Israel Hanigo Namba
Hasia nedebo tau sabo po
Te e bukude da, te Israel hani dabe augwali te Sainai bulu dude bidali tagalama, te gagalasa solama, augwali te bulu tǫ kantri Moap buluba sabolagasali sogoba usu nama te po wali, te Kenan bulu tǫ dąį badu tama, te Godigo augwaliba mawaibao olama, po dąų wali tǫ dao. Augwaligo te buku nogi poliyu, Namba da wali, magi baso meni, augwali te Sainai bulu dude bidali tagalama soainogo yali sogo, te bidi Mosesgo te Israel hani we bidi tigidali nedali, tama augwali te bulu kantri tǫ Moapba sabolama bidali sogo, agai augwali we bidi hani namba ma nedai dao.
Te Israel dabe augwali te bulu tomode kibu be hauwa bidali. Augwali bilali hasia te bulu Kades Barnea te Kenan tǫ saut badu sabolali. Augwali tede kibu be hauwa bidali, tiali goli augwali te Kenan tǫ tomoba pabeo. Tama nosali augwali te bidali tagalama, te augwali pelama, te sia ge pedalubo pedai badu, te ąį Jordan elalubo badu sabolama, bidai. Me badu hani augwali tede mu homu pagea selama bidali, tiali goli augwali hauwa we bidi dabe te osogo toma naga tuyu bidama, tama augwa sisi elama, te wę Jordan nogelama, tama augwali te Godigo dąį ilali tǫ sainogo elaluai dao.
Te bukude da, te Godigo hani dabe bilali po pusali. Hauwa sogo augwali haliga sęgę yali, tama te sęgę ebo sogo augwali wi yali. Hauwa sogo augwaligo te bidi Moses me, God me, tudiba muani. Tialima, te e bukude te Godigo po me pusali elalubao. Godigo te Israel hani augwali me tagalobeo. Te augwali wi eyu, te wi pai homu yali digi tagalao, Godigo augwali me tagalobeo. Agai augwali hani dali te bomo yai po aga dąų wali, te po aga homude me gegeda pisąma, homu konealu, tama agai augwaligo nǫų wąį dabe dali dąų olama mani bomai po me, agai konealu, agai augwali me tagalobeo. Godigo augwali bugagia tonalua pelama, te aga dąų wali bomo yai po te nai gilama walomainogo yai dao.
Te Israel dabe augwali Sainai bulu dude bidiyu, augwali painogo kegaluali
1
(Dąį 1:1-10:10)
Te tobolu bidi dabego Israel dabe nedali
1 Te si wabo kibu bede te Israel dabe te Isip bulu taga soali tudi badu nosali, te namba 2 poluago namba 1 dei, tede te Genuai Bidigo Moses dali te nai meni yai bulude te Godigo ugwa bede po miani. 2 Genuai Bidigo te e tama po wali, “Nage dali Aron dage sigo te Israel dabego nogi tigidali siąo,” po wali. “Dage sigo tigidali bidi dabe sese tama nedama, tama augwa wąį hani tali tali asęyu yao. [Nam 26:1-51] 3 Te tigidali kibu be 20 yai bidi dabe dali, te kibu be 20 edelai bidi dabe dali, augwali te ami bidi nigabo usu yai bidi dabe dao, tama augwaligo nogi me asęyao. 4 Tama dage sigo deli deli bidi wąįde deli deli tobolu bidi sa muyu ela pao, te dage si tau sabo bidi dabe. 5 Tama dage si te sę ebo tau sabo bidi dabego nogi e tama dao.
Te Ruben hanide da, nago te Sedeurgo ogwa Elisur
sagameo.
6 Te Simeon hanide da, nago te Surisadaigo ogwa
Selumiel sagameo.
7 Te Juda hanide da, nago te Aminadapgo ogwa
Nason sagameo.
8 Te Isakar hanide da, nago Suargo ogwa Netanel
sao.
9 Te Sebulun hanide da, nago Helongo ogwa Eliap
sagameo.
10 Tama te Josepgo wąį hanide da, te Efraim
hanide da, nago
te Amihutgo ogwa Elisama sagameo. Tama te
Manase hanide da, nago te Pedasurgo ogwa
Gamaliel sagameo.
11 Te Benjamin hanide da, nago
te Gideongo ogwa Abidan sagameo.
12 Te Dan hanide da, nago te Amisadaigo ogwa
Ahieser sagameo.
13 Te Aser hanide da, nago te Okrango ogwa
Pagiel sagameo.
14 Te Gat hanide da, nago te Duelgo ogwa Eliasap
sagameo.
15 Te Naptali hanide da, nago te Enango ogwa
Ahira sagameo,” te po wai.
16-17 Tama te Mosesgo te Israel we bidi hani tomode te tobolu bidi dabe sa muna silali. Augwali da, te augwa wąį hani polalubo bidi dabe dao. 18 Tama te Moses de Aron si me te 20 tobolu bidi dabe, augwaligo te tigidali we bidi sisinagasao po wali, tama te si wabo poluago hasia wabo dei, tede augwali polo sisinagasali. Tama te tobolu bidi dabego te tigidali we bidi dabego nogi, me augwa hani tali tali me nogi asęyu yali. Augwaligo te 20 kibu be yai bidi dabe dali, te 20 kibu be edelai bidi dabe me nedali. 19 Te Genuai Bidigo Mosesbolo wali po dolo tama wali pelama tama tiali. Te we bidi te nai meni yai bulu Sainaide bidibadi, Mosesgo augwaligo nogi selama, tama augwaligo nogi lista nigali. 20-46 Augwaligo te bidi dabe te kibu be nogo si sągą si eyu yai bidi dabe me nogi asęyu, me kibu be bidi sese edelai bidi dabego nogi me asęyu yali. Te bage te ami bidi dabe nigabo usu yai bidi dabe dao. Augwaligo te bidi dabego nogi selama, tama augwaligo augwa hani bidi we wai nanide nogi lista nigilama tagalali. Te Rubengo hanide gagalali, te Jekopgo gomunai ogwade gagalali. Te bidi dabego namba e tama dao.
Te Rubengo hani bidi namba
te 46,500 bidi tama bidali.
Te Simeongo hani bidi namba
te 59,300 bidi tama bidali.
Te Gat hani bidi namba
te 45,650 bidi tama bidali.
Te Juda hani bidi namba
te 74,600 bidi tama bidali.
Te Isakar hani bidi namba
te 54,400 bidi tama bidali.
Te Sebulun hani bidi namba
te 57,400 bidi tama bidali.
Te Efraim hani bidi namba
te 40,500 bidi tama bidali.
Te Manase hani bidi namba
te 32,200 bidi tama bidali.
Te Benjamin hani bidi namba
te 35,400 bidi tama bidali.
Te Dan hani bidi namba
te 62,700 bidi tama bidali.
Te Aser hani bidi namba
te 41,500 bidi tama bidali.
Te Naptali hani bidi namba
te 53,400 bidi tama bidali.
Te tigidali te ami bidi nigabo usu yai bidi dabe namba te 603,550 bidi tama bidali.
47 Te augwaligo te bidi dabego nogi asębo sogo, augwaligo te Livai hani bidi dabego nogi te nogi listade asębeo. 48 Te magi baso meni, Genuai Bidigo Mosesbolo e tama po wali, 49 “Nago te bidi dabego nogi sabo sogo, nago te Livai hani dabego nogi asęnamuo,” po wali. 50 “Te menio. Nago te Livai dabebolo nago sę menama, tama augwali eno name ugwago nigali lotu be tonalubo sę eyu, me augwaligo eno be tomode munalubo nai tonalubo sę emainao, tama augwali tede sę eyu emainao. Tama dage gasaba bidigi pabo sogo augwaligo te name ugwago nigali lotu be dali, te be tomode munalubo nai sese dali tolasa pabo sę eyu emainao. Tama augwaligo augwa ugwa be eno ugwa be bagulama sę emainao. 51 Te dagego te pesage nigilama, tama gasaba gudasa painogo, te ugwa be hųgiasa painogo da, teda te Livai dabego naga te ugwa be hųginama, tama te bede mubo nai dabe dali augwaligo naga sela pomainao. Tama dagego gesi noma pesage nigibo sogo da, te Livai dabego naga te eno ugwa lotu be sę emainao. Tama gasa olo bidi dabe teba pąba me asobo si da, dagego augwali ela muao. 52 Te gasa Israel we bidi augwaligo augwa hani bagego plak ugwa dodolali madi augwaligo be tede naga sese peyu emainao, te augwa hani mu naga sisinibo madi. 53 Tiali goli, te Livai dabego te ugwa be te eno ugwa be sę yalubo bagulama naga sę emainao, te augwaligo eno be tonaluyu emainogo. Tiyu, bidi me deli te be pąba asai madi ena sębę ilama ebode, eno dage Israel dabe sese dolidali weyu,” Genuai Bidigo te po wai.
54 Tama te Mosesgo te Israel dabebolo Godigo te Moses agabolo wali po sese pusali, tama augwaligo wali pali.