6
Luong mar Isaya
1 E higano mane Ruoth Uzia othoe, naneno Ruoth Nyasaye kobet e kom duongʼ motingʼore malo kendo omi luor, ka tiend lawe opongʼo hekalu. 2 E wiye malo malaike miluongoni serafi ochungʼe kamoro ka moro nigi bwombe auchiel ka bwombe ariyo giumogo wengegi, to bwombe ariyo mamako giumogo tiendegi, to bwombe ariyo modongʼ gihuyogo. 3 Negiluongore moro ka moro kagiwacho ni:
“Maler, Maler, Maler en Jehova Nyasaye Maratego;
piny duto opongʼ gi duongʼne.”
4 E seche mane dwondgi kok kamano, mise mag dhoudi ne yiengni kendo hekalu ne opongʼ kod iro.
5 Ne aywak niya, “mano kaka lit! Arumo chuth! Nimar an ngʼat ma dhoge wacho gik ma ok ler kendo adak e kind joma wechegi ochido, eka an to aseneno Ruoth, ma en Jehova Nyasaye Maratego gi wangʼa awuon.”
6 Eka achiel kuom malaike miluongo ni serafi nohuyo mochopo buta kotingʼo mach e lwete, mosegolo gi ramaki e kendo mar misango. 7 Nokawo gino momulogo dhoga mi owacho niya, “Ne, koro asemulo lewi, mi kethoni oseweni kendo richoni osepwodhi.”
8 Eka ne awinjo dwond Ruoth Nyasaye kapenjo niya, “Ere ngʼama abiro oro? Koso en ngʼa monego odhinwa?”
Kendo ne adwoko niya, “Eri antie, ora!”
9 Eka nowacho niya, “Dhiyo kendo iwachne jogi kama:
“ ‘Ubiro siko kuwinjo weche miwacho
to wach ok nodonjnu ngangʼ;
ubiro siko kungʼicho,
to ok unune gimoro.’
10 Ket chuny jogi obed modhil,
kendo mi itgi dinre ma ok winj wach,
bende wengegi obed ma ok nen.
Nono to dipo ka wengegi oneno,
kendo itgi owinjo wach,
kendo mi chunygi ofwenyo tiend weche,
mi gilokre ma chang-gi.”
11 Eka napenjo niya, “Yaye Ruoth Nyasaye, mano notimre nyaka karangʼo?”
Kendo nodwoko niya,
“Nyaka chop mier madongo ruombre piny madongʼ gunda
maonge joma odakie,
bende mi udi ma ji odakie ojwangʼ
kendo puothe duto kethre mi jwangʼ-gi,
12 bende nyaka ndalo ma Jehova Nyasaye oriemboe ji duto mabor
ma piny odongʼ malich ka gunda.
13 Kata bedni achiel kuom apar mar jogi nodongʼ e piny,
to gin bende notiekgi pep.
To mana kaka yiende mag ngʼowu kod yiend ober
motongʼ mowe osiki loth,
kamano e kaka jo-Nyasaye mabiro dongʼ e piny nochal gosikino.”