22
Te Devitgo asęani balia po me deli dao.
Te sęgę elalubo bidigo gela wabo, me te bidigo puba hwi wabo balia po
1 Eno God, eno God,
magi baso nago ena tagaluwe?
Magi baso nago ena tau sisąma ebawe?
Magi baso eno gela wabo nago
odobewe? [Mt 27:46; Mk 15:34]
2 God, eno nageba te giligade i wabo da,
tiali goli nago eno po odobeo.
Eno nageba te hulide me i wali,
tiali goli nago te po wei ponesiąbaso,
eno dwasianu toma me nabeo.
3 Tiali goli, naga digi nage
te tedali wiegi yai mu elalubao.
Nage te king bidibaso,
tama te Israel dabego nago nogi ugwaba sabo dao.
4 Polobadu dago wąį nǫų dabe
augwaligo konealubo homu nageba dąų wali.
Augwa konealubo homu dąų obaso,
tama nago augwali tau selama,
tama te boi bidi dabego augwali aiyaba me elalubeo.
5 Augwaligo nageba i weyu, gedu haluasa po obaso,
tama nago augwali te boi bidi
dabego nogode ma dobola sai.
Awe, augwaligo konealubo homu nageba dąų wali,
tama augwa te konealubo homu dąų wali
te odolali me hagagobeo.
6 Tiali goli, bidigo gedude ena te tǫde osogani tiwai,
ena te olo bage tiwai mu da.
Tigidali bidigo enaba wado po weyu,
tama ena tudiba muani.
7 Tigidali we bidigo ena sulama,
tama augwaligo posobo po enaba wabo dao.
Augwaligo hamena enaba diniyu,
tama augwa tobolu peme eyu ebo dao.
[Mt 27:39; Mk 15:29; Lu 23:35]
8 Augwaligo te po weyu, “Nago konealubo homu
te Godiba mubo da,” wabo.
“Magi baso agai nage ma sabewe?
Te Godigo nage wei homu eyu da,
te magi baso agai nage tau sabewe?”
Augwaligo te tobage po wabo dao. [Mt 27:43]
9 Tiali goli, God, nago naga ena
te idago haligade selama, tama ena bugagia pedelali.
Tama ena te ame tubadi, nago ena tonaluai.
10 Eno konealubo homu nageba muani,
te idago ena ame nani sogode
dąį elasa, megi e sogoba su nagasobao.
Idago ena gesi noma ame nabode,
tama nage eno God bidai.
11 Te sęgę enaba megi pedalubao,
tama tiyu, nago ena me tagaligio.
Ena tau sabo bidi deli me menio.
12 Te boi bidi hauwago ena
te bulmakau dabe pobeasa bilibo tiwai ebao.
Augwali te Basan bulude omai bulmakau dabego
bomo tiwai gilama ebo dao.
13 Te boi bidi dabe augwaligo te ena dolainu sisi elama,
te laiongo dwai hwą wabo tiwai eyu,
tama te uni hasa tuabo pedauwali nalubao.
14 Eno bomo tigidali silalio,
augwa te tǫba wę gelama,
te soa sabo tiwai gilama yai.
Te dili ununani tigidali te guda pai.
Eno homu te mu nagamea pali,
te posolo yai ili wę pedalubo tiwai yali.
15 Eno dogoni te wa mu pali,
tama eno hamena te pedauwalide agana sai.
Naga digi ena tagalama, ama ena mu isainu ebao.
16 Te dwai bidi dabego ena te tigidali habu badu
te yowigo uni hasa pobeasa bilibo
tiwai gilama ebao.
Augwaligo eno sągąde me nogode
te augwaligo gąųgo kelebao.
17 Eno tigi dili tigidali te hania pedelali.
Tama te bidi dabego ena sulama, tama ena dolali sęde
te augwa wiegi yai homu pemene yai.
18 Augwaligo te eno ugwa dabe selama,
augwa dobola sali,
tama mena bidigo te eno ugwa dabe deli deli sabo bidi
pedalumainogo eyu, augwaligo te satu gagali yai.
[Mt 27:35; Mk 15:24; Lu 23:34; Jo 19:24]
19 Genuai Bidi, nage enade digibulu me bidamuo.
Nage da, te ena sesemane sogo tau sabo bidi dao.
Nage polo tama asiyu, ena tau sagasao.
20 Nago ena ma dobola sali da,
teda augwaligo ena te moni hwągo me ela mugobeo.
Nago ena tau sobaso da, teda te yowi tiwai bidi dabe
augwaligo ena ela muainu ebaso,
te usu me egobeo. Menio.
Te ena bidibo ula elalu, bidaibao.
21 Augwaligo ena te laiongo uni hasa
ela tubo tiwai gilama silainu ebao.
Nago ena te augwaligo nogode ma dobola sao.
Eno magi sę me deli ebo te uni bulmakau dabe
gesabidide me usugobeo.
22 Nago tama tiwai ebaso da, teda eno te ena hani
bidi dabebolo nago yali sę po pusaibao.
Augwali te lotu weyu, deliba sisinibo side,
tama eno nago nogi te augwali tomode
ugwaba saibao. [Hi 2:12]
23 Eno tama po waibao, “Dage te Godigo hani da,”
po waiba, “aga nogi ugwaba sao.
Dage Jekopgo hani, te Genuai Bidigo nogi ugwaba sao.
Awe, dage te Israel dabego hani,
dagego agaba lotu wabo po wao.
24 Agai te magi doado bage
meni yai bidi dabe tudiba me mubeo.
Agai te augwalide sęgę me dene ebo
te olo nai da homu me egobeo.
Tama aga te augwalide digibulu me bidigobeo. Menio.
Agai te augwaligo usu da weyu,
gedu haluasa po wabo odobo dao.”
Eno tama po waibao.
25 Te lotu wainu sisinibo genuai
pesagede te eno nago nogi deli naga ugwaba saibao,
te nago ebo sę tigidalide te tama tiaibao.
Te polobadu eno yaibao po dąų wali ofa,
te eno te nagede wi ebo
we bidi gedude yaibao wali.
26 Te magi nai doado bage
meni yai bidi augwali eno i obaso,
augwali aselama, te nai tulama,
haliga mu pągąna paibao.
Tama te Godiba pabo bidi dabego,
teda augwaligo aga nogi ugwaba saibao.
Eno homugo Godigo augwali sesemane sogo
bugagia wiegi yai ilama, bidimainu yao.
27 Te tǫde tigidali we bidigo augwaligo
te Godiba homu koneama,
tama augwa agaba ma asaibao.
Te tigidali hani we bidi dabe
augwaligo kidu sugunama, agaba lotu waibao.
28 Magi baso meni, Genuai Bidi te king bidiyu,
tama agai te tigidali hani we bidi tonalubo dao.
29 Te dwai kolesaga eyu, hagoma ebo bidi dabego
kidu sugunama, tama agaba lotu waibao.
Te bidabo ula elalubo usu isiąyu,
te isabo ąǫ ebo bidi dabego,
te tigidaligo kidu sugunama, te Godiba lotu waibao.
30 Te nosali pedalubo we bidi hani,
augwaligo te agai sę yaibao.
Te bidi dabego te nosali pedalubo haniba
te Godide po hania pusaibao.
31 Te hani augwali ame nisiąbadi,
tiali goli augwali pedalubo si da,
teda augwaligo te tama po augwaliba waibao,
“God aga digi te aga we bidi dabe ma sai dao,”
te po waibao.