12
Moisés rovai rupi Miriã ha'e Arão ijayvuague
1 Ha'e gui Moisés ogueraa peteĩ kunha Cuxe pygua gua'yxyrã. Ha'e ramo Miriã ha'e Arão ijayvu okuapy Moisés rovai, Cuxe pygua gua'yxyrã ogueraa va'ekue káuxa.
2 Ha'e vy aipoe'i okuapy:
— Xapy'a rei nda'u Moisés rupi anho ri Senhor ijayvu? Nhande rupi voi nda'u nda'ijayvui avi 'rã? — he'i ramo Senhor oendu.
3 Moisés ma ava onhemo'yvyĩ'i va'e, ko yvy re avakue ikuai va'e gui voi yvyĩ'ive va'e oiko.
4 Are'ỹ'i re Senhor aipoe'i Moisés pe, Arão ha'e Miriã pe voi:
— Peẽ kuery mboapy ma peẽ 'rã oguy nhemboaty oĩaty oĩ va'e gui — he'i. Ha'e ramo oẽmba mboapyve.
5 Arai rupi Senhor oguejy ouvy vy oo rokẽ py opyta ho'amy. Ha'e vy oenoĩ Arão ha'e Miriã. Ha'e ramo ha'e kuery ojexa uka.
6 Ha'e ramo aipoe'i ha'e kuery pe:
— Pendu ke aỹ xee xeayvu ramo. Penembyte profeta oiko ramo ma ixupe xee Senhor ajekuaa uka 'rã mba'emo aexa ukaa py, ha'e'ỹ vy oexa ra'ua py 'rã xeayvu hexeve.
7 Ha'e rã xerembiguai Moisés reve ma nami e'ỹ ju aiko, mba'eta ha'e ma ojeroviapy ete oiko xero pygua kuery ha'e javi re openaa rupi.* Hebreus 3.2,5
8 Hexeve ma xeayvu 'rã xejuru rupi ae, oikuaa porã aguã rami, ayvu haxy rei va'e rupi e'ỹ. Ixupe xee Senhor ajekuaa rã xerexa guive. Mba'exa ha'vy tu ndapekyjei ri xerembiguai Moisés rovai rupi pendeayvu aguã? — he'i.
9 Ha'e rami vy ha'e kuery rovai Senhor poxya hendy. Ha'e rire ojepe'a.
10 Arai voi ojepe'a ovy oo áry gui. Ha'e ramove Miriã oikuaa rã hexe oĩ ma lepra, yro'y apĩ rami xiĩ rei va'e. Miriã re Arão oma'ẽ ramo lepra revegua ma hi'aĩ.
11 Arão aipoe'i Moisés pe:
— Ake'e xeruvixa! Ndevy ajerure: Orere emoĩ eme orereko vaia, mba'eta ore'arandua rupi e'ỹ rojapo ha'e nunga, rojejavy ete ange.
12 Nhanereindy topyta eme kyrĩ'i va'e oity pyre rami, mbyte rupi ho'okue ho'apa va'e rami — he'i.
13 Ha'e ramo Senhor pe Moisés ojapukai vy aipoe'i:
— Xeruete, ajerure remonguera ju aguã.
14 Senhor ombovai Moisés pe:
— Xapy'a rei hova re tuu onyvõ va'e rire nda'u sete araa peve ndopytai 'rãgue oxĩmbaa py? Ha'e voi topyta ranhe sete ára tekoa gui mombyry'i. Ha'e va'e rire ma ha'eve peru ju aguã — he'i.
15 Ha'e rami rã Miriã sete ára peve omondouka ranhe tekoa gui mombyry'i. Oguerua e'ỹa ja heta va'e kuery ndoguatai tekoa gui.
16 Ha'e va'e rire mae ha'e kuery oje'oi ju Hazerote gui, ha'e Parã regua tekoa e'ỹa py ju ikuai.