8
Jehova Nyasaye tiyo gi Asuria
1 Jehova Nyasaye nowachone niya, “Kaw kalatas maduongʼ kendo indik wachni gi kalam mongʼongʼore ni Maher-Shalal-Hash-Baz, tiende ni yeko biro chako timore machiegni.” 2 Kendo abiro luongo Uria jadolo kod Zekaria wuod Jeberekia mondo gibedna joneno mar adier. 3 Bangʼe ne ariwora gi chiega ma janabi madhako kendo ne omako ich mi onywolo wuowi kendo Jehova Nyasaye nowachona niya, “Chake wuowino ni Maher-Shalal-Hash-Baz. 4 Kapok nyathino odongo mongʼeyo luongo ‘wuonwa’ kata ‘minwa,’ to mwandu duto mag Damaski kaachiel gi gik moyaki mag Samaria notingʼ gi ruodh Asuria.”
5 Jehova Nyasaye nowuoyo koda kendo kawacho niya,
6 “Nikech jogi osedagi,
pi mamol mamuol kawuok Shilo,
kendo gi mor mana gi Rezin
kod wuod Remalia,
7 Omiyo Ruoth Nyasaye biro kelo kuomgi
oula mopongʼ mag Aora,
ma en ruodh Asuria gi joge mag lweny.
Pi Aora nopongʼ wengene
ma nomuom gengene,
8 kendo obiro muomo piny Juda
mi ochop koni gi koni kokadho e diere,
kendo kopongʼ thich nyaka oulano nokwak pinyu duto,
yaye Imanuel!”
9 Chokreuru ne lweny, un ogendini, ka luoro omakou!
Chikuru itu un ji duto manie pinje maboyo!
Bende ikreuru ne lweny ka luoro omakou!
Bende ikreuru ne lweny ka luoro omakou!
10 Kata dabed ni ungʼado rieko kuom gik mudwaro timo to ibiro thirgi;
bende kata dabed ni uchano gima udwaro timo to ok notimre,
nikech Nyasaye nikodwa.
Luor Nyasaye
11 Jehova Nyasaye ne owuoyo koda ka bade maratego ni kuoma, kosiema ni mondo kik awuothi e yore mag ogandani. Nowacho niya,
12 “Gima jogi luongo ni andhoga
Kik uluong ni andhoga;
bende kik iluor gik ma giluoro
kendo kik gibwogi.
13 Jehova Nyasaye Maratego ema onego ikwan ka ngʼat maler,
en ema onego umiye luor,
kendo en ema onego kibaji mare goyi,
14 kendo en ema nobed kare maler;
to ne jo-Israel kod jo-Juda,
enobed kidi machwanyo ji
kendo lwanda mamiyo gipodho.
Chutho enobed obadho
ma jo-Jerusalem nomokie.
15 Ji mangʼeny kuomgi nochwanyre
mi gore piny kendo tur,
nochiknegi obadho ma makgi.”
16 Koro twe kalatas mondikie wechego motegno
kendo chan chikego e nyim jopuonjrena.
17 Abiro dwaro Jehova Nyasaye
ma opando wangʼe ne od Jakobo.
Abiro keto genona kuome.
18 Eri an kaachiel gi nyithindo ma Jehova Nyasaye osemiya. Wan e ranyisi kod honni e piny Israel koa kuom Jehova Nyasaye Maratego modak e got mar Sayun.
19 Ka ji wachonu ni manyuru rieko kuom ajuoke gi jo-nyakalondo madhum kendo jajni, to donge dhano onego penj wach kuom Nyasaye? Angʼo momiyo upenjo joma otho wach mar joma ngima? 20 To kar timo kamano to nonuru chike Nyasaye kod wechene! Ka ok ginyal wuoyo kaluwore gi wachni to ok ginyal konyo ngʼato. 21 Ginitangni e piny ka githagore kendo ka gidenyo, kendo e kindeno ma kech onurogi, igi nowangʼ matek mi gikwongʼ ruodhgi kod Nyasachgi. 22 Eka ginikulre ka gingʼiyo piny, to chandruok gi mudho kod chuny malit ema ginine kendo noriembgi mawitgi e mudho mandiwa.