2 “Eo, inau au rongomigira sui nogo na omea vaga gira.

Me ke naukoeguania kesa ti ke tangomana na totugoto i matana God kalina aia ke pede tinoni?

3 ?Me ke naukoeguania kesa ti ke tangomana na vaiganigi koluana?

Me ti vaga God ke veisuâ kesa na toga nina torogoko,

me tau tangomana na tinoni na tuguvisuana ke kesa.

4 God aia e sasaga loki me susuliga sosongo bâ;

me tau ulagana sa tinoni ke tû me ke suamangana.

5 Me utu goto ke tsari idatalua vania ke kesa, ti aia ke ratsuligigira na vungavunga,

me ke toroutsanigira tana nina momosatoba loki.

6 God nogo e molovania na vuluge me keselia na kao;

me kasiligira na tuguru vatu ara tangolikakaia na barangengo.

7 Maia e tangomana ke tongo vania na aso me ke tau labadato,

ma na veitugu ma kara tau mokemoke tana bongi.

8 God segeni moa e tatakatsinia na baragata,

me tsotsokae i kelaqira na panu loki.

9 God nogo e tsauraginigira na veitugu tana masaoka,

igira na Buru, ma na Sagetolu, ma na Perotala.

10 E utu igita ka padagadovigira se ka tsokoraegira

na omea loki ma na omea ganataga danga sosongo aia e naugira.

11 “God e liu saviliu mai, minau au tau reilakana.

12 Maia e adigira na omea aia e ngaoa ke adia, me utu goto kesa ke tongo vania;

me tau goto malagai kesa na veisuana, ‘?Goena laka nagua o naua?’

13 Na korena God e vô ke sui.

Maia nogo e bingi rusaginigira gana gala

igira ara sangâ Rahab na vua loki ni tasi kalina aia e ngaoa na tukapusiana.

14 ?Me vaga ia, ma na tsaqina goko koegua tangomana kau tuguvisuginia nina goko God?

15 Me atsa moa ti e maka i laona tobaqu laka au tau sasi,

me utu nomoa kau tuguvisu vania nina goko;

ma niqu aqo moa kau nongia ke galuveau me ke vaniau na pedegoto.

16 Me atsa moa ti aia ke tamivaniau na goko,

me utu nomoa kau tutunina laka aia sauba ke rongomi vataviau.

17 Aia nogo e molomaia na legai loki ke rarusiau me gini viri boboto na koniqu popono,

me tau lelê tamani sa rongona.

18 Maia e tangoliau kakai, me gini utu vaniau na magomago dou;

me gini seko babâ moa na mauriqu.

19 ?Me laka kau tovoa na rarai? ?Na raiana God?

?Se laka kau raqâ tana pede? ?Laka tangomana kesa ke raia me ke vano?

20 Me atsa moa ti e maka i laona na tobaqu laka au tau sasi,

ma niqu tsaqina goko sui kau tsaria sauba kara tau moa goto i matana,

maia sauba ke kedeginiau moa.

21 Me atsa moa ti e maka i laona na tobaqu laka au tau sasi,

minau au tau nogo gini boe ti ke mana se tagara.

Au qisi nogo na mauri.

22 Me atsa moa ti igita a sasi se a tau sasi,

ma God sauba ke matesigita sui lakalaka moa.

23 Kalina kesa na tinoni dou ke tavongani novotia na mate,

ma God e kiataginia.

24 God e molonogoa na barangengo tana limaqira na tinoni vanga tsutsukibo.

Maia e naua me gini koko sui na mataqira na manepede.

?Me ti vaga God e tau naua na omea vaga ia, masei moa e naua?

25 “Na bongiqu inau ara vano tsaku sosongo, me tau goto dou sa vidaqira.

26 Na mauriqu e vavano tsaku sosongo me otso vaga moa kesa na roko e vavano tsaku sosongo,

me tsaku vaga moa na manuloki kalina e lovotsunaginia kesa gana omea ke gania.

27 Ti vaga kau kiaqumu ma kau tovoa kau padaleginigira niqu rota au vatsangia,

28 mi tana ara viri pidivisutugua gaqu vatsangisavi,

rongona au donagininogoa laka igoe God, o padavaniau laka inau na tinoni sasi.

29 ?Me ti vaga igoe o padavaniau nogo laka inau na tinoni sasi, ma nagua goto kau gini ngongoragi matena na isutuguqu segeni?

30 Me tagara goto sa vatana sopu ke tugua na vulimaleana niqu sasi.

31 God e tsonitsunaau i laona na qilu na mani tsoni kutso,

migira goto na poloqu ara gini vangamâ goto tana rongoqu inau.

32 Me ti vaga ke tinoni lê moa God, me tau utu inau kau tuguvisu vania nina goko;

ma kami ka bâ kolu tana tinete na gotosiana ka nimami vaiganigi.

33 Me tau goto totu ke kesa tugua ke nauvanikami na pedegoto God minau.

34 Me ti vaga God ke adiligia na gai i limana aia e rarusiginiau,

me ke mololea na molo matagu vaniaqu inau,

35 mi tana ti inau kau tau goto matagu na tsaridou vaniana na omea sui ara ngoliau,

rongona au dona segeniqu nogo i tobaqu laka au tau sasi.”