1-2 Jisasame kongali pii mende deaka dokaita lamaiyoo, “Gotenya isingi mate doko dapale mende: Kiŋi mendenya ikiningi doko, enda keleamopa, takangeme nee andake mende yangakamaiya-pyaa. 3 Kiŋi dokome baanya kalai akali dupame, endakali nee napenge latae dupa lanyala pena lea. Dopa lateamopa, nyakama pupala, nee nala epena lamaiyaminopa, dokaitame nyakama naipumanana leami. 4 Dopa piaminosa, baame kalai akali mendatupa pena lao pituu, 'Endakali nee napenge latae dupa kandao, “Bulumakao maipapi, bulumakao andapaepi, dupa pyapalamo. Dupa pitaka depa latae sepelyamona, nyakama dokonya nala ipupa” lapape' lea. 5 Dokopa kalai akali dupame pao lamaiyaminoaka doko, endakali nee napenge latae dupame, pii nepatala, nyakamanya masiaminoli pyoo, mende baanya eenya pea, mende baanya bisnis pyaa pea. 6 Dee yangimi kalai akali dupa minatala, mana koo minao pyao kumasiami. 7 Dopa piamino doko, kiŋi dokome sepala, imbu kaeya. Imbu kaeyapala baanya yanda singi dupame, kalai akali pyao kumasiamino dupa pyao kumasetala, dupanya taono doko yangala pena lea. 8 Dokopa kiŋi dokome baanya kalai akali dupa lamaiyoo, 'Nambanya nee andake doko depa latae sepelyamoaka doko, nee napenge latae endakali dupa mana epe naminingima, dokonyana nee nala naepena daa lelyo. 9 Dopana, nyakamame endakali kambu pingi panda dupanya pupala, endakali kandatamino dupa pitaka, nee andake dakenya nala epena lamaiyepape' lea. 10 Dopa lateamopa, kalai akali dokaitame kaitini dupanya pupala, endakali koopi epepi kandeamino dupa pitaka laminao, ipao kambu piaminopa, nee andake napenge panda doko, tumbiami. 11 Peteamino dokonya kiŋi dokome ipupala, endakali dokaita kandeamopa, akali mende yonge pee, enda kelyengesa pingi doko napyoo peteamo kandea. 12 Kandatala kiŋi dokome baa lamaiyoo, 'Kaimia, aipuma embanya yonge pee, enda kelyengesa pingi doko napyoo dakenya epepe?' lea. Dopa leamopa, akali doko ema napia. 13 Dokopa kiŋi dokome baanya kalai akali dupa lamaiyoo, 'Akali dake kingi mokopi yaki petala, kamalya iminjetae, endakali ee lao, yamataka lao, nenge gilyoo katenge dokonya soo pyale lapa' lea. 14 Dopana, Goteme endakali longo dupa epena lengeaka doko, baame endakali kuki yapao nyingina,” Jisasame lea.

15 Dokopa Parasai dupame pupala, Jisasame pii mende kopeta latamo dokonya, baa mangenya minamana latala, pii lao kambuiyami. 16 Dopa petala Parasai dupame, nyakamanya disaipolo mendapuapi, Erote Antipasa tata mendapuapi, dupa Jisasa kateasa pena leami. Dupame pupala Jisasa lamaiyoo, “Mana Lenge Akali, embame akali andake dupa paka nakaeyao, kiningi pii doko tolao lenge. Endakali dupame pipimili lao Goteme masilyamo, dokonya-kaita embame tolao mana lenge. 17 Dopana, embame aipa lao masili? Gapomane andake Sisa doko, naimame takisa maipengepe, daape?” leami. 18 Dopa leaminopa, Jisasame baa minao koeyasalanya, makande pilyamini-lamo lao kandatala, dokaita lamaiyoo, “Nyakama Gote watao miningi mane-mane pingima dupame, aipuma namba minao makande pilyamipi? 19 Takisa maipenge muni konde mende, kandatoo nyoo dyepa” lea. Dokopa muni konde mende maitiaminopa, 20 Jisasame dokaita tipa pyoo, “Muni konde dakenya, apinya lengelyapi, kengepi kalyape?” lea. 21 Dopa leamopa, dokaitame yanu pyao, “Sisanya kalyamona” leami. Dopa leaminopa, baame dokaita lamaiyoo, “Sisanya dupa Sisa tange maiyakamaiyepape. Gotenya dupa Gote tange maiyakamaiyepape” lea. 22 Pii yanu pyao leamo doko sepala, dokaitame paka kaeyapala, baa yakinatala peami.

23 Sadyusi dupame, endakali kumapae dupa sakatala naeyatana lengema. Gii dokopaka, dopa lengema dupa, Jisasa kateasa ipupala baa lamaiyoo, 24 “Mana Lenge Akali, wamba Mosesame mana leamo dokonya, 'Akali mendeme enda nyepala, wane manja naeyao kumatamopa, baanya kaiminingi dokome enda walyakae doko piseta. Baapa enda walyakae dokopa, wane mupa manditambino doko, kaiminingi kumia dokonya lao, manjakamaitana' lapae silyamo. 25 Gii mendepa akali mendenya, ikiningi 7-pela naima-pipa kateamano dokonya, mupa dokome enda nyepala, wane manja naeyao kumia. Kumateamopa, kaiminingi lapo dokome enda walyakae doko pisia. 26 Pisiamoaka doko, wane namandeamopa, akali doko kumia. Kaiminingi teponge dokome, dopaka pia. Dopaka pyoo, kaiminingi 7-pela dutupa pitakame, enda dokoaka nyepala, wane manja naeyaowaka kumiami. 27 Dokaita kumao ete dokonya, enda doko kumia. 28 Akali kaiminingi 7-pela dutupa pitakame, enda mendai dokoaka nyiamino dokonya, tanga endakali sakatatamino gii dokopa, enda doko apinya jetape?” lao tipa piami. 29 Dopa leaminopa, Jisasame yanu pyao, “Nyakamame pii pepa pyapae singi doko, masala naeyao, Gotenya pupu lapae, doko masala naeyaowaka pingima dokonya, nyakamame kopeta lelyamino. 30 Endakali kumapae dupa dee sakatatamino gii dokopa, akali enda nyala naeyao, enda akali napao, kaitinya enjele dupa katengemali pyoo katatami. 31 Endakali kumapae dupa, dee sakatatamino dokonya, Goteme pii lanya seteamo dake, itaki napiamipi? 32 Goteme 'Namba Abrakame, Aisake, Jekopepinya Gotena' lea. Baa kumapae dupanya Gote daa. Baa saka katenge dupanya Gote. Abrakame, Aisake, Jekopepi dee tanga sakatao katatamina lao, Goteme masala naeyali doko, baa dutupanya Gote laa naeyalina” lea.* Abrakame, Aisake, Jekopepi dee tanga sakatao katatamina lao Goteme masala naeyali doko, baa dutupanya Gote laa naeyalina” lea. Pii datupa buku Baibolo Giriki piimi pyatae dokonya nakalyamoaka doko, tenge doko yalo petae palelyamo. 33 Dopa leamopa, endakali kambu piamino dupame baanya mana leamo dupa sepala, walu lao paka kaeyami.

34 Jisasame Sadyusi dupa pii nalena lao, etete auu pyoo yanu pyakamaiyamo sepala, Parasai dupa Jisasa kateasa ipao kapeami. 35 Kapeamino dupanya, Mosesanya loo mana nyepae akali mendeme, Jisasa minao makande pyoo, 36 “Mana Lenge Akali, Mosesanya loo dupanya anduku mupa joo silyape?” lao, tipa pia. 37 Dopa leamopa, Jisasame baa lamaiyoo, “'Embame embanya Kamongo Gote doko, embanya monapi, imambupi, masingipi, dutupa pitakame auu kaeyape.' 38 Doko loo mupa doko. 39 Loo lapo doko dake: 'Embame emba tange auu kaengeli pyoo, embanya endakali yango dupa auu kaeyape.' 40 Mosesanya loo setapaepi, propeta dupame pepa piamipi, dupa pitaka loo lapoma dolaponya, koko palelyamona” lea.

41 Parasai dupa kapatae kateaminopa, Jisasame dokaita tipa pyoo, 42 “Nyakamame Mesaeya dokonya yumbange doko, apina lao masilyamipi?” leamopa, “Baa Dapitinya yumbangena” leami. 43-45 Dopa leaminopa, Jisasame dupa lamaiyoo, “Oli Spiritame lungu piamopa, Dapitimi dapa lea: 'Goteme nambanya Kamongo Mesaeya doko lamaiyoo, “Emba nambanya kingi tolae-kaita piti. Dokonya pititinopa, nambame embanya yandapipi dupa ita minatakala, embanya moko pundi-pundi katena latona' lao, pyapae silyamo.” Dopa latala Jisasame dokaita tipa pyoo, “Dapitimi Mesaeya doko kandao, baanya Kamongona lea-lumu doko, kaitini andukunya-kaita, Mesaeya doko baanya yumbangena leape? Mesaeya doko baa Dapitinya yumbange iki daa. Baanya Kamongo dokona lao, nyakamame masala naelyamipi?” lea. 46 Dopa lateamopa, akali mendeme Jisasanya pii doko kapa pao, yanu pyapenge nanjia. Gii dokonya pituu, akali mendaipi mendeme, baa tipa pyaanya paka kaeyami.