42
1 Me tû a Job me gokovisu vania na Taovia me tsaria,
2 “Taovia inau au dona nogo laka igoe o Susuliga Sosongo,
mo naugira na omea sui moa o padangaoa na nauana,
me tau goto tangomana kesa ke tongo vanigo.
3 Mo veisuaginiau laka e koegua inau ti au tau matagu na labuginiana niqu tsaqina goko bubulega na omea igoe o ngaoa na nauana,
kalina inau au tau lelê dona sa omea.
Eo, inau au gini goko na omea au tau saikesa donaginia,
igira na omea ganataga loki e utugana vaniau inau na padagadoviana.
4 Migoe o tsarivaniau kau rorongo vata kalina igoe ko goko,
ma kau tovoa na tuguvisuana na omea igoe o veisuaginiau.
5 Tana idana, inau au donaginigo moa igoe tana omea au rongomia i koniqira na tinoni tavosi ara tsaria vaniau,
mi kalina ia, minau au reilakamu ginia na mataqu segeni.
6 Me vaga ia, minau au gini vangamâ loki tana rongona na omea sui inau au tavongani tsarigira,
mau padasavi sosongo, mau gini uliuli na papasa ma na tora,
na papadana laka au pilotoba nogo.”
Na Taovia e Goko Vanitugira Na Kulana a Job
7 Mi murina kalina na Taovia e goko sui vania a Job, maia e tsarivania a Elipas, “Inau au kore sosongo vanigo igoe me vanikaira goto ruka gamu duli, rongona i tugamu amu tu tau tsaria sa goko mana tana rongoqu inau vaga e naua a Job niqu maneaqo. 8 Me dou ti kalina ia kamu tu adimaia vania a Job ke vitu na buluka mane me ke vitu na sipi mane, ma kamu tu savorigira vaga na kodoputsa tu matemui segeni. Maia Job sauba ke nonginongi tu matemui, minau sauba kau rongomia nina nonginongi, ma kau gini tau palu tu vangamamui tana rongona tu nimui sasaga bubulega amu tu naua. I tugamu amu tu tau tsaria sa goko mana tana rongoqu inau vaga e naua a Job.”
9 Mi tana, mi tugira a Elipas, ma Bildad, ma Sopar ara tu bâ mara tu naua na omea vaga na Taovia e raiginitugira na nauana, ma na Taovia e rongomia nina nonginongi a Job.
10 Mi murina kalina a Job e nonginongi sui tu mateqira tugira gana duli, ma na Taovia e naua me gini tamani omea danga tugua, me pabovanigotoa ruka kalina na dangana na omea vaga aia e tamanigira nogo tana idana. 11 Migira sui lakalaka na tasina mane ma na tasina daki a Job migira goto na kulana ni sau ara mai na tsigoviana mara sanga na mutsa koluana i valena. Ara goko dou vania mara verea tana rongoqira pipi na rota aia na Taovia e molomai vania. Me pipi gira sui tatasa ara sauvania visana na qolo ma na siraku qolu.
12 Me tû tana, ma na Taovia e vangalaka dou sosongo bâ vania a Job, mi tana susuina na maurina ma Job e tamani omea danga liusia bâ tana idana. Aia e tamanina sangavulu vati toga na sipi, me ono toga na kamelo, me ruka toga na buluka, me kesa toga na asi. 13 Maia e tamanigotoa vitu na dalena mane me tolu na dalena daki. 14 Maia e soaginia na dalena daki botsaida ko Jemima, ma na rukanina ko Kesia, ma na muritibaka ko Keren Hapuk.* 42:14 Na rongona na soa ko Jemima tana goko Hibru ‘kulukulu’; ma na rongona na soa ko Kesia ‘kasia,’ aia e kesa na vatana na papasa sisigini dou; ma na rongona na soa ko Keren Hapuk ‘na botso e totu na omea na totole i laona.’ 15 Me tagara goto sa daki tavosi i laona na barangengo popono ke dou na rereina, vaga tu rereiqira tugira na dalena daki a Job. Maia tu tamaqira e vota vanitugira tu gaqira tuva tana tangolidatoana niqira omea tatamani, atsa kolutugira goto na dalena mane.
16 Maia Job e mauri babâ goto kesa sangatu vati sangavulu na ngalitupa, me reigira na kukuana migira goto na daleqira na kukuana. 17 Mi muri maia e mate kalina e tuqatuqa seko sosongo nogo.
*42:14 42:14 Na rongona na soa ko Jemima tana goko Hibru ‘kulukulu’; ma na rongona na soa ko Kesia ‘kasia,’ aia e kesa na vatana na papasa sisigini dou; ma na rongona na soa ko Keren Hapuk ‘na botso e totu na omea na totole i laona.’