1 ታኒ ያዪቆቢ ፆሳ ኣይሊኔ ጎዳ ዬሱሲ ኪሪስቶሳ ኣይሊ፥ ቢታ ኡባን ላሌቴዳ ታማኔ ላዑ ዜሬꬃቶ * ቢታ ኡባን ላሌቴዳ ታማኔ ላዑ ዜሬꬃቶ፡ ያዪቆቢ ጊዴ ዴዒያ ቆፋይ፥ ጎዳ ካሊያ ኣማኒያዋንታ ጊዲዴ ታማኔ ላዑ ኢስራዔሊያ ዜሬꬃቱዋዳን ባሬንቱ ሞርኬቱዋን ቢታ ኡባ ላሌቲ ጋኬዳዋንታ ጉሳ። ሳሮታ ኪታይ።

2-3 ታናዳን ፆሳ ካሊያዋንቶ፥ ሂንቴ ኣማኑ ፓጬቲያዌ ሂንቴንቶ ዳንዳያ ኢማናዋ ኤሪዴ፥ ዱማ ዱማ ፓጪ ሂንቴና ጋኪያ ዎዴ፥ ሄዋ ኩሜንꬃ ናሼቻዳን ፓይዲቴ። 4 ሂንቴ ዳንዳያይ ኣይኔ ባሊ ባይናን ሂንቴና ሚኔዳዋንታኔ ፓጪ ባዪናዋንታ ኦꬂዴ፥ ባሬ ኦሱዋ ፖሎ። 5 ሺን ሂንቴፔ ኦኒኔ ባሬው ኣꬌዳ ኤራቴꬃይ ꬋዮፔ፥ ካꬌናኒ ኡባው ኬካቴꬃን ኢሚያ ፆሳ ዎሶ። ኢ ኣው ኢማና። 6 ሺን ኢ ኣያኒኔ ሲꬌናን ኣማኑዋን ፆሳ ዎሶ። ኣዪሲ ጎፔ፥ ሲꬊያ ኡራይ ጫርኩ ሱጊና ቃፂያ ኣባ ቤታ ማላ። 7-8 ኣዪሲ ጎፔ፥ ላዑ ቆፋይ ዴዒያ ኡራይ፥ ባሬ ኦጊያ ኡባን ባሬ ቆፋ ቃቼናዌ፥ ሄ ኡራይ ጎዳፔ ኣዪኔ ዴማናው ቆፖፖ።

9 ሺን ሂዬሳ ኢሻይ ፆሳይ ኣ ꬎቁ ኦꬄዳ ዎዴ ናሼቶ። 10 ቃሲ ዱሬ ኢሻይካ ፆሳይ ኣ ካዉሺሴዳ ዎዴ ናሼቶ። ኣዪሲ ጎፔ፥ ዱሬ ቢታኒ ማታ ጊዶን ዲጪያ ጪሻዳን ꬋያና። ኢሳ 40፡6-7 11 ኣዪሲ ጎፔ፥ ኣዋይ ባሬ ሴላና ኬሲዴ፥ ማታ ሜሊሲና፥ ጪሻይ ꬋዬ፤ ቃሲ ኣ ማላ ሎዖቴꬃይካ ꬋዬ፤ ሄዋዳንካ ቃሲ ዱሬ ቢታኒ ባሬዋ ኦꬂዴ ꬋያና።

12 ዋዪያን ጌንጪያ ኡራይ ኣንጄቴዳዋ፤ ኣዪሲ ጎፔ፥ ሄ ዋዪያ ፆኔዳዋፔ ጉዪያን፥ ፆሳይ ባሬና ሲቂያዋንቶ ኢማና ጌዳ ዴዑዋ ኣኪሊሊያ † ዴዑዋ ኣኪሊሊያ፡ ቦንቼቴዳ ዴዑዋ ጉሳ። ኢ ኣካና። 13 ኦኒኔ ፓጬቴዳ ዎዴ፥ «ታና ፆሳይ ፓጬ» ጎፖ። ኣዪሲ ጎፔ፥ ፆሳይ ኢታን ፓጬታናው ዳንዳዬና፤ ቃሲ ኢ ባሬ ሁጴው ኦናኔ ፓጬና። 14 ሺን ኣሳይ ሁጲያን ሁጲያን ባሬ ሁጴ ኢታ ኣሙዋን ጎሼቲያ ዎዴኔ ጪሜቲያ ዎዴ ፓጬቴ። 15 ሄዋፔ ጉዪያን፥ ኣሙ ሻሃሪዴ፥ ናጋራ ዬሌ፤ ቃሲ ናጋራይ ዲጪዴ፥ ሃይቁዋ ዬሌ።

16 ታናዳን ፆሳ ካሊያዋንቶ፥ ጪሜቶፒቴ። 17 ሎዖ ኢሙዋ ኡባዪኔ ኩሜንꬃ ዎይታ ኡባይ ሳሉዋፔ ዬ። ሳሉዋ ፖዑዋ ሜꬌዳ ኣዉዋፔ ዬ፤ ፆሳይ ባሬ ሁጴው ዱማቴናኔ ዎይ ባሬ ኩዋ ላሜና። 18 ኑኒ ኢ ሜꬌዳ ሜꬌታቱዋ ጊዶን ꬎቃሳ ኣካናዳን፥ ኑና ባሬ ሼኒያን ቱሙ ቃላን ዬሌዳ።

19 ታናዳን ፆሳ ካሊያዋንቶ፥ ሃዋ ሃሳዪቴ፤ ኣሳይ ኡባይ ሲሳናው ኤሌሎ፤ ሺን ሃሳያናዉኔ ሃንቄታናው ኤሌሎፖ። 20 ኣዪሲ ጎፔ፥ ኣሳ ሃንቁ ፆሳይ ኮዪያ ፂሎቴꬃ ኣሄና። 21 ሄዋ ዲራው፥ ቱና ሃኖታ ኡባኔ ኢታቴꬃ ኡባ ሂንቴፔ ꬋዪሲዴ፥ ፆሳይ ሂንቴ ዎዛናን ቶኬዳ ሂንቴ ሼምፑዋ ኣሻናው ዳንዳዪያ ቃላ ኣሺኬቴꬃን ኣኪቴ።

22 ሺን ፆሳ ቃላ ኦሱዋን ፔሺቴፔ ኣቲን፥ ሲሳ ፃላላን ሂንቴ ሁጲያ ጪሞፒቴ። 23 ኣዪሲ ጎፔ፥ ቃላ ሲሲዴ ኦꬄና ኡራይ ዴዖፔ፥ ኢ ባሬ ማላ ማስቶቲያ ፄሊያ ኡራ ማላ። 24 ኢ ባሬና ፄሊዴ ቤ፤ ኤሌካ ኢ ኣይ ማሌንቶኔ ዶጊ ኣጌ። 25 ሺን ኦኒኔ ኣዪሌቴꬃፔ ኬሲያ ባሊ ባዪና ሂጊያ ፄሊዴ፥ ኣኒ ኣቂያዌ ቃሲ ኣ ናጊያዌ፥ ሲሴዳዋካ ዶጌናዌ፥ ሄ ኡራይ ባሬ ኦꬂያ ኦሱዋን ኣንጄታና።

26 ባሬ ኢንፃርሳ ናጌናን ባሬና ጪሚዴ፥ ባሬው ፆሳ ጎዪኒያዋ ማላቲያ ኡራይ ዴዖፔ፥ ኣ ጎይናይ ሜላ። 27 ፆሳ ኣዉዋ ሲንꬃን ፖኩ ባዪና ጌሻ ጎይናይ ሃዋ፤ ሄዌ ሃቃዌ ጎፔ፥ ኣታ ኣዉ ባዪና ናናቱዋኔ ዋዬቲያ ኣምዔቱዋ ማዳናዋኔ ሳዓ ናጋራ ቂታፔ ባሬ ሁጲያ ናጋናዋ።