2 “?Egua vaga ti igamu amu totu matengana moa na labuginiaqu nimui tsaqina goko?

3 E danga nogo kalina igamu amu televolevo seko vaniau,

mamu tau lele goto gini vangamâ na tsogori pukaliaqu inau.

4 ?Me atsa moa ti vaga ke mana laka inau au naua sa omea ke sasi,

ma nagua e sekoliginigamu tugamu?

5 Eo, amu padâ laka igamu amu dou bâ liusiau inau,

mamu reigira na rota seko ara gadoviau,

mamu gini keli vaniau laka inau na tinoni vanga tsutsukibo.

6 ?Megua laka amu tau moa reigadovia laka God nogo e naua na omea vaga ia?

Aia nogo e molovaniau gaqu taviti agana kau gini sogo i laona.

7 Minau au nongikakaia laka ke mololea na rotasiaqu lê vaga ia,

maia e tau lele goto rongomiau, me ke nauvaniau na pedegoto.

8 Ma God nogo e tukapusi vaniau niqu na sautu, me gini tagara sa nauna i tana kau liu inau;

maia e rodosigira pipi sui niqu sautu.

9 Me adiligigira sui lakalaka pipi na omea au tamanigira,

me naua me gini tangi seko na soaqu i laoqira na tinoni.

10 E labupolipoliau, mau gini seko pitsu saikesa,

me vutiligi taniau pipi sui niqu amesi,

me molovaniau kau totu pitua moa na mate.

11 God e kore sosongo vaniau,

me nauvaniau vaga moa ti inau gana gala.

12 Maia e mologira nina alaala na mane vaumate mara maiginiau;

mara tsaia na kabi polia na valequ.

13 “God e naua migira na tasiqu mara viri vanoligi taniau sui;

minau au mala vaga moa ti na tinoni labavô i laoqira igira ara donadouginiau.

14 Migira goto na kamaqu ma gaqu duli dou ara viri vanoligi taniau sui.

15 Igira sui ara lavu na mai sanga mutsa i valequ ara padaleau saikesa nogo;

migira niqu daki aqo ara nauvaniau vaga moa ti inau na tinoni labavô, se na tinoni ni veratavosi.

16 Mi kalina ti kau soâ kesa niqu tinoni aqo, maia e tau lelê gokovisumai vaniau,

me atsa moa ti inau kau goko dou vania,

maia e utu goto ke galuveau me ke ngaoa na mai sangaaqu.

17 Ma na tauqu e utu goto ke berengiti na siginiana na vuruna na mamagoqu,

migira na tasiqu segeni nogo ara sove goto na mai varangisiaqu.

18 Mi kalina ara reiau na baka ara peaau moa mara kiataginiau.

19 Migira na kulaqu varavara ara reisavi sosongoliau,

migira sui au galuve lokigira ara tû mara gati visuau moa.

20 Na kokoraqu sui ara tsautsau lê moa tana suliqu;

me tugunogoa kau mate, mau tau moa dona egua ti au tau vati mate.

21 “!Migamu na kulaqu, kamu galuveau kiki!

Na limana nogo God e labu pukaliginiau.

22 ?Migamu egua ti amu totu matengana moa na labuaqu goto vaga nogo God e nauvaniau?

?Laka amu tau vati vatsa moa na rotasiaqu inau?

23 “!Ke dou sosongo nomoa ti vaga ke kesa ke padavisugira sui pipi niqu tsaqina goko

me ke maretsunagira i laona kesa na papi!

24 Se ke adia kesa na gau me ke pariginigira tana vatu,

mi tana kara totu kalavata saviliu.

25 Minau au donagininogoa laka niqu Vagamauri e totu i gotu

mi tana susuina maia sauba ke mai me ke isutuguqu.

26 Mi murina kalina na lobogu seko ke ganisuinogoa na kokoraqu,

ma kau mamauri moa tana koniqu iani, minau sauba nomoa kau reilakana God.

27 Na mataqu segeni nogo kau reiginia aia, me tau goto kesa segeni,

aia nogo na omea inau au amesia tana tobaqu popono.

28 Migamu amu tsarivaganana, ‘?Nagua ka tu naua tugita ti ka tu rotasi sosongolia?’

Mamu tsarigotoa, ‘Gana lobogu aia e pukuga mai nogo i laona na tobana segeni.’

29 Bâ, mi kalina ia, igamu nogo nimui aqo kamu matagunia na isi,

aia nogo na isi e adimaia na korena God matena na sasi,

mi tana ti sauba kamu donaginia laka e totu manana kesa aia e dona ke saua na pedegoto.”