Matiu
Matiu sawi one mahemakapukusa someane oyapo.
Yasumo aporo hakāsa pura metane Matiupo. Matiu yano motosa meta Rífaipo. Fana Matiumo Rome kamanipoko makata rakisiapo. Epo makata rakirane, ipi takese mora aporopo.
Yasu ipi Kotimo unihaeaka rekeasimo murikimasa aporo Keresoane ipipo. Yu aporo hinamomo ayiáka hemakapusimo Matiumo sawi one popasapo. Fana Yu aporo porofete aporomo Kereso peraka makata ayiakakosane sawia popasapo. Asiamo ipu popasane fasereperakano asekea Matiumo popasapo. Yasu hepene yapura hisiapoko keremisi 30 faraka Matiumo sawi one popasapo.
Matiu sawia some kepo parakuraka popasane oyapo.
1:1-17 Eparahamemo wainepe pesa aeyaka Yasu takapesapo.
1:18-25 Yasu takapesapo.
1:18–2:23 Yasu takapesa maiya amo aporo metakiramo kekerehoko pesapo.
3:1-12 Yone he tapukumareramo aporo hinamo hea tapukumurisiapo.
3:13-17 Yonemo Yasuane hea tapukumaresapo.
4:1-11 Satanemo Yasuane mokopipiraka somesa nine Yasumo kaisiafapo.
4:12–18:35 Kariri hauaka á Yasu koraka reke makata rakisiapo.
19:1–20:34 Yasumo Kariri hauakane metakarikia Yarusarame sitia hisiapo.
21:1–27:66 Yasu Yarusarame sitia rea maiya amo Yutasemo eane parakesapo. Parakerakano Yasu waseremaka hukurukua rusua kusuapo.
28:1-20 Yasu turikia purakano aporo hinamo metakiramo eane asesapo.
1
Eparahamemo aporo wainepe pesane oyapo.
Ruki 3:23-38
1 Éparahamemo aporo ira wainepe pesa á Yasu faserepesane oyapo. Yasu Keresomo makasa kaua kekemane Téfetepo. Téfetemo makasa kaua kekemane Éparahamepo.
2 Éparahamemo ipi maeyane Aísakepo. Aísakemo ipi maeyane Yákopepo. Yákopemo aporo hokosa hokono murisiapo. Hokono murisiane meta Yútapo.* Yákopemo aporo hokosa kenosu hokono murisia amo Yu aporo ira keno suane kepomaresapo.
3 Yútamo ipi hinamo Téma arumaka aporo hokosa teta hokono maresane meta Sérapo, meta Péresepo. Péresemo ipi maeyane Héseronepo. Héseronemo ipi maeyane Rámepo.
4 Rámemo ipi maeyane Amínatapepo. Amínatapemo ipi maeyane Násonepo. Násonemo ipi maeyane Saómonepo.
5 Saómonemo ipi hinamo Réhape arumaka aporo hokosa hokono maresane Póasepo. Póasemo hinamo Rúte arumaka aporo hokosa hokono maresane Opetepo. Opetemo ipi maeyane Yésepo.
6 Yésemo ipi maeyane Téfetepo. Téfete ane ipi unihaeaka reapo. Téfetemo Yurayamo hinamo yaroane arumaka hokosa hokono maresane Sóromonepo.
7 Sóromonemo ipi maeyane Ríapomepo. Ríapomemo ipi maeyane Apaísapo. Apaísamo ipi maeyane Ésapo.
8 Ésamo ipi maeyane Yihósafatepo. Yihósafatemo ipi maeyane Yóramepo. Yóramemo ipi maeyane Usáyapo.
9 Usáyamo ipi maeyane Yótamepo. Yótamemo ipi maeyane Éhasepo. Éhasemo ipi maeyane Hesekáyapo.
10 Hesekáyamo ipi maeyane Manásapo. Manásamo ipi maeyane Émonepo. Émonemo ipi maeyane Yosáyapo.
11 Yosáyamo ipi maeyane Yakóyakinipo.† Yahóyakinimo yano meta yano motosa Yakonaeapo. Arirakano Yosáyamo aporo hokosa metakira soko hokono murisiapo. Yosáyamo hokosa hokono murisia maiya amo Isiraya aporo ane tipura keako Pápirone hauaka á karikia pusuapo.
12 Karikia pusuakipoko Yakóyakinimo ipi maeya hokono maresane Siátiopo. Siátiomo ipi maeyane Serápapeopo.
13 Serápapeomo ipi maeyane Apiútepo. Apiútemo ipi maeyane Eraíyakimepo. Eraíyakimemo ipi maeyane Ésopo.
14 Ésomo ipi maeyane Sétokepo. Sétokemo ipi maeyane Ékimepo. Ékimemo ipi maeyane Eriútepo.
15 Eriútemo ipi maeyane Ereásapo. Ereásamo ipi maeyane Mátanepo. Mátanemo ipi maeyane Yákopepo.
16 Yákopemo ipi maeyane Yósefepo. Yósefemo ipi hinamoane Maríapo. Maríamo hokosa takapesane Yasupo. Yasu ipi unihaeaka rekeasimo Kotimo máfaraka maresasamo ipi yano motosa Keresopo.
17 Asiamo Eparahamemo aporo ira wainepe pusuane menorape pukua, senakiane (14) Tefetepo. Tefetemo aporo ira wainepe pusuane menorape pukua, senakiane (14) Pápirone hauaka á tipura keako pusua maiya amo aporo hokosa hokono maresa ayapo. Pápirone hauaka á tipura keako pusua aeyaka kepomarekea menorape pukua, senakiane (14) Keresopo.
Yasu Kereso takapesane oyapo.
Ruki 2:1-7
18 Yasu Kereso takapesane oyapo. Ipi kaīyia Maria ane Yosefemo arumakasiraka fairaka rea maiya amo, Maria tua Ho Kotesamo hokosa makerakano umisapo. 19 Umirakano asekea Maria faisa aporo Yosefeane ipi tau reke, somemane motosane kekemaraka tau keneamo reasasamo epo hemakapuraka, “Maria aporo metayaki purakanareapo. Asiamo eaki kára hukuruane aporo suamo e makaiyanapaka faisane tau metakariakosapo.” 20 Aíyaka hemakapukua reakipoko, kituamo Unihae Kotimo hepene aporo peraka Yosefeaki someraka, “Tefetemo aporo ira Yosefeo. Ní hinamo Mariane arumako karekekea metakariakopo. Ni apea Mariane karikia punie. Ipi umisa akayane Ho Kotesamo hokosa eaki makesapo. 21 Hokosane aporo hokosa takapeakosapo. Takaperakano e yano motoraka Yasu yano motoanie. Yasu yano motosa kepoamo Isiraya aporo hinamomo makata watikisane rakiraka risikino, i fanasinapaka epo mafasiakosapo.”
22-25 Airakano Yosefe turikia puraka Unihae Kotimo hepene aporomo somesane kakimaka, Mariane ipi apea karikia pusuapo. Pukua Maria hokosa takapeasiraka kaya maiya amo, Yosefe eyaki hakāsa yao pusuafapo. Maria umiraka kayane aporo hokosa takaperakano asekea hokosane yano motoraka Yasu yano motosapo. Yasu pesane, makata ane su ayiakasiraka, wate fana porofete aporomo Kotimo someane kaikia sawia popasapo.
Sawia popasane oyapo. “Kaisie, hinamo sakora umiraka kakakosapo. Umiraka kaina aporo hokosa takapeakosapo. Takaperakano e yano motoraka Emánio yano motoanie,” aíyaka Unihae Kotimo somerakano porofete aporomo kaikia popahoareapo. (Aisaia 7:14)
Popasane faserepesa ayareapo. Arirakano namo meaka Emánio yano motosa kepoane, Kotiane isuyaki rekenapo. Aíyaka yano motosapo.