1 Ingodena agipo embobo ewora awa atae orase sedo Keriso mi ingodena wujegedo soregurisira. Edo ingo awa boroko embo God mi soregurisira embobo awa ra awasedo ingo sekago agipo embobo eosase sedo goroba edo derido atiwo.

2 Edo nanemi ingoda yei sena ingido gogo ewo. Embo amemi bugudo ingoda tamo da andiso diwadi soro gido re awara seove. Edo ingo awara sadewa awa ro Keriso mi ingo embo isira amimi ingo kondade adi aera. 3 Nanemi ingoda yei sena awasedo ingido gogo ewo. Embo ave tamo da andiso diugari wasiri awa bae etira embo awa Jew embobo da agodari berari awa kera ae etira. 4 Edo embo ingoda teda amimi God ga da umo jigari ewamei adi sedo Jew embobo da agodari awa kera adi jarira embo awa umo Keriso dodo seugetira. Edo daedo umo umosuka God mi uso soregari kando uso yei itari sago ae yei ainda itira. 5 Ingodena gosera ingodenaso tumonda ari Keriso da yei awasedo God mi ari ingodena ungae da umo jigari ewamei da adera. Edo ingodena ewamei God mi Asisi Kotopu da yei da awodo itari amboda bugadira awawa simba edo era. 6 Edo ingodena Keriso ga da dada isera awa tamo da andiso diugari wasiri awa bari awa nembodiba aera edo tamo da andiso diugari wasiri awa bari ae awa nembodiba aera. Awarate embo mi ingodena embo nenei dubo budo era awa gido ingodena Keriso tumonda era awa gadera amone rora nembodiba ra.

7 Edo ingo awa Keriso tumonda ari emboro da ewamei sumbusewa. Awarate embo amemi ingo emboro ainda sumbowase sedo duredo edo emboro beitigetiri? Edo embo amemi ingoda yei ge sedo etiri ingo ge be moka awa doturitavi? 8 God iji berari ingo uso yei jumbudo ira ge be moka da emboro awa gajae edo ira. 9 Edo embo mi wasiri biae awa ge sedo era amone eire, “Ambe bajari siwo jawo yeast kiambu mi ari ambe nembodiba edo bajadira.” 10 Na gosena ingo rora ewamei awa adi dipapa ewa awa gosena. Edo ingodena awa God ga da pepeta era awasedo na gosena ingo naso ge awa mana ujo ae adewa. Na gosena embo amemi etiri ingo mana mana ewa embo awa God mi uso riroga itadira.

11 Naso nanonamendi na ingo tamo da andiso diugari wasiri awa bawase dipapa edo bawase atopatae etena awa Jew embobo mi naso yei memesi awa mana itae etera. Edo na ingo tamo kotopu diugari wasiri awa bawase atopatae awarate na tumonda ari da emboro awa atopapotena awasedo ungo mi naso yei memesi ititera. Edo na ingo awodo atopatae etena awa naso yei kotari bebegae nanemi Keriso da betari orega da awa atopapotena ainda kotari bebegae awa atae ae etira. 12 Edo embo ingo mana mana awase era awa na dipapa ena awa ungo ingo seugae etera.

13 Edo naso nanonamendi ingo agipo ewowa awa doawase sedo God mi ingo jawo sisira. Awarate agipo ari awa atae edo ingo ro dipapa ewa awa adewa awa kotove. Edo ingo God ingo dubo burira awasedo sapo mina ara ewo. 14 Ko agodari ge da mi agodari ge nei da be awa ujugurira. Edo ge da re eire, “Imo imosuka dubo buresa da awodo embo nenei dubo buio.” 15 Awarate ingo wo mi edo era da awodo mina gamba ise edo mina dara adewa awa gido gogo ewo ko ingo ingosuka usibesi mina ara adewa.

16 Na ingoda yei sena Asisi Kotopu mi ingoda yei ro sira da awodo atiwo. Edo awodo atadewa awa ingoda joda dipapa bebegae mi ro awase sira awa mana adewa. 17 Edo ingoda joda kotari bebegae de edo Asisi Kotopu de mi ro awase sira rora etoto eiawa buro da awawa aera. Edo rora etoto eiawa gitopo edo era awasedo Asisi Kotopu mi ingo gitijigadira awa ingo mana ingoda joda kotari bebegae mi ro awase dipapa ira awa adewa. 18 Edo Asisi Kotopu mi ingo gitijigadira awa ingo awa agodari ge da agipo embobo adi aera.

19-20 Edo ingo ingoda joda kotari bebegae mi ro awase sira awa isaga be gosewa. Edo kotari bebegae re eire, dita ari, viro ari, wasiri bebegae, ove kekevegari tumondebain ari, inja ari, edo gitopo mina ara ari, embogo ari, ge bagari, embo nenei ji sari, tini gambari ari, edo embo nenei kondade ae ari, embo nenei da rora dipapa ari edo ewoga ewoga ari edo umo okain indido jiro bebegae ari, umo okain indido wasiri bebegae ari. 21 Edo na matu ingoda yei wasiri bebegae eiawa ari da ge awa sisena te na boroko sekago sena awasedo ingiwo embo ave wasiri bebegae eiawa era awa mana God da gitijigari iji da ewamei awa badira.

22 Awarate be Asisi Kotopu mi ira amone gari nei na. Edo Asisi Kotopu mi be ira amone dubo bari, iaviri ari, jo jamo jamo ari, sapoa ari, embo nei kondade ari, edo ewamei ari, gebe sari, tini gambari ari ae, edo jo da dipapa bebegae awa ae ari. 23 Edo ro Jew embobo da agodari ge mi sira awodo awa rora eiawa adewa awa awara sira. 24 Edo embo ave Iesu Keriso da topo awa ungo awa teta ungoda kotari jo da bebegae awa orega da dari inge isera. 25 Edo Asisi Kotopu mi wasiri seka ingodenaso yei ititirari ingode Asisi Kotopu kera ise uso emboro da pepeta ore. 26 Edo ingode mana jariga embobo awodo mana adera edo ingode ingodena awa embo nembogamo sise embo nenei awa embo memeinya mana sadera edo ingode mana ji mina sara adera.