwali e tama haninama ola mawainu yali, Godigo tigidali tǫde we bidi godolo ebao homu yali. Tama sę me deli Israel dabe augwaliba deli mani, te augwali pelama, gasa we bidi agaba odasa asabo sę mani.
Jona aga wi pali goli, Godigo aga ma selasa asali
1
(Dąį 1-2)
1 Te Genuai Bidigo po Jonabolo mani, te Amitaigo wai dao. [2 Kin 14:25] 2 Agai te po wai, “Nage hogodama, digibulu pelama, tama nage te moni hanu Niniveba pelama, tama nago te augwaligo sęgę mu sali bomai po te we bidi augwalibolo magi pao. Eno te augwaligo ebo dwai sę hauwa sualio,” wali.
3 Tiali goli, Jonago te Genuai Bidi tagalama, tama te hanu me deli nogi Tarsis teba wi painogo yai. Tialima, aga hogodama, te nambisde elalubo dwasianu hanu Jopa teba pelama, tama agai te hanu Tarsisba painu ebo te sip me deli gegali. Agai te sip abelama, teba holali. Agai te Genuai Bidi tagalama painu wi palio.
4 Tiali goli, augwali pobadi, te Genuai Bidigo te bomai wali te tamu ąįde pedalumainu ilali. Tama te wali dali, kulubage si te bomo mu elama, tama te sip dolainu yalio. 5 Tama te sip tomode sę ebo bidi dabe augwali dwai wi mu elama, tama tigidali deli deligo augwa god i ola palio. Tama augwaligo te sip sęgę mu idali homu elama, tama augwaligo te walu dabe meba te tamu ąįba sąwani. Tiali goli Jona da, te sip aiyadu dologo tomoba mu dulama, tama pila mudalio. 6 Tama te sip guni tubo kepten bidi agai te Jona gegela sulama, tama agabolo te wado po wai, “Magi baso nage pila mubawe? Nage hodaluama, tama naga god i wao. Te agai da homu dene elama, tama da tau sabo homu eyu da, te da me isigobeo,” wali. 7 Tama augwali si holama, te sip ugwadu daide bidiyu, tama te sip sę ebo boskru bidi dabe augwaligo tama po wali, “Tegoba, polo dao! Da deli deligo dena nogi tigidali te pepa dagede asęnama, tama waba bulama, tama dago nogi deli sao. Dago tama tilama, te da dolainu yali sę page te bidi dago koneaibao,” wali. Tialima, augwaligo tama tilama, tama Jonago nogi pedelalio. 8 Tama augwaligo te po agabolo wai, “Te sęgę daba pedelali, te po page nago dabolo wao!” te po wali. “Nago magi sę ede yaliwe? Tama nage mena badu asai dawe? Nage mena bulu bidi, tama nage mena hani dawe?” wali.
9 Tialima, Jonago po wei ponoyu, te po wai, “Ena te Hibru bidi hani, tama eno lotu po Genuai Bidibolo wabo da, aga te dagalude God dao. Agai te tamu ąį me, tǫ me nigai dao,” te po wai.
10 Tama Jonago te sip tomode sę ebo boskru bidi dabe augwalibolo hasia bolo te po wai dao, “Eno te Genuai Bidi taga soyu, wi soai.” Tialima, augwaligo te po odama, tama augwali wi mu yai. Tama augwaligo Jonabolo te po wali, “Tegoba! Nago dwai sę genuai mu yalio!” po wai.
11 Te wali bomo mu eyu, tama te ąį dini genuai umabo pedalubao. Tama te sip tomode sę ebo boskru bidi dabe, augwaligo Jonabolo hanaluyu, te po wai, “Te dago magi sę nagebolo ebaso, tama te ąį dini asobo silama, tama da bugagia bidaibawe?”
12 Tama Jonago po wei ponoyu, te po wai, “Dagego ena selama, tama ena te tamu ąįba sąbaso da, tama te ąį dini silaibao. Ena koneani, ena digi ena te genuai ąį dini te dageba pedelabo page enade yalio,” Jonago te po wai.
13 Tiali goli, te sip guni tolasa pabo bidi dabe augwaligo te sip te tamu ąį saniba tugi painu, tama augwaligo te ąį togobo sę bomo elama yali. Tiali goli, te genuai ąį dini bomo mu yali, tama augwali te tamu ąį saniba tugi pabo usu munu me ebeo. 14 Tialima, augwaligo Genuai Bidibolo i wali, “O Genuai Bidi, dago nagebolo gedu haluasa po obao. Te dago e bidi te tamu ąįba sąbaso da, teda nago da isimainu me elamuo. Nago da po tų me iligio, te nago te bidigo gasa bidi ela mubaso, te po tų ebo tiwai igio. Genuai Bidi, nago te naga homu wali peyu, tama nago te sę ebao,” wali. 15 Tama augwaligo te Jona selama, tama te tamu ąįba sąwani. Tama te ąį dini yali isalio. 16 Tama tebo sulama, te sip guni tolasa pabo bidi dabe augwali Genuai Bidide wi mu elama, tama augwaligo agabolo ofa ilama, tama agabolo te augwaligo nosali yabo kolesaga po meba dąų walalio. 17 Augwaligo Jona te ąįba sąnama, tama tiali goli, Genuai Bidigo te sųgų moni genuai me sa muyu, tagala palama, tama te sųgų agai Jona dalalio. Tama Jona te sųgų haligade sela sogo bidai, te ulade sela sogo, me te hulide sela sogo bidibadi yai dao. [Mt 12:40]