Solomongo Balia Po
Hasia nedebo tau sabo po
Te e buku augwaligo balia po tiwai asęani, tiali goli te buku yabe deli delide te balia wabode te we bidi augwaligo pusali po elalubao. Te me badu buku yabede te bidi me deligo aga godolo yali we delegelama balia po weyu, te me badu pedai buku yabede te wego te bidigo wali po wei ponama wali. Te augwali sigo pusali pode te wiegi yai haniani po begelama pusali po pągąnąlubao, te augwaligo hania hanilama ola mani te genuai pemene bidigo we dali ebo, me wego bidi dali pemene ebo me hanilama ola manio.
Te gasa Baibel buku dabe hauwade, te Godigo po pusali bidi profet dabe dali, te gasa bidi dabego me, te tiwai po begelama pusuyu, te Israel dabe augwali te Godigo we tiwai da po wali. Tama tialima, te Israel dabego te bukude te tiwai po nedebo sogo, augwaligo te homu yali, agai Godigo wiegi yai kolesaga dabolo ola mani homu yalio, magi baso meni, agai te Israel dabe augwali godolo mu eyu, te augwaligo me God godolo mu yali. Te Godigo po wali pabo we bidi mebago te buku sulama, te Kraisgo aga wali pabo we bidi godolo ebo po begelama pusali tiwai yali, me te Krais aga wali pabo we bidigo te Krais aga godolo ebo dao.
Te buku nogi Tigidali Nai Gagalama Nigali Side, te bukude, tede Godigo bidi dali, we dali nigilama, te augwali si bonogo kęnebo tiwai mu ilali (te bukude 2:24, tede te po elalubo suao). Te bukude wali pogo te po dąų walali, te dabolo te tiwai me ola mani, te Godigo wiegi yai bidi ma we nagebolo mobaso, Godigo te olo mabo wiegi yai sęde nago wiegi yai pemene mu yao, te po wai dao.
1
1 Te e bukude asęani elalubo balia po te wiegi yai balia da, te balia pogo te tigidali balia po aiyaba elalualio. Solomon aga digi te balia po asęai dao. [1 Kin 4:32]
Hasia wabo balia po
Gesi ogwa we wegigo te tiwai balia po wali
2 Hauwa sogo nago ena nono nani,
tama eno homugo nago te tiwai sę ebo
genuagia mu emainu homu ebao.
Nago ena godolo elama, te nage enade mu isibao.
Te polalubo nai mu da, tama te wiegi yai wain ąįgo
pusu aiyaba elalubo dao.
3 Nago tigi denami wiegi yai ebao.
Eno nago nogi odolama, te ena wiegi yai pemene ebao,
te eno denami ebo sandade wiegi yai
pemene ebo tiwai yali.
Te we dabe sibi augwaligo nage godolo mu ebo dao.
4 Nago ena selama, da udayu pinao.
Nage eno king bidi tiwai, te nago ena selama,
te nago be habuba pinao.
Te da si pemene yaibao.
Nago ena godolo mu ebaso, tama da pemene mu ebao.
Dago wiegi yai pemene ebogo te bidi dabego
wain ąįde pemene homu ebo aiyaba elalubo dao.
Nage uganu mu elalubao.
Tibaso, tigidali we dabe nagede mu tulalubo dao.
5 Dage Jerusalem we dabego, odao.
Eno tigi husugu yali,
tiali goli ena sawi yai pai mu da.
Eno tigi husugu yali,
te Kedar dabego wa pai bulude
te sel ugwa be dabe husugu yai tiwai dao.
Tiali goli, ena gasa sawi yai mu,
te sawi yai name ugwa dabe
te king Solomongo bede walalubo tiwai dao.
6 Mu tama, eno tigi husugu yali,
tiali goli dagego homugo ena
te olo sę ebo we tiwai da homu elamuo.
Giliga ena tigide dolama,
tama eno tigi te tiwai pedelali.
Te eno abe dedego ena dali wado po obaso,
tama ena te wain gi dabe tonalugi pabo sę idualio.
Tama tialigo eno tigi ena digi bugagia tonalusąwani.
7 Nage wiegi yai abagi da, eno nage godolo mu ebao.
Te nago naga sipsip kibu dabe menaba odasa paibawe?
Te augwali mena badu pedaiba pelama,
te tuabo wiegi yai nosai gegegi paibawe?
Te genuai giliga nanobode augwali menaba
tiwai madi duala sigi pogowe?
Nago enabolo obaso da,
te eno nage gegebo sę dene me egobeo.
Te nago enabolo wasiąbaso da,
teda eno nage eno te gasa sipsip
tonalubo bidi dabe tomode gegebo sę eyu da,
augwaligo ena te penani ebo we da homu yaibao.
Gesi ogwa bidigo balia po te tiwai wali
8 Eno abagio, nage gasa sawi yai we mu da.
Te nago ena suabo homu ebaso da,
teda nago te sipsip dabego sągą pasalu wali poanao.
Nago wali pobaso da,
teda naga meme dabego tuabo
wiegi yai nosai elalubo sueibao.
Te nosai te sipsip tonalubo bidi dabego
sel ugwa be pąde elalubao.
9 Ae, nage eno sawi yai abagi da,
nago au yali wiegi yai da,
te Isip king bidigo karis dabe
kekebo hos kibu dabe au yali tiwai dao.
10 Nago tobolu niside gedelali au dobagego
te nago gesabidi ula ilali.
Tama nago magede domoani wiegi yai beli dabego
te nago magede ula mu elalubao.
11 Tialima, dago te golgo au dobage meba nigiyu,
te gasa au dobage dabe te silvago nigibadi elama,
tama dago nagebolo mawaibao.
Gesi ogwa we wegigo balia po te tiwai wali
12 Eno king bidi aga betide pila muyu,
tama agai eno au yali wiegi yai
sanda denami odobao.
13 Eno abagi, eno godolo mu ebao,
pauda me deli wiegi yai denami ebo tiwai ebaso,
te ena baude ugadu pila mubao.
14 Tama aga te wiegi yai denami ebo
plaua dabe tiwai elalubaso,
te Engedi wain gi dabe pedalubo tiwai ebo dao.
Gesi ogwa bidigo balia po te tiwai wali
15 Nage gasa sawi yai we mu bidibaso,
eno nage godolo mu ebao.
Tama nago me nago ena godolo eyu,
te nago ena dali gedu ebao.
Gesi wegi ogwa wego balia po te tiwai wali
16 Eno abagi, nage wiegi yai mu bidibao.
Nago sawi yali gasa ugadu mu igulalio,
tama eno nage wiegi yai pemene mu ebao.
Te wiegi yai nosai te da sigo pibo bet sai tiwai elalubao.
17 Te sida ni dabe te nologo dabe me
te dago be tobolu mubo pilo me
walawala ni tiwai elalubao.
Tama te ni pain dabe te bego pedu ni tiwai dao.