1 Jisasame dee mende lao pituu, “Endakali dupame kandamili lao, nyakamame mana tolatae dupa minatamino doko, nyakamanya Takange kaitinya katenge dokome, yole mende nanditana, kandao kalyepape.

2 “Endakali Gote watao miningi mane-mane pingima dupame, nyakamanya lotuu andapi, kaitini kembopi, dupanya endakali dupame nyakama lalyipimili lao masoo, endakali tipya dupa maingima. Nambame nyakama kiningi langilyo: Dopa pingi endakali dupame nyakamanya yole doko nyepelyaminona, nyakamame dopa napyepape. 3 Dopana, nyakamame endakali tipya dupa kingi tolae-kaitame nisoo pituu, kingi koeya-kaitame nakandena lao pyepape. Dopa pitamino dokome, endakali mendeme nakandata. 4 Nyakamame yalo pyoo nisepae maitaminopa, nyakamanya Takange dokome yalo pyoo maitamino doko kandatala, nyakama yole mende ditana” lea.

5 Jisasame dee mende lao pituu, “Nyakamame loma setamino gii dokopa, endakali Gote watao miningi, mane-mane pingima dupame, loma singimali pyoo sala naeyalapape. Dupame lotuu andapi, kaitini kembopi, dupanya katao, endakali enombanya loma sipuma laka lao masingima. Nambame nyakama kiningi langilyo: Dopa pingi endakali dupanya yole doko nyepelyamino. 6 Nyakamame loma salanya pituu, nyakamanya palenge panda dokonya pao, kaita paii lanyetala, nyakamanya Takange yalo pyoo katenge doko lao loma salapape. Dopa pitaminopa, nyakamanya Takange dokome kandatala, nyakama yole mende dita.

7 “Kamalya katenge endakali dupame, pii tenge nakatenge longo dupa lao, nyakamanya sambo gote dupa lao loma singima. Dokaitame loma londe pyoo singi doko, sambo gote dupame auu kaeyao, sekelyaminona lao masingima. 8 Nyakama daa jilyamo dupa, tee laa naelyaminopa, wambao nyakamanya Takange Gote dokome masingina, nyakamame kamalya katenge dupame pingimali napyepape. 9 Nyakamame dapa lao loma salapape:

Naimanya Takange ketae kaitinya katenge doko, embanya kenge doko auu pyoo sina lape. 10 Embanya isingi mate doko epena lape. Ketae kaitinya embanya masingili pingima, dopaka pyoo isa yuu dakenya pyepa lape. 11 Indupaka natamanoli pyoo, nee dupa dipi. 12 Naimanya koo pyekelyamino dupanya, yanu dupa kaelyamanona, embame naimanya koo dupanya yanu dupa kaeyape. 13 Koo pyepa lao makande pingi dupanya, pupa lao yakinala naeyape. Koo dupanya embame naima pyoo nyepe.

14 Dopana, endakali mendeme nyakama-kisa koo pingitamo dupa, kame setamino doko, nyakamanya Takange ketae kaitinya katenge dokome, nyakamanya koo dupa kameaka sakata. 15 Nyakamame endakali mendeme, koo pingitamo dupa kame nasetamino doko, Goteme nyakamanya koo dupa kame nasakatakana” lea.

16 Jisasame dee mende lao pituu, “Nyakamame Gote loma soo, nee nanao katao, endakali Gote watao miningi, mane-mane pingima dupame pingimali pyoo, enomba kumala naeyalapape. Dokaitame nee nanao kalyamini-lamo lao, endakali dupame nyakama kandena lao, enomba kumao lambalu pyapae paengema. Dopa pingi endakali dupame, nyakamanya yole doko nyepelyaminona lao, nambame nyakama kiningi langilyo. 17-18 Nyakamame Gote loma soo, nee nanao katao, endakali dupame nyakama nee nanao kalyaminona lao, masala naena lao, nyakamanya lengelyapi wasa pyapala, iti weleme kai pyapala kalyepape. Dopa pitaminopa, nyakamanya Takange yalo pyoo katenge dokome, iki kandata. Baame nyakamanya yalo pyoo pitamino doko kandatala, nyakama yole mende ditana” lea.

19 Jisasame dee mende lao pituu, “Isa yuu dakenya oapi epe setelyamino dupa, kokalyame nao koeyasingi. Dee kaa tao koengeaka. Pake nenge endakali dupame, anda kalupala pake nyingimakana, nyakamame oapi epe dupa isa yuu dakenya nyoo setala naeyalapape. 20 Kaiti dokonya oapi epe setelyamino dupa, kokalyame nao koeyasala naenge. Dee kaa tao koeyala naengeaka. Pake nenge endakali dupame, anda kalupala, pake nanyingimakana, nyakamame oapi epe dupa kaitinya nyoo setalapape. 21 Nyakamanya oapi epe dupa setenge panda dokonyaka, nyakamanya mona yukuo setengemana” lea.

22 Jisasame dee mende lao pituu, “Lenge doko yongenya kia joo tenge. Embanya lenge doko auu pyoo tao paeyateno doko, embanya yonge doko pitaka etete tii pita. 23 Dopaka doko, embanya lenge lapota natao paeyateno doko, embanya yonge doko pitaka iminjeta. Emba-kisa kia telyamo doko konjetamopa, emba iminjetae andake mendenya katatena” lea.

24 Jisasame dee mende lao pituu, “Endakali mendeme kamongo lapomanya, kalai pyakamaiya naeyapenge. Lapotanya kalai pyakamaitamo dokome, mende auu kaeyapala, mende doko auu kaeyala naeyata. Dee mende mona setapala, mende doko mona setala naeyata. Dopana, nyakama Gotepa, munipa, lapotanya kalai akali joo, nakatapengena” lea.

25 Jisasame dee mende lao pituu, “Nyakamame nyakama tange auu pyoo, lete katapenge dupanya lao masetala, 'Naima neepi endakipi anja-tae nao katatamape? Yonge pee anja-tae pitamape?' lao masala naeyalapape. Lete katenge angi doko neepi, endakipi, yonge peepi, dopale daa. 26 Nyakamame yaka dupa kanjepape. Dupame ee pokala naengema. Dupame nee nyoo ipao setenge anda dupanya, mau pyala naengemaka doko, nyakamanya Takange kaitinya katenge dokome dupa nee maingi. Nyakamame yaka dupa etete ita minao kalyamino dokonya, Goteme nyakama nisala naeyatape? 27 Nyakamanya mendeme auu pyoo katapuli lao masepae longo nyetamo dokome, baanya lete katenge dokonya, ee kana mendatupa waipa setape? 28 Aipuma nyakamame yonge pee anja-tae pitamape lao, masepae longo nyilyamipi? Palao dii auu pyoo pilyamo dupa kanjepape. Dupa auu pisalanya tangeme kalai mende napingima. Dee yonge peepi mende wasala naengemaka. 29 Wamba Kiŋi Solomoneme, yati tata epe longo dupa pitaka piamoaka doko, palao dii auu pyoo pilyamo dopale mendeme, baa yati napiana lao, nambame nyakama langilyo. 30 Aipuma nyakamame Gote tungi kuki pilyamipi? Palao dii epapu telyamo, taita kepao yangapenge dupa, Goteme yati pisingi. Dopa pingi dokome, nyakama yonge pee pipenge dupa, kapa pao ditana lao masala naelyamipi? 31 Dopana, nyakamame neepi endakipi anja-tae natamape, yonge pee anja-tae pitamape lao masala naeyalapape. 32 Endakali kamalya katenge dupame, dopale dupa iki kutingi. Dopaka doko, nyakamanya Takange kaitinya katenge dokome, nyakama daa jilyamo dupa kandenge. 33 Dopana, nyakamame Gotenya isingi mate dokopi, baanya mana tolatae dokopi, dolapo wambao kutalapape. Dopa pitaminopa, Goteme nyakamanya nyepenge dupa dita. 34 Dopana, nyakamame taitanya lao masepae longo nyala naeyalapape. Taita kenda pipae ipatamo dupa, taita sepenge. Indupa kenda pipae ipatamo dupa, indupaka sepengena” lea.