27
Jisasa Anjoo Pondiasa Pailate Maiyamino Doko
(Mk 15:1; Lk 23:1-2; Jn 18:28-32)
1 Oo yongama wamba, pitisa mupapi, Judamanya isingi akalipi, dupa pitakame Jisasa pyao kumasemana latala, lao kambuiyami. 2 Dopa petala dupame Jisasa anjetala, laminao pao, Gapena Pondiasa Pailate maiyami.
Judasa Kumiamo Doko
(Ap 1:18-19)
3 Jisasa pyao kumasemana leamino doko kandatala, Jisasa enge nyiamo akali Judasa doko mona kenda kaeyapala, silipa muni 30 nyiamo dutupa minao pupala, pitisa mupapi, Judamanya isingi akalipi, dupa tange maiyakamaiya. 4 Maiyakamaiyoo pituu, “Akali tenge nakatenge mende, nambame enge nyipu doko, nambame kopeta pipu-lamona” lea. Dopa lamaiyamopa dokaitame, “Doko embanya kalai. Naimanya kalai mende daana” leami. 5 Dokopa Judasame muni dutupa, lotuu anda andake dokonya kainanya pyale latala pea. Pupala baa tange mangenya kende katatala, yukutae katao kumia.
6 Pitisa mupa dupame silipa muni dutupa yapao nyepala, “Endakali pyao kumasalanya muni datupame, enge nyepae dokonya, lotuu anda andakenya muni singi dokonya, setala naeyapengena” leami. 7 Dokonya dupame pii lao yaki petala, endakali waka kumatami dupa malu pipengena lao, akali yuumi endaki penge wasingi dokonya, yuu doko muni dutupame sambeami. 8 Tenge dokonya, yuu sambeamino doko kenge Taiyokosa lengema. 9-10 Dopa piamino dokome, wamba propeta Jeremaeyame lao pituu, “Israele tange dupame, akali mendai silipa muni 30 dutupame, sambao nyepengena lao, makande miniamino dutupa nyetami.* nyetami Giriki piimi, “nyiami” latae kalyamo. Nyepala Kamongo dokome namba langiamoli pyoo, akali yuumi endaki penge wasingi dokonya, yuu doko sambatamina”† sambatamina Giriki piimi, “sambeamina” latae kalyamo. leamo doko, angi jia.
Pailateme Jisasa Tipa Piamo Doko
(Mk 15:2-5; Lk 23:3-5; Jn 18:33-38)
11 Jisasa baa Gapena Pondiasa Pailatenya, enombanya laminao pao katasiaminopa, Pailateme baa tipa pyoo, “Emba Judamanya Kiŋi dokope?” lea. Dokopa Jisasame, “Embame leleno dokoaka” lea. 12 Dokopa pitisa mupapi, Judamanya isingi akalipi, dupame baa-kisa tenge seteaminopa, baa ema napia. 13 Dopa piamopa, Pailateme baa lamaiyoo, “Emba-kisa tenge longo setao, pii lelyamino dupa embame nasilipi?” lea. 14 Dokopa Jisasame pii leamino, dupanya mendaipi mende yanu pyala naeyamosa, gapena doko etete paka kaeya.
Pailateme Jisasa Pyao Kumasina Leamo Doko
(Mk 15:6-15; Lk 23:13-25; Jn 18:39–19:16)
15 Ee kana dii lao, Napinya Kaeyamo Pasopa gii doko epelyamoli pyoo, Pailateme akali anjetae dupanya mende, endakali dupame mokekena lelyamili pyoo, mokata pyakamaingi. 16 Gii dokopa akali Barabasa lenge mende, pundunya kenge singi doko anjetae palea. 17-18 Pitisa mupa dupame Jisasa-pipa tilya nyepala, baa anjoo dimini-lamo lao kandatala, Pailateme endakali kambu kateamino dupa tipa pyoo, “Nambame api mokakaowape? Barabasape, pande Jisasa Kraisa lengema dokope?” lea. 19 Pailateme disisene pyaanya peteamopa, baanya etanengeme, “Nambame kuakama akali tolatae dokonya, kombea koo mende pyoona, embame baa mende napipi” lanya pea. 20 Dokopa pitisa mupapi, Judamanya isingi akalipi dupame, “Barabasa mokekena, Jisasa pyao kumasina lapape,” lao endakali kambu dupa, ingi tuu leami. 21 Dopa piaminopa, Pailateme endakali kambu dupa deaka tipa pyoo, “Nambame akali lapoma dolaponya, anduku nyakamanya mokakapili lao masilyamipi?” lea. Dopa leamopa, dokaitame yanu pyao, “Barabasana” leami. 22 Dokopa Pailateme dokaita lamaiyoo, “Dopa-tamo doko, nambame Jisasa Kraisa lengema doko, aipa pyuape?” lea. Dopa leamopa dokaitame, “Poko itanya pyao yuku!” leami. 23 Dopa leaminopa, baame dokaita lamaiyoo, “Baame koo aki mende pipyape?” lea. Dopa leamopa, dokaitame eteteaka puu lao, “Baa pyao yuku!” leami. 24 Pyao yuku leamino dokome, pundu andake mende sakatatamopa, Pailateme mende pyaa naeyalapo-lamo lao kandea. Kandatala baame endakali kambu dokonya enombanya, kingi wasa pyao pituu, “Akali dakenya taiyoko doko, namba-kisa nakatenana, nyakama tange-kisa katena peekelyona” lea. 25 Dopa leamopa, endakali dupa pitakame, “Baanya taiyoko doko naimapi, naimanya wanepi, dupa-kisa sina kaeya!” leami. 26 Dokopa Pailateme Barabasa mokatala, Jisasa konjame pyapala, pyao yukuina lao yanda singi dupa maiya.
Yanda Singi Dupame Jisasa Lamba Leamino Doko
(Mk 15:16-20; Jn 19:2-3)
27 Dokopa gapenanya yanda singi dupame, Jisasa lanyoo gapomane anda kamapu dokonya pyakamatala, yanda singi waka dupa lanyoo ipao kambu piami. 28 Dopa petala dupame baanya yonge pee dupa, lyokao nyepala, kiŋinya yonge pee kala pepola jepae mende, baanya pyakamaiyami. 29 Dee kende nenge-nenge katapae mende nyoo, makipu petala, Jisasanya aiyombanya pisetala, kiŋinya pangali jepae mende, baanya kingi tolae-kaita minasiami. Dopa petala baa lamba lao, luma lakao, mambo pyao, “Judamanya Kiŋi, emba auu pyoo katape!” leami. 30 Dopa latala dupame baa sopokalimi pyapa, keoo konjame aiyombanya pyapa piami. 31 Dopa pyoo etapala, yonge pee wamba pyakamaiyamino doko lyokao nyepala, baanya pingi dupa pyakamaiyami. Dopa petala, baa pyao yukulanya laminao peami.
Jisasa Poko Itanya Pyao Yukuiyamino Doko
(Mk 15:21-32; Lk 23:26-43; Jn 19:17-27)
32 Kamaka pyakalyiaminopa, akali Sairini tange Saimone lenge mende kandanyetala, yanda singi dupame baa pyalanya latala, Jisasanya poko ita doko nyoo sakamaina leami. 33 Sina latala, yuu manda kenge Gologota lenge dokonya pao pyakalyiami. (Manda Gologota dokonya tenge doko, “Matena Kuli.”) 34 Gologota pyakalyetala, yanda singi dupame baa tanda kaeyala naena lao, waene matasini-pipa wasepala maiyaminopa, baame nao sepala, nanenya kaeya. 35 Dokopa yanda singi dupame baa poko itanya pyao yukuiyami. Yukutala baanya yonge pee wamba lyokeamino dupa setapala, yanda singi dupame apimi yonge pee dupanya mende, nyilyape kandamana latala lakii piami. 36 Dopa petala dupame Jisasa kandatae peteami. 37 Jisasa-kisa tenge seteamino pii doko, “Dake Jisasa, Judamanya Kiŋi dokona” lao pepa pyatae, doko poko ita ketae dokonya yukuiyami. 38 Dokopa akali pake nenge lapoma, Jisasa-pipa apata pyao yukuiyami. Mende doko baanya kingi tolae-kaita yukuiyami. Mende doko baanya kingi koeya-kaita yukuiyami. 39 Jisasa pyao yukutae kateamo dokonya-kaita, endakali paeyamino dupame, baa lamba lao, aiyomba wangatoto pyoo, 40 “Embame lotuu anda andake doko lakyepala, yuu gii teponya waka mende pituna leeno dokae! Emba Gotenya Ikiningi-tamo doko, emba tange pyoo nyoo, poko ita doko yakinatala, isa ipu” leami. 41 Mendai dopaka pyoo, pitisa mupapi, Mosesanya loo mana nyepae akalipi, Judamanya isingi akalipi, dupame Jisasa lamba lao, 42 “Baame endakali waka dupa pyoo nyipumuaka doko, baa tange kapa pao pyoo nyala naenge-lamo. Baa Israelemanya Kiŋi daape, epapu poko ita doko yakinatala, isa epena kaeya. Yakinatamo doko, naimame baa lao masoo minamanalena” leami. 43 Baa Gotenya Ikiningina latala, Gote tungi pingi daape. Goteme baa nea kaeyatamo doko, epapu baa pyoo nyina kaeya” leami. 44 Akali pake nenge baa-pipa, apata pyao yukutae kateambino dolapome, mendai dopaka pyoo, baa-kisa lamba pii kando piambi.
Jisasa Kumiamo Doko
(Mk 15:33-41; Lk 23:44-49; Jn 19:28-30)
45 Jisasa yukutae kateamopaka, 12 kilokonya pituu yuu kuiya. Kuiyamo doko, kuiyataeyaka katao pao, 3 kilokonya tuu lea. 46 Dokopa Jisasame etete puu lao wii lao, “Ilai, Ilai, lema sabatani?” lea. (Pii dokonya tenge doko, “Nambanya Gote, nambanya Gote, embame namba aipuma yakinelepe?”) 47 Dopa leamo doko endakali dosa kateamino dupanya, mendapuame sepala, “Ilaija lao wii lelyamona, salapape” leami. 48 Dopa lateaminopa, akali mendeme alo pyao pao, koma jepae mende itakulimi tuku petala, waene kaa pipae mendenya poeyanyetala, Jisasa nena lao makapusakamaiya. 49 Endakali yangi dupame lao pituu, “Ilaijame baa pyoo nyala epelyape lao kandamana, kaeyalapa” leami. 50 Dokopa Jisasame eteteaka puu lao ae latala, baa kumia. 51 Dokopa lotuu anda andake dokonya, lapalapa andake mendeme, nee nyetae katenge panda dokonya, kame pinyetae katenge doko, ketae pituu titi pyao, isa tuu latala lapo pyoloo pia. Dopa piamopa, yuu doko titiwali minao, kana yale dupa pukutala, saa laloo pia. 52 Endakali malu dupa pukuloo petala lumbiamopa, Gotenya endakali kumapae malu petae kateamino, longo dupa sakatasia. 53 Sakataseteamopa, nyakamanya malu dupa yakineami. Maitakao Jisasa sakateamo dokopa, nyakama Jerusalema peaminopa, endakali longo dupame kandeami. 54 Yanda singi isingi akali dokopi, baa-pipa apata Jisasa isoo kateamino dupapimi, titiwali miniapi, waka tata longo mendapu piamo dupa pitaka, kandao etete paka kaeyapala, “Kiningi etete, akali dake Gote Ikiningi-lamona” leami. 55-56 Maria Magadala tange dokopi, Jemesa Jonepanya endangi Mariapi, dee enda longo waka mendapu, Galilea pituu Jisasa nisoo apata epeamino, dupame kuki tependale pituu, piamo dupa kandatae peteami.
Jisasa Malu Piamino Doko
(Mk 15:42-47; Lk 23:50-56; Jn 19:38-42)
57 Yuu kuiyalanya piamopa, akali Arimatia tange kamongo Josepe lenge, Jisasa watao paenge dokome, 58 Pailate peteasa pupala, Jisasanya yonge doko dina lao tee lea. Dopa leamopa, yanda singi dupame kondao nyoo maina lea. 59 Dokopa Josepeme Jisasanya yonge doko nyoo, lapalapa kyeto epe mendeme, yaki-yaki petala, 60 Josepeme baa tange malu pitamina lao, kananda enenge tumbinya seteamo dokonya, Jisasanya yonge doko nyoo setea. Setapala, kana andake mendeme kapilya mina-mina pyoo, malu kambu doko piti petala, baa pea. 61 Dopa piamopa, Maria Magadala tange dokopa, Jemesa Jonepanya endangi Mariapame, malu dokonya yangitena pituu, kandatae peteambi.
Jisasanya Malu Isoo Kateamino Doko
62 Oo yongama Sambata gii epeamopa, pitisa mupapi, Parasaipi, dupame Pailate kanja peami. 63 Pupala baa lamaiyoo, “Akali andake, akali sambo lenge dokome saka katao pituu, baa yuu gii tepo dokonya, sakatatona leamo doko naimame masilyamano. 64 Dopa leana, baanya disaipolo dupame pao, baanya yonge doko waa katao nyoo yalo petala, endakali dupa lamaiyoo, baa sakatapyana latamino dokome, endakali dupa eteteaka kyakasetamina, malu doko isokondape pyoo, isoo katao, yuu gii tepo dokonya tuu lena lape. 65 Dopa leaminopa, Pailateme dokaita lamaiyoo, “Nyakamame yanda singi mendatupa lanyoo pupala, malu doko isokondape pyoo isoo katena lapape” lea. 66 Dokopa dupame pupala, malu doko piamili petae kalyape lao kandatamana latala, kongali pinya kateami. Dopa petala yanda singi dupame isokondape pyoo, isoo katena leami.