1 Te meba sogo hododolama bidali silama da, tama aga te Kaperneam hanuba ma pai. Tama Kaperneam hanuba sabolama, tama te we bidi augwaligo aga te bede bidibo po odali. 2 Tama we bidi hauwa sisinama, tama te be pągąna salio. Tama bulu badu te be sunumi pąde te agebele olo me elalubeo. Tama agai te gesi dwagi yai po augwaliba pusubo sę yali. 3 Tama pusubadi, augwaligo gasi yai bidi me deli agaba selasa asai. Te bidigo nogo sągą dili me te tigidali mu penelai. Tama bidi me si me si augwaligo te gasi yai bidi tolasa asai. 4 Te we bidigo te be tomode bidabo pesage mu pągąna selama, mu pena sai baso, tama augwaligo te gasi yai bidi aga te Jisas pąba sela asabo usu isąwai. Tama augwali te be ugwadu daiba holama, tama augwaligo te Jisas bidibo madi badu te be dąį dawali. Augwaligo te dalama, tama augwaligo te gasi yai bidi pila mubo bono wa dali selama, te aiyaba tagalaluama mugulali. 5 Tama Jisasgo augwali sulama koneani, augwaligo agaba augwa homu tigidali muyu, tama agaba homugo tialubo bidi dabe dao, te agai koneani. Tama tibaso, agai te gasi yai bidibolo te po wai, “Eno ogwa, eno nago yali dwai sę sela sąwanio,” wali.

6 Te Juda dabego bomo yai po page koneai bidi dabe meba augwali tede dulalu bidaluali, tama augwa homude augwaligo te tiwai homu yai, 7 ‘Magi baso te bidigo agai te tiwai po wabowe? Agai te Godiba posobo po obao. Te mena bidi me deligo te bidigo dwai sęgę me sela sągobeo. Te God agaduba sę naga dao,’ augwaligo te homu yali.

8 Te Jisas aga homude polo koneani, augwaligo te homu augwa homude elaluali. Tama agai te po augwaliba wali, “Magi baso dagego te tobage homu te duga homude elalubawe? 9 Te eno pogo bomo elalubo te dagego hania konemainogo eyu, eno mena po waibawe? Eno e bidibolo te po wabo si, ‘Nago dwai sę eno sela sąwani,’ teda eno po bomo elalubo dagego hania konegobeo. Tiali goli eno e bidibolo po olama, tama aga hodaluama, agai aga pibo somo selama bilibaso da, teda eno pogo bomo elalubo te dagego mu koneaibao. 10 Ena da, te Godigo Bidi Mu da, tama eno homugo dagego konemainogo, eno e tǫde bomo elalubao, te we bidi dabego dwai sęgę sela sąyabo usu yabo elalubo. Dagego suiąo,” te po wai. Tama begelama, agai te nogo sągą dili isai bidibolo te po wali, 11 “Eno nagebolo obao, nage doligulama, tama naga pibo somo selama, tama naga beba pao,” te po wali. 12 Tama te bidi hodaluama, tama te tigidali we bidi gedude aga pibo somo polo selama, tama palio. Tama tibaso tigidali we bidi augwali noma mu siyu, midigi sai. Tama augwaligo God nogi ugwaba siyu, tama augwaligo te po wali, “Polobadu dago te tobage tiwai sę ebo me susiąwai dao,” te po wai.

13 Te Jisas te Galili sigi wę saniba ma biligi pai. Tama genuai hani we bidi agaba asobaso, tama agai te Godigo wiegi yai po augwaliba pusa mawai. 14 Tama aga pobadi, tama te bidi nogi Livai suali, te Alfiusgo ogwa, aga te maket takis mone sabo bede dulalubadi. Tama Jisasgo agabolo te po wali, “Nage ena wali asao,” wali. Tama aga hogodama, aga wali palio.

15 Tama nosali Jisas me, aga wali pabo bidi dabe me, augwali te Livaigo beba duagi pelama, nai tuali. Tama te takis mone sabo bidi hauwa me te dwai sęgę sai bidi hauwa augwali Jisas dali me aga wali pabo bidi dabe dali hodobo dugulama nai tuali. Te tobage tiwai bidi hauwa augwali sesemane sogo te Jisas wali bilaluai. 16 Te Juda bidi dabe tomode te hani me deli nogi Farisi hani elaluali. Tama Farisi bage meba augwali te Mosesgo bomo yai po page koneai bidi dabe, augwaligo suali, te Jisasgo te dwai sęgę sai bidi dabe dali, me te takis mone sabo bidi dabe dali, nai tubo suali. Tama augwaligo aga wali pabo bidi dabebolo wali, “Magi baso agai te takis mone sabo bidi dabe dali, me te dwai sęgę sai bidi dabe dali nai tubawe?” te po wai. 17 Jisasgo te po wabo odobaso, tama agai te po te Farisi dabebolo wali, “Te gasi meni yai bidi dabe augwali te munamuna mabo bidi pageba pogobeo. Menio. Te gasi yai bidi naga te munamuna mabo bidiba paibao. Ena asali, eno te doloba pai bidi dabe i wainogo me asobeo. Ena asali te eno dwai sęgę sai bidi dabe i wainogo te ena asai dao,” Jisasgo te po wai.

18 Te we bidi baptais mani bidi Jon wali pali bidi dabego me te Farisi dabe augwaligo me te tubo nai osogo gisilibo kolesaga wali pali. Tama bidi meba aselama, Jisasba wagasiyu, te po wali, “Te Jon wali pabo bidi dabego me, te Farisi wali pabo bidi dabego badi, te nai osogo gisilibo kolesaga ebo dao. Magi baso te nage wali bilibo bidi dabe augwaligo me te nai osogo gisilibo meniwe?” wali. 19 Tama Jisasgo po digi po begeleyu, tama te po augwalibolo wali, “Te we kębo bidi me deligo abagi dabe te we sainogo ebadi tama te bidi augwali dali bidibadi te nai osogo gisilibo usu egowe? Menio. Te we sabo bidi augwali dali bidibadi, te sogo te augwaligo te nai osogo gisilibo te usu me egobeo. 20 Tiali goli nosali gasa bidi dabego te we kębo bidi bomonama odasa pabo si, teda te sogo aga abagi augwali homu dene eyu, tama augwaligo osogo te nai habu selaibao. Tama ena e tǫde bididubadi eno bidi dabe augwaligo nai osogo gisiligobeo,” Jisasgo te po wai.

21 Te sogo Jisasgo gasa po digi po me begeleyu, te po wai, “Bidigo te gesi ugwa pedai selama, te poloba badi ugwa pedai dali me hobologobeo. Te agai te tiwai ebo si da, teda te dedage hobolali ugwa pedaigo te badi ugwa ma dedage ilaibao. Te gesigo te poloba badi ugwa pisilama, tama dedage genuai ma pedalaibao. 22 Tama me, te bidi mego te gesi wain ąį te poloba badia pai kibu meme waligo nigai botol teba tabigobeo. Ma agai tama tiyu da, teda nosali te wain wę genuai bo delama, tama te meme wali botol peda peyu, tama te wain wę tǫba olo gea peyu, tama te meme wali me doyu hagawaibao. Tama tibaso, augwaligo te gesi wain ąį te gesi meme wali botolba tabibo dao, tama te si dali si te bugagia munalubo dao,” Jisasgo augwalibolo te po wai.

23 Te Juda dabego Sabat sogo me delide Jisas te wit gi tomodu soai. Tama aga wali pabo bidi dabe aga dali soali, tama augwali nasi baso, tama augwaligo te nai wit meba selama, tama te ge tuali. [Bom 23:25] 24 Tama Farisi dabe meba tede bidali. Augwaligo te tebo sę sulama, tama Jisasbolo te po wali, “Suao. Magi baso augwaligo te Sabat side habu selali sę bolaliwe?” 25 Tama Jisasgo augwalibolo te po wali, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi eyu bidali. 26 Te sogo te bidi nogi Abiatar te genuai tobolu pris bidi bidibadi, tama Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao wai, te bomo yai pode. Tiali goli te bret augwaligo me tuali digi Godigo gedude dwai sę ebeo. Dagego te asęani po nedebewe?” [1 Sml 21:1-6] 27 Tama Jisasgo te po augwalibolo wai, “Godigo te bidi muani te Sabat sogo tau somainogo me mubeo. Menio. Agai te Sabat sogo muani te bidi tau somainogo muai dao. 28 Ena da, te Godigo Bidi Mu da. Ena da, te Sabat sogode te genuai bidi dao. Tama tibaso, bidigo Sabatde mena sę yagameo, te eno waibao,” Jisasgo te po wai.