1 Jisasa sipi dokonya pituu, Galilea pete omotena, baa katenge taono Kapename dokonya pyakamea. 2 Dokopa akali mendapuame akali papa tambutae mende lapa tokonya soo, baa kateasa epeami. Dopa piaminopa, dokaitame Jisasa baa tungi piamino doko kandatala, akali papa tambutae doko lamaiyoo, “Wane, embanya koo dupa kunao nepekelyona, emba mona yaepa” lea. 3 Dopa leamopa, Mosesanya loo mana nyepae akali mendapuame, nyakamalapo laloo pyoo, “Akali dakeme Gote lamba lelyamona” leami. 4 Dopa lao masiamino dupa Jisasame kandatala dokaita lamaiyoo, “Aipuma koo dopale dupa masilyamipi? 5 Akali dakenya koo dupa kunao nepakamailyona lapu dokopa, nyakamame namba koo kunao nepenge, pupu lapae doko singi-lamo lao nakandelyamino. Dee akali dake lamaiyoo, “Emba sakatatala puu” lato dokopa, namba koo kunao nepenge pupu lapae doko singi-lamo lao kanjamino. 6 Dopaka doko, Akalinya Ikiningi dokome isa yuu dakenya katao, endakali dupanya koo dupa kunao nepenge pupu lapae doko, baa-kisa singi-lamo lao kanjepalena” lea. Dopa latala baame akali papa tambutae doko lamaiyoo, “Emba sakatatala, embanya lapa toko doko nyoo soo, andaka puu” lea. 7 Dopa leamopa, akali doko sakatatala andaka pea. 8 Dopa piamo doko, endakali kambu piamino dupame kandatala, pupu lapae dopale dupa Goteme, akali dake maiya-lamo lao paka kaeyapala, Gote mambo piami.

9 Jisasame yuu doko yakinao ipupala, akali takisa nyingi Matyu lenge mende, takisa nyingi anda dokonya peteamo kandatala, baa lamaiyoo, “Emba namba watao ipu” lea. Dokopa baa sakatatala, Jisasa watao pea. 10 Maitakao Matyunya andaka pupala, Jisasa disaipolo dupa-pipa peteaminopa, koo pingipi, takisa nyingipi, longo dupa ipupala, apata nee nao peteami. 11 Peteamino doko kandatala, Parasai dupame Jisasanya disaipolo dupa tipa pyoo, “Nyakamanya mana lenge akali doko, aipuma koo pingipi, takisa nyingipi, dupa-pipa nee nao pilyape?” leami. 12 Jisasame pii leamino doko sepala dokaita lamaiyoo, “Endakali yaina napingi dupa dokosa yangyala naenge. Endakali yaina pyapae dupa dokosa yangingi. 13 Gotenya pii lapae silyamo dake, nyakamame pao mana nyalapape: 'Kundi iki dingi doko, namba Gote dokome auu nakaenge. Endakali yango kondo kaenge doko, namba Gote dokome auu kaengena' lapae silyamo. Nambame endakali tolatae dupa, wii lao lanyalanya naepeo. Endakali koo pingi dupa, wii lao lanyalanya epeona,” Jisasame lea.

14 Gii dokopa Jone kaimbu pingi dokonya disaipolo dupame, Jisasa kateasa ipupala baa tipa pyoo, “Nee nanao loma singi gii dokonya, naimapi, Parasaipi, dupame Gote loma soo pituu nee nanengena, embanya disaipolo dupame aipuma dopa napingimape?” leami. 15 Dopa leaminopa, Jisasame dokaitanya pii yanu pyakamaiyoo, “Akali mendeme enda kelyapala, watapae pyao baanya tata dupa-pipa, apata kalyamino gii dokopa, baanya tata dupa-pipa nee nao, mona yaepao, auu kaeyao katengema. Akali enda kelyenge dopale joo, namba nyakama-pipa apata katao, nee nao kalyamano. Gii mendepa, akali waka mendapuame namba nyokonyoo patataminopa, nambanya disaipolo dupa loma soo, nee nanao katatamina” lea.

16 Dopa latala kongali pii mendeaka dee Jisasame lao pituu, “Endakali mendeme lapalapa kangupae enenge mendeme, yonge pee atingi mendenya tii telyamo dokonya, kii pimbala naenge. Endakali mendeme lapalapa etete enenge mende, atingi-kisa kii pimbatala wasa pyatamopa, enenge doko inungunyetamo dokome, atingi doko kanguo koeyaseta. 17 Dopaka pyoo, endakali mendeme waene enenge kamuo, penge meme yanungimi wasepae, atinginya pyandatamo dokome, waene doko bolo lapala, penge atingi doko kangutamopa, waenepa, pengepa, lapota koeyata. Tenge dokonya, waene enenge kamupae doko, penge atinginya kamuo pisala naenge. Waene enenge doko, penge enengenyaka kamuo pisingi, dokome waenepa, pengepa, dolaponya mende koeyala naengena” lea.

18 Jisasame Jone kaimbu pingi dokonya, disaipolo dupa pii lamaiyoo kateamopa, Judamanya lotuu anda mendenya isingi akali mende, Jisasa kateasa ipao luma lakapala baa lamaiyoo, “Nambanya wanenge doko epapu kumatalamona, dee lenge tena, embame baa-kisa kingi setala ipupoko” lea. 19 Dopa leamopa, Jisasa disaipolo dupa-pipa sakatatala, akali doko watao peami. 20-21 Peaminopa, enda mende ee kana 12 dutupanya, yuu gii dii lao angupae kandenge dokome, Jisasanya maitakaita pupala, Jisasanya yonge peenya watandatopa, nambanya yaina doko mee jakalapomona lao masetala, yonge pee punanya watandea. 22 Dopa piamopa, Jisasame kapilyetala, enda doko kandatala, “Wanaku, embame namba tungi pyapino dokome, embanya yaina doko etelyamona, emba mona yaepatala puu” lea. Dopa leamo gii dokopaka, enda dokonya yaina doko etea. 23 Dokopa Jisasame isingi akali dokonya andaka pao kolandatala kandeamopa, endakali mendapuame kumanda pituu, pulupapu pyao ee wee leami. 24 Dopa piaminopa, baame dokaita lamaiyoo, “Wanaku dake kumala naeyalamo, mee luu palelyamona, nyakama pyoo pupa” lea. Dopa leamopa, endakali dupame baa lamba lao, gii kaeyami. 25 Dopa piaminopa, Jisasame endakali dupa watao kamanda pyalyetala, baa wanaku kumapae siamo dokonya pea. Pupala wanaku doko kinginya minateamopa, sakatea. 26 Dopa piamo dokonya atome doko, yuu makisa singi dupa pitakanya taeya.

27 Jisasame yuu doko yakinatala peamopa, akali lenge monda mendalapome wii lao, “Dapiti Yumbange, embame nalimba kondo kaeyapoko” lao watao peambi. 28 Jisasa andaka kolandatala peteamopa, akali lenge monda dolapo epeambi. Epeambinopa, baame dolapo tipa pyoo, “Nyakamba nambame yaka nisalapeno lao masilyambipi?” lea. Dopa leamopa, dolapome yanu pyao, “Kamongo, kini embame yaka nisalapenona lao masilyambanona” leambi. 29 Dokopa Jisasame akali dolaponya lengenya watandatala lamaiyoo, “Nyakambame namba tungi pilyambino dokonya, masilyambinoli pilyamona” lea. 30 Dopa lalu piamopa, akali dolapo lenge talu piambi. Dokopa Jisasame akali dolapo kyeto joo lamaiyoo, “Nyakamba-kisa pyomo dake, endakali waka mende lamaiya naeyalapape” lea. 31 Dopa leamoaka doko, Jisasame piamo dupa pitaka, akali dolapome yuu makisa singi dupa pitakanya lao taeyambi.

32 Akali dolapo puu peteambinopa, endakali mendapuame imambu koo paleta akali muumaa mende, laminao Jisasa kateasa epeami. 33 Dokopa akali doko-kisa, imambu koo paleamo doko watao piamopa, muumaa doko pii lea. Dopa piamopa, endakali kambu piamino dupame kandatala, walu leami. Walu latala lao pituu, “Wamba naimame Israele tange endakali dupanya, mana dapale mende nakandeamana” leami. 34 Dopa leaminoaka doko, Parasai dupame lao pituu, “Imambu koo dupanya isingi doko baa-kisa ipao palipya dokome, imambu koo waka dupa watao pilyamona” leami.

35 Jisasame taono andakepi, yakanepi, dupa pitakanya paeyao, nyakamanya lotuu anda dupanya katao mana lamaita, Gotenya isingi mate dokonya lao wai pii epe doko, lamaita pia. Dee baame endakali yaina tata longome pyapae dupa mee jakamaiya. 36 Endakali kambu dupa sipisipi setao katenge, daa jepae katao kekeamino kandatala, Jisasame dokaita konda kaeya. 37 Kondo kaeyapala baame disaipolo dupa lamaiyoo, “Eenya nee longo wambu petelyamoaka doko, endakali mandyuu setapenge etete kuki kalyamino. 38 Dopana, kalai akali mendatupa apata nee mandyuu, setala pena lape lao, ee tange doko nyakamame loma salapape” lea.