22
1 ሄዋፔ ጉዪያን፥ ኪታንቻይ ታና ፆሳ ካዉቴꬃ ኦይዲያፔኔ ዶርሳ ካዉቴꬃ ኦይዲያፔ ጎጊያ ቢሪሊያዳን ጶሊያ ዴዑዋ ሃꬃ ሻፋ ቤሴዳ። ሂዝ 47፡1፤ ዛክ 14፡8 2 ሄ ሻፋይ ካታማ ኦጊያ ጊዱዋና ዱጌ ጎጌ። ሻፋፔ ሄፊንꬃ ባጋናኔ ሃፊንꬃ ባጋና ኣጌናን ኢቲ ጌዴኔ ላይꬃን ታማኔ ላዑ ጌዴ ኣይፊያ ዴዑዋ ሚꬃይ ዴዔ። ሄ ሚꬃ ቦንቹ ዴዒያዌ፥ ዛሪያ ኡባ ሃርጊያፔ ፓꬃናሳ። ዶም 2፡9፤ ሂዝ 47፡12
3 ሄ ካታማን ፆሳ ሼቃይ ኣይኔ ባዋ። ፆሳ ካዉቴꬃ ኦይዲኔ ዶርሳ ካዉቴꬃ ኦይዲ ሄ ካታማን ዴዓና። ፆሳ ኦሳንቻቱ ፆሳው ጎዪናና። ዛክ 14፡11 4 ኡንቱንቱ ኣ ዴሙዋ ቤዓና፤ ኣ ሱንꬃይ ኡንቱንቱ ዴሙዋን ፃፌታና። 5 ሄዋፔ ሲንꬃው ሃራ ቃማይ ባዋ። ኡንቱንቶ ፆምፒያ ዎይ ኣዋ ፖዑዋ ኮሼና፤ ኣዪሲ ጎፔ፥ ጎዳይ ፆሳይ ኡንቱንቱሲ ፆምፒያ ጊዳናዋ። ኡንቱንቱ ሜꬊ ሜꬊናው ካዉታና። ኢሳ 60፡19፤ ዳን 7፡18
ዬሱሳ ዩሳ
6 ሄዋፔ ጉዪያን፥ ኪታንቻይ ታና ሃዋዳን ያጌዳ፤ «ሃ ታኒ ሃሳዪያዌ ቱሙዋኔ ኣማኔቲያዋ። ናባቶ ባሬ ጌሻ ኣያና ኢሚያ ጎዳይ ፆሳይ፥ ማታን ሃናናው ቤሲያዋ ባሬ ኦሳንቻቱዋ ቤሳናው ባሬ ኪታንቻ ኪቴዳ» ያጌዳ።
7 ዬሱሲ፥ «ቤዓ! ታኒ ኤሌካ ያና። ሃ ማፃፋን ዴዒያ ቲምቢቲያ ናጊያዋንቱ ኣንጄቴዳዋንታ» ያጌዳ።
8 ታኒ ዮሃኒሲ፥ ሃ ኡባባ ሲሳዲኔ ቤዓዲ። ታኒ ሃዋ ሲሴዳ ዎዴኔ ቤዔዳ ዎዴ፥ ሄዋ ታና ቤሴዳ ኪታንቻው ጎዪናናው፥ ኣ ጌዲያን ኩንዳዲ። 9 ሺን ኪታንቻይ ታና፥ «ሄዋ ኦꬆፓ። ታኒ ኔናዳኒኔ ናቤ ጊዴዳ ኔ ኢሻቱዋዳን፥ ቃሲ ማፃፋን ዴዒያባው ኣዛዜቲያ ኡባቱዋዳን ኣይሊያ። ፆሳው ጎዪና» ያጌዳ።
10 ሄዋፔ ጉዪያን፥ ኪታንቻይ ታና፥ «ሃናና ጌዳ ሃ ማፃፋ ቃላ ማታፋን ጎርዶፓ። ኣዪሲ ጎፔ፥ ሃ ኡባባይ ፖሌቲያ ዎዲ ማታቴዳ። 11 ኢታባ ኦꬂያዌ ጉጂዴካ ኢታባ ኦꬆ፤ ቱናይ ጉጂዴካ ቱኖ። ሎዖባ ኦꬂያዌ ጉጂዴካ ሎዖባ ኦꬆ፤ ጌሻይኔ ጉጂዴካ ጌሻ ጊዶ» ያጌዳ። ዳን 12፡10
12 ዬሱሲ፥ «ቤዓ! ታኒ ኤሌካ ያና። ኣሳ ኡባው ኣ ኦሱዋዳን ኢማናው፥ ታ ዎይታ ኣካ ያና። ኢሳ 40፡10፤ 62፡11፤ ማዝ 28፡4፤ ኤርም 17፡10 13 ታኒ ኣልፋኔ ኦሜጋ፤ ኮይሩዋኔ ዉርሴꬃ፤ ዶሜꬃኔ ፖሉዋ» ያጌዳ። ሳፅ 1፡8፣ 17፤ 2፡8፤ ኢሳ 44፡6፤ 48፡12
14 ባሬንቱ ማዩዋ ጌሺ ሜጪያዋንቱ ኣንጄቴዳዋንታ። ዴዑዋ ሚꬃ ኣይፊያ ማናዉኔ ካታማ ፔንጊያና ጌላናው ኡንቱንቱሲ ማታይ ኢሜቴዳ። ዶም 2፡9፤ 3፡22 15 ሺን ካናቱ፥ ቢቲያዋንቱ፥ ዎሹሚያዋንቱ፥ ሼምፑዋ ዎꬊያዋንቱ፥ ኤቃሲ ጎዪኒያዋንቱኔ ባሬንቱ ሃሳያኒኔ ባሬንቱ ኪታን ዎርዶቲያዋንቱ ካሬና ዴዒኖ።
16 «ታኒ ዬሱሲ፥ ሃ ዬዉዋ ሂንቴንቱሲ ዎሳ ጎሌቱዋን ማርካታና ማላ፥ ታ ኪታንቻ ኪታዲ። ታኒ ዳዊታ ጎሊያ ዬሌታ። ታኒ ፖዒሲያ ዎንታ ባካሊያ» ያጌዳ። ኢሳ 11፡1፣ 10
17 ጌሻ ኣያናይኔ ጌሌዉና፥ «ሃ ያ» ያጊኖ። ቃሲ ሃዋ ሲሲያዌ ኦኒኔ፥ «ሃ ያ» ያጎ። ሳሜቴዳ ኣሳይ ኦኒኔ ሃ ዮ። ዴዑዋ ሃꬃ ኮዪያ ኣሳይ ኦኒኔ ጮ ኣኮ። ኢሳ 55፡1
18 ታኒ ሃ ማፃፋን ፃፌቴዳ ሃናና ጌዳ ቃላ ሲሲያ ኦናኔ ዞራይ። ኦኒኔ ሃ ቃላ ቦላ ኢቲባ ጉጆፔ፥ ፆሳይ ሃ ማፃፋን ፃፌቴዳ ቦሻ ኣ ቦላ ጉጃና። 19 ኦኒኔ ማፃፋን ዴዒያ ቲምቢቲያ ቃላፔ ኣያኔ ፓጪሶፔ፥ ሃ ማፃፋ ጊዶን ቆንጪሴዳ ዴዑዋ ሚꬃ ኣይፊያፔኔ ጌሻ ካታማፔ ኣ ጋኪያ ጊሹዋ ፆሳይ ፓጪሳና። ዛር 4፡2፤ 12፡32
20 ሃ ኡባባው ማርካቲያዌ፥ «ቱማ! ታኒ ኤሌካ ያና» ያጌ።
ኣሜንዒ። ጎዳ ዬሱሳ፥ ኔኒ ሃያ።
21 ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና * ሂንቴናና፡ ጮራ ሃራ ቢሌꬃቱዋን፥ ፆሳ ኣሳ ኡባና ያጌ። ኡባና ጊዶ። ኣሜንዒ።